Улсаараа түлш, шатахууны хомстолд орж, "шар"-аа асаачихаад байгаа хүнд үед эрчим хүчээ хязгаарлуулах том аюул тулгарлаа. Бүр Эрчим хүчний сайд нь хэдэн өдөр, долоо хоног, сараас ч биш цагийн дараагаас ч цахилгаан хязгаарлахыг үгүйсгэхгүй гээд толгой сэгсэрч байхыг нь харав. Хэзээ мөдгүй унтарчих гээд байгаа машиндаа "балга" шатахуун хийх гэж хэдэн эгнээгээрээ оочерлож байсан хүн бүр лаа, чүдэнз, ахуйн газны эрэлд гарч, шүдээ зуун "Өвлийг яаж давна даа" хэмээн шагширч байхыг нь үздэг юм байна.

-ОРОСЫН ХОЁР ЦАХИЛГААН СТАНЦАД ГЭМТЭЛ ГАРСАНТАЙ ХОЛБООТОЙГООР МОНГОЛД НИЙЛҮҮЛЭХ ЭРЧИМ ХҮЧЭЭ БАГАСГАХ БОЛСОН ГЭВ-

ОХУ-ын хэд хэдэн цахилгаан станцад гэмтэл гарсантай холбоотойгоор Монгол Улсад нийлүүлдэг 345 МВт цахилгаан эрчим хүчийг 150 МВт болгож, тодорхойгүй хугацаагаар хязгаарлахаа мэдэгдсэн. Энэ тухай асуудлаар Засгийн газрын ээлжит хуралдаанд хэлэлцэж, Эрчим хүчний сайд Б.Чойжилсүрэн Улаанбаатар хот болон төвийн бүсийн зургаан аймаг, 150 гаруй сумдаар цахилгааны хязгаарлалт хийх болсон талаар мэдээлсэн. Сайдын өгсөн мэдээлэлтэй холбоотойгоор цахим сүлжээнд маргаан үүсэж, олон нийт түлш, шатахууны асуудлаасаа гадна эрчим хүчээ хязгаарлуулж, хүйтэн өвлийг хөлдөлгүй давах хүнд даваатай нүүр тулна гэхээс эмээж байв. Харин Засгийн газраас ОХУ Монголд нийлүүлэх эрчим хүчээ ойрын хугацаанд хязгаарлахгүй болсон талаар мэдэгдэж, иргэдийг санааг амраах. Ийн мэдэгдэл хүргүүлсэн Монгол, Оросын Засгийн газар хоорондын комиссын Оросын хэлтсийн дарга А.Козлов нь ОХУ-ын Байгалийн нөөц, экологийн сайд гэнэ. Тиймээс ч эрчим хүч ойрын хугацаанд хязгаарлахгүй гэсэн баттай хариу өгсөн ч тэр "ойрын хугацаа" гэдэг нь хэдий болтол үргэлжилж, Б.Чойжилсүрэн сайдын хэлсэн өнөө, маргаашгүй хязгаарлах үе нь хэзээ ирэх бол гэхээс иргэд эмээж байна.

                    Монгол Улс эрчим хүчээ ОХУ-ын цахилгаан станц, тэр дундаа Иркутскэнерго эрчим хүчний систем, Буриадын эрчим хүчний системийн Галуут нуурын станцаас авдаг. Харин Оросын тал манайд нийлүүлдэг 345 МВт эрчим хүчээ 150 МВт болгохдоо дээрх хоёр цахилгаан станцад гэмтэл гарсан хэмээн мэдэгдсэн байна. Түүнчлэн хэд хэдэн цахилгаан станцдаа шинэчлэл хийж байгаатай холбоотойгоор ОХУ дотоодынхоо эрчим хүчийг хангаж, Монгол руу нийлүүлэх эрчим хүчээ хязгаарлахаар болсон. Одоогоор олон улсын сайтууд дээр Иркутскэнерго, Галуут нуурын станцад гэмтэл гарсан тухай мэдээлэл гараагүй талаар эх сурвалжууд мэдээлж байна. Магад үүнтэй ч холбоотойгоор Эрчим хүчний дэд сайдаар ахлуулсан Ажлыг хэсэг өчигдөр ОХУ-ыг зорьж, үүссэн нөхцөл байдалтай танилцахаар явсан аж.

Ж.ДЭЛГЭРСАЙХАН: ШАТАХУУНЫ ХОМСТОЛ, ЭРЧИМ ХҮЧНИЙ ХЯЗГААРЛАЛТЫН УЛМААС МАКРО ЭДИЙН ЗАСАГ ЗОГСОХОД ХҮРЭХ НЬ

Цахим сүлжээнд түлш, шатахууны хомстол, эрчим хүчний хязгаарлалтад орсноор манай эдийн засаг, нийгэмд олон сөрөг нөлөө үзүүлж болзошгүй тухай мэдээлэл гарч байна. Үүнтэй холбогдуулан цахилгааны хязгаарлалт, шатахууны хомстол Монголын эдийн засагт хэрхэн нөлөөлж, ямар эрсдэл хүлээх талаар эдийн засагч Ж.Дэлгэрсайханаас байр суурь сонслоо.

                     Тэрбээр "Монгол Улс дотооддоо эрчим хүчний эх үүсвэрээ бэлдээгүйн гор гарч байна. Бидэнд эрчим хүчээ бэлдэх, хангах бүрэн боломжтой байсан ч ашиглаж чадаагүй. Харин одоо эрчим хүчний хязгаарлалтад орсноор макро эдийн засаг том эрсдэл хүлээж, зогсоход хүрэх нь. Зөвхөн эдийн засаг ч бус цахилгааныг өвлийн улиралд хязгаарлаж байгаа нь том асуудал. Түүнчлэн түлш, шатахууны хомстол нь манай орныг уул уурхайн салбараас эхлээд эдийн засгийг зогсолтод оруулах эрсдэлтэй. Манай уул уурхайн нефтийн салбараас хамааралтай гэж болно. Түлш, шатахуун байж бид уул уурхайн үйл ажиллагаагаа явуулна. Харин уул уурхайн салбар, энэ салбарын бүтээгдэхүүн Монголын эдийн засаг, төвийн дийлэнх хувийг бүрдүүлдэг. Гэтэл уул уурхайн салбар ид үйл ажиллагаагаа явуулж байх ёстой энэ үед түлш, шатахууны улмаас зогсолтод орж байгаа нь эдийн засгийг зогсоож байгаагаас өөрцгүй. Цаашлаад, түлш, шатахууны хомстол, эрчим хүчний хязгаарлалт удаан үргэлжилбэл эдийн засагт савлагаа үүснэ. Тиймээс нийгэм, эдийн засгаа хамгаалахын тулд ямар нэг байдлаар аргалахгүй л бол авралгүй болно" гэсэн юм.

-МОНГОЛД ЯМАР БОЛОМЖ ҮЛДСЭН БЭ-

Хэрэв Монгол, Оросын Засгийн газар хоорондын комиссын Оросын хэлтсийн дарга А.Козловын хэлсэн "ойрын хугацаа" дуусах үед Монгол эрчим хүчний хязгаарлалтад орно. Өмнөхөөсөө хоёр дахин бага эрчим хүч хэрэглэж, улсын хэмжээнд цахилгаанаа хязгаарлана. Харин энэ үед эрчим хүчний ачааллыг багасгах нэг том бүтээн байгуулалт нь саяхнаас ашиглалтад орсон батарей хуримтлуур гэнэ. Батарей хуримтлуур нь 80МВт хүртэл эрчих хүч үйлдвэрлэх боломжтой бөгөөд ОХУ-аас нийлүүлэх 150МВт эрчим хүч дээр 80МВт нэмэгдэж, цахилгаан хангах боломжтой юм байна.

                 Монгол Улс эрчим хүчний хязгаарлалтад орох болсон талаар мэдээлсэн гаднын мэдээллийн сайтууд "Монгол оргил ачааллын үед цахилгаан хязгаарлахаас гадна жижиглэнгийн худалдаа, бизнес эрхлэгчдийн ажлын цагийг багасгаж, нийтээрээ эрчим хүчээ хэмнэх арга хэмжээ авах боломжтой" хэмээн мэдэгджээ. Харин цахилгаан хязгаарлаж, тасарсан үед харилцаа, холбоо тасалдаж, гэрлэн дохиолол буруу ажилласнаас замын хөдөлгөөний асуудал, галт тэрэг зэрэг тээврийн хэрэгсэлд нөлөөлж, оппортунист гэмт хэрэг нэмэгдэж болзошгүй аюул заналхийлж байгаа гэв.