ХХААХҮ-ийн дэд сайд, УИХ-ын гишүүн асан Ж.Батзандангийн ах Ж.Бат-Эрдэнийг Дарханы замын тендертэй холбогдуулан АТГ-аас шалгаж байгаа. Түүнийг 48 цагийн хугацаатай цагдан хорьж, өнгөрсөн баасан гарагт сулласан. Үргэлжлүүлэн 30 хоног хорих эсэхийг өнөөдөр шийдэх шүүх хурал өнөөдөр болно.

Бид энэ талаар ХХААХҮ-ийн дэд сайд Ж.Бат-Эрдэнэ холбогдож, тодруулахад “Өнөөдөр шүүх хурал болно. Мөрдөн шалгах ажиллагаа үргэлжилж байгаа учраас мэдээлэл өгөхгүй. Энэ хэргийн учир удахгүй олдох байлгүй дээ” гэсэн юм.

Тэгвэл тэрбээр цахим хуудастаа дараах тайлбар хийжээ.

"Намайг 70 тэрбумын хөрөнгөтэй, мөнгөтэй гэж сэвжээ. Мөнгө хүссэн нэгэнд ерөөл ч юм шиг мөрдөгдөж, шалгуулж байгаа надад хараал ч юм шиг. Нуугаад байх хөрөнгө бас мөнгө үгүй. Харин зээл болон байгаа хөрөнгөө хууль журмынх нь дагуу ХОМ-д тусгасаар ирсэн. 90-ээд оны ганзагын наймаанаас эхлээд олон төрлийн арилжаа наймаа хийсэн маань бас үнэн.70 тэрбум битгий хэл долоон тэрбум ч алга. Үнэн үнэнээрээ гарна биздээ" гэжээ.