-МАН МОНГОЛЫГ ЖИЖИГ, ТОМ АЛЬ Ч НАМТАЙ ХУВААЛЦАХЫГ ХҮСЭХГҮЙ БАЙГАА ЮМ БАЙНА. ӨӨРСӨДТЭЙ НЬ ӨРСӨЛДӨХ БОЛОМЖТОЙ ГЭЖ ҮЗСЭН БҮХ НАМАА ИЛ ДАЛДААР ӨӨРТӨӨ УУСГАЖ, УЛМААР МОНГОЛЫГ “МАН-ЫН УЛС” БОЛГОХ НЬ Л ТЭДНИЙ АЛСЫН АГУУ АМБИЦ АЖЭЭ-

        Одоогоос таван жилийн өмнө 2016 оны гуравдугаар сарын 1-нд МАХН-ын дарга Н.Энхбаяр, МАН-ын дарга М.Энхболд нар Жанжин Д.Сүхбаатарын хөшөөнд цэцэг өргөж, түүхт 95 жилийн ойгоо сүр дуулиантайгаар хамтдаа тэмдэглэж байлаа. Тэгвэл уржигдар түүх давтагдаж, МАН-ын дарга У.Хүрэлсүх, МАХН-ын дарга Н.Энхбаяр нар түүхт 100 жилийн ойгоо хамтдаа тэмдэглэлээ. 10 жилийн тэртээ МАН, МАХН болж хуваагдсанаасаа хойш хоёр дахь  удаагаа хамтдаа ойн баяраа тэмдэглэсэн нь энэ. Өөрөөр хэлбэл, МАН, МАХН 90 жилийн ой дээрээ салаад, 95 жилийн ой дээрээ эргэж эвлэрсэн ч сар ч бололгүй салсан. Уржигдар буюу 100 жилийн ой дээрээ дахин эвлэрч, ойн баяраа хамт тэмдэглэлээ. Харин 90,95,100 жилээс бусад ойнуудаа тэд “Эх орончдын өдөр”-ийг, Жанжин Д.Сүхбаатарын хөшөөг, цэцэг өргөх морь цагийг хүртэл “булаацалдаж” тэмдэглэсэн. МАН, МАХН-ын таван жилд нэг тохиодог эл эвлэрлийн цикл цаашид үргэлжлэх үү, эсвэл үүгээр эцэслэж, эвлэрэх үү гэдэг л сонин байна. 

Анхны эвлэрэлт буюу 2016 оны гуравдугаар сарын 1-нд МАН-ын дарга М.Энхболд, МАХН-ын Н.Энхбаяр нар “тэврэлдэн” уулзаж, 95 жилийн ойн баяраа хамтдаа тэмдэглэсэн үйл явдлын цаад зорилго нь угшил нэгт хоёр намаа нэгтгэх байсан. Тийм ч учраас албаар 2016 оны УИХ, орон нутгийн сонгуулийн өмнө эвлэрсэн. Өөрөөр хэлбэл, МАН, МАХН эвлэрний эхлэл болгож 2016 оны сонгуульд нэгдэж оролцохоор тохиролцсон ч Н.Энхбаяр, М.Энхболд нар сонгуульд нэр дэвшүүлэх хүмүүсийнхээ тоон дээр тохиролцож чадалгүй маргаж, дахин хоёр тийш болцгоосон юм билээ. Улмаар уг сонгуульд М.Энхболдын МАН үнэмлэхүй ялалт байгуулж, Н.Энхбаярын МАХН хоосон шахуу хоцорсон. Хоёр, гуравхан мандатны “шунал”-аасаа болж МАН-ын буюу М.Энхболдын эвлэрлийн саналаас татгалзсан Н.Энхбаяр алтан боломж алдсандаа амаа барьж, хоосон халаглаж явсаар өдий хүрч байгаа нь нууц биш. Хэрвээ МАХН-ын дарга М.Энхбаяр тэр үед л МАН-тай нэгдчихсэн бол өдийд яаж “томорчихсон” байх нь тодорхой. 

МАН ирэх Ерөнхийлөгчийн сонгуульд МАХН-ын үнэнч сонгогчдийг ашигласныхаа төлбөрт Н.Энхбаяр болон түүний “залууст” хэд хэдэн “том суудал” өгөхөөр тохиролцсон “хов” сонсогдож эхлээд байгаа.  Ерөнхийлөгчийн суудлыг авч л байвал тав, арван албан тушаалаар МАХН-д “төлбөр төлөх” бол МАН-д юу ч биш. Албан тушаалыг чихэр гэвэл МАН-д авдар авдраараа бий. 

Яах вэ, МАХН энэ удаагийн Ерөнхийлөгчийн сонгуульд МАН-тай нэгдэхгүйгээр сүүлчийн хүчээ шавхаад, С.Ганбаатараа нэр дэвшүүлээд 2017 оны алдаагаа давтах боломж мэдээж нээлттэй байгаа. Гэхдээ С.Ганбаатар өрсөлдөөд санал хуваана уу л гэхээс ялалт байгуулах боломж хомс. Хэрвээ ялж чадахгүй л бол тус намд ойрын ирээдүйд ямар ч аврал байхгүй болно. 2017 онд л ялбал ялж болох байсан. Гэхдээ одоо 2021 он, С.Ганбаатарын сэргэн мандалт дууссан. Үүнийг Н.Энхбаяр С.Ганбаатарт тайлбарласан боловч хариуд нь “Би чадна, надад итгэ” гэсэн бололтой юм билээ. Түүгээр ч зогсохгүй намын дэд даргын хувьд МАН-тай нэгдэхийг хатуу эсэргүүцэж буйгаа хэлсэн гэх. Харин Н.Энхбаярын хувьд алдах эрх, улс төрийн карьер, сэргэн мандах боломж үлдээгүй учраас С.Ганбаатарыг хаяад ч хамаагүй намаа МАН-тай нэгтгэхэд бүхий л анхаарлаа хандуулж буй гэх мэдээлэл байна. 

Түүнчлэн орхиж боломгүй нэг өнцөг байна. МАН-ынхан АН-ыг хуучин дарга С.Эрдэнээр нь, ХҮН-ыг дарга Т.Доржхандаар нь дамжуулан өөрсдөдөө уусгах төлөвлөгөө хэрэгжүүлж буй тухай бор шувуу аль  эртнээс л “ниссэн”. Түүнчлэн МАХН-ыг мөн л даргаар нь дамжуулан өөртөө уусгахаар санаа шулуудсан нь ийнхүү ил болж байна. Эсрэг намуудаа өөрийн талд уусгах МАН энэ төлөвлөгөө удахгүй болох Ерөнхийлөгчийн сонгууль, тэр тусмаа Ерөнхийлөгч Х.Баттулгаас айсандаа хийж буй үйлдэл биш л болов уу. Өөрөөр бол, МАН Монголыг жижиг, том аль ч намтай хуваалцахыг хүсэхгүй байгаа юм байна. Өөрсөдтэй нь өрсөлдөх боломжтой гэж үзсэн бүх намаа ил далдаар өөртөө уусгаж, улмаар Монголыг “МАН-ын улс” болгох нь л тэдний алсын агуу амбиц гэж харагдаж байна.