Ж.БАТЗАНДАН МАН-ЫНХНЫ "ХААН МЭТ ӨРГӨМЖЛӨӨД, ХАРЦ МЭТ НУХЧИН ДАРДАГ АРГА"-Д, МУУХАЙГААР ХЭЛБЭЛ ХАВХАНД ӨӨРӨӨ Л ГҮЙЖ ИРЖ ОРСОН ХҮН

        Ж.Батзандан нэгэн цагт Ардчилсан намаас хөөгдөж, МАН-ын гишүүдтэй нийлж, улс төрийн "бослого" гаргаж байлаа. Тухайлбал, хөхөө өвлийн хүйтэнд “Шударга тав” нэртэй Л.Оюун-Эрдэнэ, Х.Нямбаатар, Л.Болд, Т.Аюурсайхан нартай төв талбайд өргөн хэмжээний жагсаал зохион байгуулж, М.Энхболдыг намын дарга, Ерөнхий сайдын суудлаас нь буулгаж явсан үе түүнд бий. Гэхдээ энэ үйл явдлаас өмнөхөн тэр МАН-тай заргалдагч, гол сөрөг хүчин, хариуцлага нэхэгч, элдэв хэл ам татлагч нь байлаа. АН-ын тууштай дэмжигч, халуун амь, бүлээн цусаараа хамгаалан өмгөөлөгчдийн нэг явсан өдрүүд түүнд бий. Гэсэн ч тэр нэг л өдөр МАН-ынхантай сүлбэлдэн, тэдний жадны үзүүр, сумны зэв болсон байв. Ингээд зогсохгүй намын нөхдийнхөө элдэв булхайг илчилж, МАН-ын дарга, Монгол Улсын Ерөнхий сайд М.Энхболдыг хугацаанаас нь өмнө огцруулах кампанит ажлыг оройлон гүйцэтгэснийхээ төлөө Тусгаар тогтнолын ордны аль ч өрөөгөөр дуртай цагтаа, дурын юмаа яриад орж, гарах эрхтэй болсон. Хоржоонтой нь, МАН түүнийг яаж ч үнэнч аашилсан УИХ-д нэр дэвших тойрог өгөөгүй бөгөөд Австрали дахь Элчин зөвлөхийн албан тушаалд томилон, Монголын улс төрөөс дэвшүүлэн зайлуулсан гэхэд болно.

         Тэндээ ч нэг их удсангүй, ажлаа өгч, эх орондоо ирмэгцээ “Шинэ хувьсгал” нэртэй ном хэвлүүлж, түүнийгээ төрийн түшээдэд тараагаад, тун завгүй явж байв. Уг номдоо улс төрийн 18 хувьсгалын талаар бичсэн гэх. "Оройтсон борооны араас цув нөмрөв" гэдэг шиг "Улсаа хөгжүүлэхэд хувьсгал хэрэгтэй" хэмээн ярьж явсан УИХ-ын гишүүн асан Ж.Батзандан хамаарал бүхий этгээд болох "ШИНЭ" намын дэд дарга Г.Аюулгүйнхээ Хөгжлийн банкнаас Капитал банкаар дамжуулан 12 тэрбум төгрөгийн зээл аваад, найдваргүй зээлдэгчдийнх нь нэг болж, улмаар дампууралд нь гол нөлөө үзүүлсэн байж болзошгүй гэх үндэслэлд нь хамааралтай болж, хамт ачигдчихлаа. Болж өнгөрсөн үйл явдлуудаас харахад тэр Г.Аюулгүйтэй холбоотойгоор ачигдахгүй байж болох байсан ч байж мэднэ. Учир нь, Ж.Батзандан 461 дүгээр саатуулах анги руу ачигдахаасаа ердөө 24 цагийн өмнө хэвлэлийн хурал зарлан "Ерөнхийлөгчид хандаж хэлэхэд дүүтэй нь муудчихаад ахыг нь шоронд хорихоо боль. Би таныг ядарч явахад олон удаа тусалж байсан. Ж.Эрдэнэбатын Засгийн газрын Шадар сайд байхад би таныг өмөөрч байлаа. 2018 онд АН-ын гурван гишүүнтэй нийлж таны Засгийн газрыг авч үлдэж байлаа. Та өнөөдөр миний тусыг мартсан байж болно. Гэхдээ Монголоо өөрчлөхийн төлөө, шударга ёсыг тогтоохын төлөөх эцсээ хүртэл явна гэсэн амлалтаа биелүүлэх үү. Бидэнтэй нэгдээч гэж танаас хүсэж байна. Ерөнхийлөгч сөрөг хүчний шүүмжлэлд маш эмзэг ханддаг болсон байна. Тийм учраас ядарч явахад түшиж явсан дүүгийн хувьд задарч явахад хатуухан шанаа өгье гэж бодоод өчигдөр хатуухан үг хэлсэн", "Чи миний ахыг шоронд оруулна уу, шонд өлгөнө үү дураараа бол" гэхээс гадна нүүр номоороо Ерөнхийлөгчид хандан шууд дамжуулалт хийж, Ерөнхийлөгч У.Хүрэлсүхтэй бичсэн мессэжээ олон нийтэд цацсан билээ. Энэ бол гуравхан намрын өмнө ахан дүүс байсан МАН-ын томчуудтайгаа тэр түнжин хагарч, нэгэнт хаягдсаны илрэл яах аргагүй мөн билээ. Олон нийт түүнийг саатуулсан үйл явдлыг "Ахынхаа хэргийг наймаалцахын тулд Ерөнхийлөгчийг шантаажлахыг оролдоод бүтсэнгүй", "Ерөнхийлөгчийн ямар нэг мэдээллийг мэдэж байгаа учраас том дуугарч байсан ч түүнийг бариад хорьчихлоо" гэх мэт янз янзаар ярьж, таамаглацгааж буй. Аль нь ч байсан тэр үнэхээр Хөгжлийн банкнаас их хэмжээний зээл эрх мэдлээ ашиглан аваад, эргүүлэн төлөөгүй өнөөдөрт хүрсэн бол хууль ёсны дагуу хариуцлагаа хүлээх нь зүйн хэрэг. 

          Гаслантай нь, цагтаа М.Энхболдын Засгийн газрыг унагахаар МАН-ынханд туслан Тусгаар тогтнолын ордон, Төрийн ордон хоёрын хооронд хөл цуцахгүй жирийлгэж явсан үеийнх шиг нь анд нөхөд түүнд нэг ч үлдээгүй бололтой. Нөгөө талаар Ж.Батзандан МАН-ынхны "Хаан мэт өргөмжлөөд, харц мэт нухчин дардаг арга"-д, муухайгаар хэлбэл хавханд өөрөө л гүйж ирж орсон хүн. МАН-аас санаачилсан "Шударга тав"-ын нэг хэмээн цагтаа өргөмжлөгдөж, бараг л баатар болохын наагуур даналзаж явсан Ж.Батзандан одоо банзан орон дээр юу бодож суугаа бол.