• Өнөөдөр 2021-04-18

Хөл ХОРИНО, ХОРИХГҮЙ гэсэн таавраа хэзээ болтол таалгах вэ

2021-04-08,   341

          Өчигдөр “Юмыг яаж мэдэх вэ, Ерөнхий сайдын шийдийг сонсъё”, “Хөл хорио тогтоох үгүйг харж байж болъё” гэх яриа хаа сайгүй өрнөж, “Хорино гэнэ үү, хорихгүй гэнэ үү” гэж нэг нэгнээсээ сурагласаар өнжсөн. Өнөөдөр ч бас тэгэх л болов уу.
 

Халдварын тоо өдөрт 300 давдаг болсноос хойш хэд хэдэн удаа “хөл хорио тогтооно, тогтоохгүй” гэх яриа гарч, нийгэм бужигналаа. Эцэст нь, Эрүүл мэндийн яам нь хөл хорио тогтоох санал гаргадаг, Улсын онцгой комисс нь дэмждэг, Засгийн газар нь няцаадаг, энэ нь болж л байдаг процесс мэт болж хувирлаа. Гол нь энэ хооронд иргэд, аж ахуйн нэгжүүд төөрөлдөж байна. Аливаа ажил, уулзалт, бизнес, худалдаа наймаа багадаа долоо хоногийн төлөвлөгөөний дагуу явагддаг гэдгийг Засгийн газар, УОК, ЭМЯ, НОК хэзээ ойлгох вэ. Хөл хорио тогтооно, тогтоохгүй гэх таавар таасаар, “Юмыг яаж мэдэх вэ, хөл хорио тогтоох үгүйг харзная” ажлаа хойшлуулж, урагшлуулсаар ард түмэн ч, аж ахуйн нэгжүүд ч залхаж гүйцлээ. Хэдий болтол “Хөл хорио тогтоовол ингэнэ, тогтоохгүй бол тэгнэ” гэж зорилготой амьдрах юм бэ. 

 
Гол нь Ерөнхий сайд Л.Оюун-Эрдэнэ шийдвэр гаргахаас яагаад зугтаад байна вэ. Гаргасан шийдвэрийг нь олон нийт шүүмжилнэ гэж айж, намын нэр хүндээ бодоод тодорхой шийдвэр гаргахгүй “бөөрөнхийлж” байгаа бол одоо ямар ч ялгаагүй болсон. Нийгмийн тал нь өдөрт 500 шинэ халдвар тээгч, дөрвөн нас баралт бүртгэгдэж байна, яаралтай хөл хорио тогтоо гэж, нөгөө тал нь хөл хорио тогтоовол Засгийн газрыг шууд унагаана гэж шаардаж байна. Өөрөөр бол хөл хорио тогтоосон ч шүүмжлүүлнэ, тогтоогоогүй ч шүүмжлүүлнэ. Гол нь одоо тогтооно, тогтоохгүй гэдэг эцсийн шийдвэрээ гаргаад олон нийтийн хүлээлт, төөрөгдлийг нэг тийш болгомоор байна.
 
Хөл хорио тогтооно гэвэл алба, амины ажлуудаа цэгцлээд, ахиухан хүнс базаамаар, тогтоохгүй гэвэл амны хаалтаа ахиухан худалдаж аваад ажлаа бодмоор байгаа юм л даа. Даанч Ерөнхий сайд Л.Оюун-Эрдэнийн халирсан, эргэж хургасан, бөөрөнхий байдлаас болоод “хаданд хавчуулагдсан халиуны зулзага” шиг л болчихоод байна. 
 
Түүнчлэн өнгөрсөн оны арваннэгдүгээр сард дотоодод анхны тохиолдол илэрхэд Засгийн газар бүх нийтийн бэлэн байдлын зэрэгт шилжих шийдвэр гаргаж, сар шахам хатуу хөл хорио тогтоож байлаа. “Хөл хорио л цар тахлын голомтыг хумих шалгарсан арга” гэж ард түмэнд итгүүлсэн. Гэтэл одоо халдварын тоо 10 мянга давчихаад байхад, аж ахуйн нэгжүүдээр шалтаглаж, дуусаагүй вакцинжуулалтаар хаацайлж,  хөл хорио тогтоохгүй хүлээж байгаа нь нэг л ойлгомжгүй байна. Өөрөөр хэлбэл, халдвар тээгчдийн тоо мянга ч хүрээгүй байхад үр дүнгүй гурав, дөрвөн удаа хатуу хөл хорио тогтоож, аж ахуйн нэгжүүдээ тамирдуулчихаад халдвар тээгчдийн тоо 10 мянга даваад эхэлмэгц нь “Аж ахуйн нэгжүүдээ бодоод хөл хорио тогтоохгүй” гэдэг нь ямар гээчийн логик вэ. Өөрийн гараар буудаж унагаад, тэгснээ гүйж очиж тэврээд “яана аа туслаарай, энд хүн үхэх нь” гэж байгаагаас ямар ялгаа байна аа. Зүй нь хатуу хөл хорио тогтоох ёстой жинхэнэ цаг хугацаа нь одоо байсан юм биш үү.
 
Арай эрт хөл хорио тогтоож, эдийн засагтаа механик хямрал үүсгэчихээд одоо алдаагаа засах гэж хөл хорио тогтоохгүй гүрийгээд байгаа юм биш биз дээ. 
 
          Ерөнхий сайд Л.Оюун-Эрдэнэ, Шадар сайд С.Амарсайхан, Эрүүл мэндийн сайд С.Энхболд, Хотын дарга Д.Сумъяабазар нарын дөрвөлд хөл хорио тогтоох сонирхол байхгүй юм бол хаврын түймэр шиг хурдацтай тархаж байгаа цар тахлын шинэ голомтуудыг хумьж авах өөр ямар шийдэл байна вэ. Хөл хорио тогтоохгүй л юм бол өөр шийдлээ олон нийтэд танилцуулах ёстой юм биш үү. “Ковидгүй зун”-ыг амлаж, хийгдэж дуусаагүй вакцинд найдаж суухын оронд өөр гарц шийдэл хайсан нь дээр биш үү. 
 

Хөл ХОРИНО, ХОРИХГҮЙ гэсэн таавраа хэзээ болтол таалгах вэ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтггэгдэл үлдээсэн: 2021-04-08 12:39:25
    Zochin: Uher hulgana
  • Сэтггэгдэл үлдээсэн: 2021-04-08 09:42:27
    Zochin: Ene Oyun-Erdene gdg ergyy umnukh shigee khooson dongodood baival bykh um bolchikhno gj bodood bgaa um baikhdaa. Uvchin gdg chin bolovsrolgyi, bodloggyi khymyysiig tarkhidakhtai adilgyi gedgiig oilgokhgyi bgaa um baikh daa. Iim ch erunkhii saidtai baikh gj dee.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, XI хороолол, 14193-Их тойруу 43, "N tower" V давхар 501-2 тоот
7713-1414