Монгол Улс "КОВИД-19" цар тахлын нийт батлагдсан тохиолдлын тоогоороо анхны голомт БНХАУ-ын өмнө бичигдэж эхэлсэн тухай тив даяараа шуугиж байна. Өнгөрсөн жилийн өдийд "Цар тахлын халдварыг дотооддоо алдаагүй хуруу дарам цөөн улсын нэг нь Монгол Улс" гэгдэж, дуу, клип хийж, сайд, дарга нартаа "Хөдөлмөрийн баатар" цол өгөх нь холгүй сагсуурч, сайрхацгааж байсан бол одоо "Ээлжит Ухань" гэгдэх боллоо.

Нас баралт хоногт 10  дундажтай бүртгэгдэж, Ерөнхийлөгчийн сонгуулиас хойш л гэхэд 130 гаруй хүн "КОВИД-19" цар тахлын халдвараар нас барлаа. Зөвхөн бямба гарагт л гэхэд 14 хүн нас барсан нь "КОВИД-19" цар тахлаар ганцхан хоногт нас барсан хамгийн олон тохиолдол болов. Энэ бол үндэсний аюулгүй байдалд бодитоор аюул учирсныг илтгэх ганцхан л тоо. Цаашид энэ янзаараа нас баралт хоногт хэд болж, хэчнээн гэр бүл хагацлын уй гашууд автахыг таах аргагүй.

Харамсалтай нь, 13-хан хоногт цар тахлын  халдвараар 130  гаруй хүн амь насаа алдаж, аюулын харанга дэлдэж байхад төр тоодоггүй ээ. Ерөнхийлөгчийн сонгуулиас хойш Засгийн газраас цар тахалтай тэмцэх чиглэлээр дорвитой шийдвэр, ядаж л яаж тэмцэх тухай шийдэл гарсангүй. Хоолны болон амралтын газруудын хаалгыг түр барих төдийхнөөр ард түмнийг айдаст автуулаад буй аюулт цар тахлыг намжаах юм шиг сэтгээд сууцгааж байна. 

Ажвал, эрх  баригч намыхан саяны Ерөхийлөгчийн сонгуулийн ялалтдаа "ханачихсан" бололтой юм. Цар тахлын дундуур УИХ,  Орон нутгийн сонгуулийг аюулгүй, амар тайван үеийнх шиг налгар зохион байгуулж, үнэмлэхүй ялалтаар улс даяар ноёрхлоо тогтоосон эрх баригч МАН "амтшаад" Ерөнхийлөгчийн сонгуулийг ч мөн цар тахлын цаг бусын үхэл хагацал дундуур, УИХ, Засгийн газар, төрийн бүх шатны байгууллагуудыг дайчлан зохион байгуулахад нь ард түмэн эсэргүүцээгүй. "Ерөнхийлөгч, УИХ, Засгийн газар нь нэг намаас бүрдсэн байвал аюулт цар тахлын эсрэг тэмцэхэд нь дөхөм болно, тэгж байж аюулыг хурдан гэтэлнэ" гэж бодсондоо Ерөнхийлөгчийн сонгуулийг хүлээн зөвшөөрч, МАН-д ялалтыг өгсөн хэрэг. Гэтэл ард түмний энэ итгэлээр ялалтад хүрмэгцээ цар тахалтай тэмцэх ажлаа цалгардуулж, УИХ, Засгийн газраараа нийлээд баяр ёслолын байдалтай болцгоочихлоо. 

Тэдний хувьд Ерөнхийлөгчийн тангараг өргөх ёслолийг хэрхэн сүр жавхаатай зохион байгуулах, МАН-ын шинэ даргаар хэнийг томилох, Ардын хувьсгалын 100 жилийн ойн медалийг ямар загвараар хаана хийлгэх, хэн хэнд өгөх, улсын баяр наадамд борчуудыг оролцуулахгүйгээр баячуудад зориулан хэрхэн цахимаар хийх л тэдэнд сонин байгаа бололтой юм. Түүнээс биш ард түмэн аюулт тахлаар үхэх эсэх нь огт сонин биш байгаа л харагдаж байна.

           12 жилийн дараа анх удаа, тэгээд ч болоогүй 100 жилийн ойн дээрээ Ерөнхийлөгчтэй болсон нь тэдний хувьд тэмдэглүүштэй баяр байж болох ч, ууж, идэж, урдах овоорсон ажлуудаа огоорч огт болохгүй л юм. Бод доо, 13-хан хоногийн өмнө У.Хүрэлсүхийг Ерөнхийлөгч болоход нь өөрийнхөө ганц саналыг зориулаад алхаж явсан буурай ердөө хоёр, гуравхан хоногийн дараа цар тахлын халдвараар нас барчихсан байвал яах вэ гэж. Ерөнхийлөгчийн сонгуулиас хойш нас барсан 130 гаруй иргэний дотор У.Хүрэлсүхэд саналаа өгсөн иргэн ганц нэгээр тогтохгүй байсан гэдэгт итгэлтэй байна. Ийм байхад намаараа баяр наадам, зугаа цэнгэл яриад сууж байх нь зүйл нийцнэ гэж үү. Хоногт хэчнээн иргэн шавар ваартай чандар төдий болж байгаа нь тэдэнд огт хамаагүй хэрэг үү.