ШАХМАЛ ТҮЛШНИЙ ҮЙЛДВЭРЭЭ “ШАХАА”-НЫ ТАЛБАР БОЛГОЛОО, АРДЫН НАМЫНХАН

Б. Цогтбаяр:
Эрэн сурвалжлах- Арай ч дээ

2022-11-05, 1972

“Эрдэнэт үйлдвэр” гэж эх захгүй шахаа хийдэг том талбартай байлаа, Ардын нам. Явдаг, явдаггүй техник, таарах, таарахгүй дугуй, ган бөмбөлөг, галуу шувууны мах гээд, бүр ажилчдыг нь арав нугалсан тооны бэлгэвч хүртэл шахдаг байв шүү.

Тэгвэл “Таван толгой түлш” гэх шахмал түлшний үйлдвэрээ “Эрдэнэт”-ийн араас ээлжит шахааны талбар болгож байгаа бололтой юм, Ардын намынхан. Бүр хоржоонтой нь, “Эрдэнэт үйлдвэр”-т улстөрчдийн шахаа ид “галзуурч” байх үед тус үйлдвэрийн захирал байсан Ц.Даваацэрэнг саяхан “Таван толгой түлш” ХХК-ийн захирал болчихсон. Шахаа “цэцэглүүлсэн” хүнийг шахмал түлшний үйлдвэрийн захирал болгосон нь цаанаа ямар зорилготойг ухаж төнхөөд, удаан бодоод байх шаардлагагүй биз. Түүний хормойноос хэчнээн тендерчин “зүүгдэж” явааг тоолж чадахгүй нь харамсалтай.

Тэгвэл Улаанбаатар хотыг утаанаас салгаж, угаараас аврах ганц зорилготой гэх “Таван толгой түлш” компанид эрх баригч намынхан хэрхэн эх захгүй “шахаа” хийж байгааг цөөн хэдэн баримтаар харуулъя.

БАЙГАЛЬ ОРЧНЫ САЙД АСАН Д.ОЮУНХОРОЛ “ТАВАН ТОЛГОЙ ТҮЛШ” КОМПАНИД БАРЬЦАЛДУУЛАГЧ БОДИС “ШАХДАГ” БОЛЖЭЭ

Баримтаар эхэлье. “Таван толгой түлш” ХХК-ийн сайжруулсан шахмал түлшний Баруун бүсийн 4-р үйлдвэрт “Баргил тех” гэх компани 2.2 тэрбум төгрөгөөр барьцуулагдуулагч бодис нийлүүлжээ. Гэтэл “Баргил тех” ХХК-ийг Байгаль орчин, аялал жуулчлалын сайд асан Д.Оюунхорол болон түүний нөхөр, Хонконгт суугаа Ерөнхий консул Г.Жаргалсайхан нар хамтран эзэмшдэг ажээ. Байгаль орчин, аялал жуулчлалын сайд байхдаа “Утааг бууруулсангүй, унтахаас өөр шидгүй” гэж шүүмжлүүлж явсан Д.Оюунхорол одоо “Таван толгой түлш” ХХК-ийн барьцалдуулагч бодисын гол ханган нийлүүлэгч болчихсон явж байна гэсэн үг. Байгаль орчны сайд асан нь барьцалдуулагч бодисын “шахаачин” болчихдог улс манайхаас өөр байдаггүй байх. Бодвол тэр өөрийгөө “Байгаль орчны сайд байхдаа хийж чадаагүйгээ хийж, Улаанбаатарын утааг бууруулахад хувь нэмрээ оруулж байна” гэж боддог биз.

Нэг зүйл тодорхой байгаа нь, Д.Оюунхорол Байгаль орчны сайд байсан хүний хувьд “Ирээдүйд барьцалдуулагч бодисын бизнес хамгийн ашигтай болно” гэдгийг олоод мэдчихэж. Тэгээд бусдаас өрсөж, барьцалдуулагч бодисын бизнес хийж эхэлсэн гэсэн үг шүү дээ. Чухамдаа, Улаанбаатар хот гэр хорооллоосоо мөд салахгүй, гэр хороолол байгаа цагт сайжруулсан шахмал түлшний үйлдвэр зогсохгүй, үйлдвэр ажиллаж байгаа цагт барьцалдуулагч бодис хэрэглэсээр л байх болно. Тэгэхээр сайд асан Д.Оюунхорол хэрхэн алсыг харж, ямар ашигтай бизнес эхлүүлснийг дэлгэрэнгүй тайлбарлах илүүц биз.

Ямартай ч, яам хариуцаж байхдаа утаа буруулах хуруугаа хөдөлгөөгүй Д.Оюунхорол одоо хувийн компаниараа хувь нэмрээ оруулаад эхэлсэн “сайн” хэрэг. Харин нөөц, чанартаа л анхаараарай гэж захих байна. Цар тахлын эхний жил хил хаагдаж, барьцалдуулагч бодис тасарсны улмаас “Таван толгой түлш”-ийнхэн барьц алдахдаа нүүрсээ гурилтай хольж, зуурч байгаад ганц сайн гардуулж байсан удаатай юм шүү.

НИЙСЛЭЛИЙН ХӨДӨЛМӨР ЭРХЛЭЛТИЙН ГАЗРЫН ДАРГА АСАН П.БАТХҮЛЭГ “ТАВАН ТОЛГОЙ ТҮЛШ” КОМПАНИЙГ ХЯТАД ШУУДАЙГААР ХАНГАЖ ИРЖЭЭ

“Таван толгой түлш” ХХК сайжруулсан шахмал түлш гал дүрэлзсэн дүрслэл бүхий улаан шуудайнд савлан худалдаалж ирсэн. Харамсалтай нь, энэ улаан шуудайгаа урд хөршөөс улсын төсвөөр хэдэн арван тэрбум төгрөгөөр худалдан авч байсныг нь ард түмэн өнгөрсөн жил л мэдсэн. Учир нь, халдварт тахлын улмаас хил хаагдах үед урд хөршийн өнөөх улаан шуудай нь тасарч, хүнсний торонд нүүрсээ савлахдаа хүрч байв. Тэр байтугай, айлуудын үнс хийгээд хогийн цэг дээр хаясан улаан шуудайнуудыг "Таван толгой түлш"-ийнхан буцаагаад мөнгөөр худалдан авч байв.

Тэгвэл “Таван толгой түлш” компани урд хөршийн улаан шуудай “шахах” ажлын нэр бүхий хоёр компани хариуцаж ирсний нэг нь “Гурван-Уул трейд” компани. Жишээ нь,“Гурван-Уул трейд” компани өнгөрсөн онд “Таван толгой түлш” компанийн Зүүн бүсийн үйлдвэрт 2.0 тэрбум төгрөгөөр шуудай нийлүүлжээ.

Урд хөршөөс улаан шуудай оруулж ирж,“Таван толгой түлш” компанид “шахаж” ирсэн “Гурван-Уул трейд” ХХК-ийг Пүрэвийн Батхүлэг гэгч эзэмшдэг ажээ. П.Батхүлэг МАН-ын үнэнч гишүүн, саяхныг хүртэл ХНХЯ-ны харьяа Нийслэлийн хөдөлмөр эрхлэлтийн газрын даргаар ажиллаж байсан нэгэн юм байна. Хөдөлмөр эрхлэлтийн газрын дарга байсан мөртөө дотоод хэдэн оёдолчноор шуудайгаа оёулж, ажилтай, орлоготой болгоё гэж бодохгүй, Хятад руу ганзага үүрсэн нь гайхмаар биш гэж үү.

П.Батхүлэгийг судалж үзвэл, МАН-ын гишүүнээс гадна НАМЗХ-ны Удирдах зөвлөлийн гишүүн, Сүхбаатар дүүргийн МАН-ын хорооны хяналтын хорооны гишүүн зэрэг намын албан тушаалуудыг хашиж иржээ. Ардын нам дотроосоо УИХ-ын дарга Г.Занданшатар, Байгаль орчин, аялал жуулчлалын сайд асан, “Эрдэнэс Оюутолгой” ХХК-ийн гүйцэтгэх захирал Н.Цэрэнбат, ХХААХҮ-ийн сайд асан З.Мэндсайхан нартай тун ойр нөхөрлөдөг юм байна. Жишээ нь, П.Батхүлэг Баянхонгорын буюу Г.Занданшатартай нэг нутаг гэдгээс эхлээд холбоо сүлбээ их юм. Харин БОАЖ-ын сайд асан Н.Цэрэнбат, ХХААХҮ-ийн сайд асан З.Мэндсайхан нартай дотно найзууд, нэг намын хамтран зүтгэгчид, тэр бүү хэл “Монгол ардын намын залуучуудын холбоо”, “Жинхэнэ монгол морь морин спорт уяачдын холбоо” зэргийг хамт удирдаж ирсэн хамтрагчид ажээ.

Тайлбар: Баруун гар талаас эхнийх нь МАН-ын гишүүн, "Гурван-Уул трейд" ХХК-ийн захирал П.Батхүлэг

Дээрх баримтуудаас, “Таван толгой түлш” компанийн хамаг мөнгө урсдаг барьцалдуулагч, шуудай гэх хоёр гол “судас”-ыг нь Ардын намын хоёр хүн атгачихсан сууж байгаа нь тодорхой харагдаж буй биз ээ. Барьцалдуулагч, шуудайнаас гадна сэлбэг хэрэгсэл, шатахуун, тос масло, техник нийлүүлэх тэрбум тэрбумын тендерүүдийг ч Ардын намынхан атгачихсан баримтууд олон байна. Ганц жишээ дурдахад, “Тавантолгой түлш” ХХК-д “Есөнмөнх сүлд” гэх компани 1.6 тэрбум төгрөгөөр бутлуур нийлүүлсэн байгаа юм. Гэтэл “Есөнмөнх сүлд” ХХК-ийг эзэмшигч Наранцэцэгийн Гүнжмаа нь “Эрдэнэс Оюу толгой” ХХК-ийн Тамгын хэлтсийн даргаар ажилладаг байж жишээтэй. Сонирхуулахад, “Эрдэнэс оюутолгой” ХХК-ийн Тамгын хэлтсийн дарга Н.Гүнжмаа нь хувьдаа 1.4 тэрбум төгрөгийн зургаан орон сууцтай, 180 сая төгрөгийн Mercedes benz тэргүүтэй дөрвөн автомашинтай, 500 гаруй малтай, 388 сая төгрөгийн авлагатай нэгэн юм билээ.

Энэ мэтээр Ардын намынхан “Таван толгой түлш” гэх шахмал түлшний үйлдвэрээ “Эрдэнэт”-ийн араас ээлжит шахааны талбар болгож байна.

ШАХМАЛ ТҮЛШНИЙ ҮЙЛДВЭРЭЭ “ШАХАА”-НЫ ТАЛБАР БОЛГОЛОО, АРДЫН НАМЫНХАН

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3

Сэтгэгдэл үлдээсэн: 2022-11-06 21:59:21

Зочин: Оюунхорол гуай дээд боловсролоос савраа татмаар байнаа!!’
Сэтгэгдэл үлдээсэн: 2022-11-06 21:55:28

Зочин: Энэ эмэгтэй дээд боловсролоос савраа татмаар байнаа!!’
Сэтгэгдэл үлдээсэн: 2022-11-01 11:58:43

яана даа: Тэтгэвэртээ ч гарч чадахгүй, төрөөс ашиг зулгаах юм даа.