“Эко констракшн” ХХК-ийн барьсан орон сууцны дам нуруу нурж, унасан гэх мэдээлэл бий. Энэ талаар “Эко констракшн” ХХК-ийн мэргэжилтэнтэй холбогдож тодрууллаа. Тэрбээр “Манай компанийн барьсан “Голден парк” хотхонд амьдардаг нэг айлын дам нуруу нурсан гэх гомдол ирсэн. Манайх ашиглалтад орсон барилгынхаа баталгаат хугацааг гурван жилээр тогтоодог. Түүнээс дээш жилийн дараа барилга нурах зэрэг асуудлыг тухайн байрны СӨХ хариуцах ёстой. Бид иргэнээс ирсэн гомдол, мэдээллийг холбогдох албаны хүмүүст мэдэгдэж, хариу тайлбар хүргүүлэхээр ажиллаж байна” гэлээ.

    Харин гомдолтой байгаа тухайгаа илэрхийлсэн иргэн олон нийтийн сүлжээнд “За ёстой хүүхдийн заяа түшинэ гэдэг нь л энэ байх... 101 дугаар байрны энэ дамнуурганы шавар нурж, гурван настай хүүхэд дээрээс минь дарчихсангүй. Хүүхэд битгий хэл том хүн ч эвгүйтэх байлаа. Мэдэж байгаа хариуцах газар гэж нэг ч алга. Барилга барьсан “Эко констракшн” гэх компани нь манайх эхний гурван жил дотор бүх асуудлыг хариуцна гэх юм. Гурван жилийн баталгаатай байр юм уу хаашаа юм.

    "UB даатгал" гэж нэг орон сууцны даатгалын газар мөнгө аваад л байдаг. Тэгсэн зөвхөн гал усны хохирол барагдуулах юм гэнэ. Харин СӨХ нь мэдэх юмгүй байна. За хохирол дүүрч, гол асуудал нь хүүхэд дарагдаж ямар нэг муу зүйл болвол хариуцах газар гэж нэг ч байхгүй бололтой. Ер байрнуудын чанар стандарт нь улам муудсаар. Байрны багана дамнуурга, хана, тааз зэрэгт ан цав үүссэн бол анхааралдаа авцгаана биз” гэжээ.