ИРГЭД: САЙЖРУУЛСАН ТҮЛШНИЙ ЧАНАР УЛАМ МУУДАЖ, ҮНЭ НЭМЭГДЭЖ, ОЛДОЦ ХОВОР БАЙНА

2025-10-27, 764

Сайжруулсан шахмал түлш борлуулах цэг ховордож, иргэд гэртэйгээ ойрхон газраас түлш олж авна гэдэг бараг л аз үзсэн хэрэг болжээ. Учир нь шахмал түлш борлуулах цэг дээр түлш ирсэн даруйд иргэд олноор нь нөөцлөн авч, дорхноо дуусаж байгааг түгээгчид онцолж байна. Нийслэлийн хэмжээнд шахмал түлш худалдаалах 400 цэг ажиллаж байгаа бөгөөд нэг хороонд 2-3 цэг ажиллаж байгаа ч хүрэлцэхгүй, хангалтгүй байгааг иргэд ярьж байна. Зарим иргэдийн хувьд нүүрсний цэг нь гэрээс нь хол учир очих гэсээр байтал оочер дараалалд орж, амжиж түлшээ авч чадахгүй буцдаг, зарим орой дан мод түлээд хонох нь ч бий гэнэ.

Чингэлтэй дүүргийн 12 дугаар хорооны иргэн Н "Манайхтай хамгийн ойрхон түлшний цэг хайлааст руу өгсөх зам дагуу байрлах Модны гялгар зах. Орой уг нь түлш буудаг юм. Заримдаа авч амжихгүй байтал дуусчихсан байдаг. Ганцхан цэгтэй болохоор түлш олдохгүй хүнд байна. Мөн сайжруулсан шахмал түлш хөх ууттай ирдэг болсон. Өмнөхөөсөө бага хэмжээтэй, муухай үнэртэй, жаахан түлэх явцад хоолой хорсгосон хэвээр байна" гэв. Харин иргэн Ч -ийн хувьд "Шахмал түлшийг өмнө нь нэг уутыг 3500 төгрөгөөр авдаг байсан бол одоо 5000 төгрөг болчихсон. Манайх 17, 32-ын буудал орчмоос түлшээ авч чаддаггүй, хоцорчихдог учир Сонгинохайрхан дүүрэгт байдаг дүүгийндээ хэлчихдэг. Тэднийх тэндээ олон жил болсон болохоор түлш зардаг хүнээ сайн танина. Тэгээд л өөрсдийнхөө нүүрсийг авахдаа манайд 20-30 шуудайг авчихдаг. Тэгэхээр нь машин хөлсөлж авчирна даа. Одоогоор манайх иймэрхүү нөхцлөөр түлшээ авч байна. Цаг агаар харьцангуй дулаан тулдаа түлш орох нь бага байна. Одоо хүйтрээд, ес эхлэхээр түлш их орно. Тиймээс түлшнийхээ борлуулах цэгийг нэмэх л хэрэгтэй" гэнэ.

Биднийг өчигдөр 18:00 цагийн үед Чингэлтэй дүүргийн 13 дугаар хорооны Модны гялгар зах, сургуулийн 33-652б цэгүүдэд очиход түлш дууссан байлаа. Борлуулагч "Түлш дууссан. Оройдоо ирэх байх. Заримдаа тээвэр их орой ирдэг. Түлш хэдэн цагийн үед ирдгийг мэддэг хүмүүсийн хувьд амдаад хүрээд ирдэг. Тийм нөхцөлд бид мэдээж ирсэн иргэддээ худалдаална. Харин түлш дуусаагүй өдөр бол 22:00 цаг хүртэл борлуулна. Ихээр авч байгаа хүмүүсийг боль гэж хэлэх аргагүй. Түлшээ нөөцөлж авах тухайн хүний эрх" гэлээ.

Үргэлжлүүлэн бид иргэд карт, аппликэйшнээр хэрхэн худалдан авалт хийж байгаа талаар түгээгчээс асуухад "Картаар өгдөг байсан нь амар байна. Одоо тэр аппликэйшний учрыг олоход их хэцүү. Зарим нь утсан дээрээ татаж ч мэдэхгүй, картаа бариад хүрээд ирнэ. Тиймээс иргэний үнэмлэхний кодоор үйлчилгээ авах нь их байна. Аппликэйшн суулгаж татлаа гэхэд овоо цаг орчихоод байгаа юм" гэж байв. Иргэд болон шахмал түлшний борлуулах цэгийн хувьд ийм нөхцөл байдалтай байна.

Харин энэ талаар Нийслэлийн Засаг дарга бөгөөд Улаанбаатар хотын захирагч Х.Нямбаатар "Нийслэлд зарим борлуулалтын цэгт үдээс хойш түлш дуусаж, хомсдол үүсэж байна. Түлш борлуулж байгаа 400 цэг бий. Түлш борлуулалтын цэгүүдэд өдөрт 5000 тонн түлш борлуулж байсныг хоёр дахин нэмэгдүүлж 10 мянга болгон, нийлүүлэлтийг нэмэгдүүлнэ. Өөрөөр хэлбэл нийлүүлэгчийн зүгээс өдөрт хоёр удаа тээвэрлэлт хийх юм. Хэдийгээр өмнөх жилүүдийн дундажтай адил хэмжээгээр түлшний нийлүүлэлт хийгдэж байгаа ч иргэд хүйтрэхээс өмнө түлшээ нөөцлөх хандлагатай байна. “Хотула” аппликейшнээр өрхийн нэг гишүүн бүртгүүлж, түлшээ авна гэж тооцож байсан ч нэг өрхөөс 2-4 хүн бүртгүүлж түлш авч байна. Иймээс бүртгэлийг хянаж, нэг өрхөөс нэг л гишүүн түлш авч байхаар тохируулснаар зохиомол хомсдол үүсэхгүй. Борлуулалтын цэгүүдийн нийт түлшний 50 хувь нь хуучин мидлинг, 50 хувь нь шинэ түлш байна. Арванхоёрдугаар сарын сүүлчээр 100 хувь хагас коксон шахмал түлш буюу шинэ түлш борлуулна. Энэ үед агаарын чанар ямар түвшинд очсон байна вэ гэдгийг бодитоор хэмжиж олон нийтэд танилцуулна" гэж мэдээлсэн.

ИРГЭД: САЙЖРУУЛСАН ТҮЛШНИЙ ЧАНАР УЛАМ МУУДАЖ, ҮНЭ НЭМЭГДЭЖ, ОЛДОЦ ХОВОР БАЙНА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.