МАН-ынхан Ерөнхийлөгчийн сонгуулиас өмнө дотоод асуудлаа шийдэхээр төрийн томчуудыг том, жижиггүй шалгаж, хүчтэй фракцуудыг тараах ажиллагаагаа улам бүр идэвхижүүлж эхэлжээ. Тэр тусмаа халуун намраар эхэлсэн улс төрийн зодооноо дарж, нэг цул болох даалгавар авсан МАН шинэ удирдлагууд сандарч эхэлсэн гэнэ.

       Өөрөөр хэлбэл, өнгөрсөн дөрвөн жилийн хугацаанд МАН-д хүчээ авсан Ерөнхий сайд асан Л.Оюун-Эрдэнийн фракцынхныг шахаж, эхэлсний хоморгонд хотын дарга Х.Нямбаатарын суудал ч ганхаж эхлээд байна. Тиймдээ ч сүүлийн үед хотын дарга Х.Нямбаатартай холбоотой асуудлыг сөхөж, сошиалд бороолох ажиллагаанууд өндрөө авч эхэлснийг гадарлаж буй биз ээ. Тэр тусмаа он гарсаас хойш Нийслэлийн Засаг дарга бөгөөд Улаанбаатар хотын захирагчийн албанд санаархагчдын улс төрийн компанит ажил улам бүр идэвхижиж, Х.Нямбаатарын оронд томилогдох хэд хэдэн улстөрчийн нэр ч зарлагдаж амжаад байна.

     Тухайлбал, хотын даргад одоогийн Барилга хот байгуулалт, орон сууцжуулалтын сайд Э.Бат-Амгалан, МАН-ын генсек Я.Содбаатар нарын нэрс хүчтэй яригдаж эхэлсэн. Тэдний хэн хэн нь хотын дарга  болохгүй гэдгээ албан ёсоор мэдэгдсэн. Тэр тусмаа МАН-ын генсек Я.Содбаатарын хувьд ирэх сонгуульд намынхаа “гал тогоог” удирдаж орох албан тушаалд орчсон учраас хотын даргад очихгүй гэдгээ намынхаа дотор албан ёсоор мэдэгдсэн гэх. Харин нийслэлийн МАН-ын даргын төлөө хотын дарга Х.Нямбаатарыг огцруулахыг дэмжих хүн МАН-д ганц нэгээр тогтохгүй бөгөөд дараагийн хувилбарыг дэмшүүлэх ажиллагаа эхэлсэн сурагтай. Тиймээс шинэ оны эхэнд Татварын дарга нарын тансаглалаар далимдуулж, хотын дарга Х.Нямбаатарыг “харуулах” ажиллагаанууд улам бүр эрчимжиж эхэлжээ. Нэмээд нийслэлийн Засаг дарга бөгөөд Улаанбаатар хотын захирагч Х.Нямбаатарын урагшгүй шийдвэрүүд түүний суудалд санаархагчдын олз болж эхэлснийг ч улс төрийн хүрээнийхэн сануулах болж.

       Тухайлбал, Хотын дарга Х.Нямбаатар татвар төлөгчдийн мөнгийг хувийн хэвшлүүдэд хөнгөлөлттэй болон хүүгүй зээлж, такси бааз байгуулах төсөл санаачилсан нь олны дүргүйцлийг түрүүлээд буй. Энэ талаар тэрбээр "Нийслэл такси бааз байгуулахгүй. Нийтийн тээврийг хөгжүүлэх сангаас хувийн хэвшилд зээл олгож стандартын шаардлага хангасан цэвэр, тохитой соёлтой үйлчилдэг такситай болъё гэсэн асуудлыг зохион байгуулалттайгаар бүлэглэн гуйвуулж, улстөржүүлж, олон нийтийг талцуулж байна. Энэ хотыг цэвэр цэмцгэр болгоё, хөгжүүлье, нийтийн тээврийг хүртээмжтэй болгоё гэхээр өчүүхэн хувийн эрх ашгаа нийтийн эрх ашгийн дээгүүр тавьж, бусдыг турхирч суудаг нөхдийг олон түмэн ус тосыг нь ялгаад ойлгочихно. Би бодлогоосоо ухрахгүй" хэмээн мэдэгдэж байлаа. Түүний энэ олны дүргүйцлийг хүргэсэн улс төрийн шийдвэрүүдэд ах нар нь хатуу анхааруулга өгсөн гэх бор шувуу ч МАН-ын байраар нисэх болжээ.

     Нэмээд нийслэлийн утааны асуудал шинэ долоо хоногийн сошиалын сэдэв болж эхэллээ. Өвөлдөө утаан хөшигтэй Улаанбаатарын агаарын чанарыг энэ өвөл сайжирсан гэх тоо баримтууд цахим орчинд санамсаргүй хэрнээ санаатай явуулж, хариуд нь хагас кокосжуулсан түлшний асуудал сөхөгдөж эхлэв. Нийслэлийн утааг буруулахаар БНХАУ-аас оруулж ирсэн хагас кокосжуулсан түлшний өртөг нийслэлийн төсөвт жин дарж, хотын дарга Х.Нямбаатарыг алба тушаалаас нь буулгах эмзэг цэг нь ч болж мэдэхээр байна. Цаашлаад хагас коксжуулсан түлшийг хязгаартай олгож, дүн өвлийн хүйтнээр түлшиндээ дарааллах иргэд олн байгааг ч хэвлэл мэдээллийн байгууллагууд хөндөж эхэлсэн. Хэдийгээр 2024 оны орон нутгийн сонгуулийн дараа нийслэлийн МАН-ын хороо хуралдаж, хотын даргаар Х.Нямбаатарыг улираан томилсон ч ирэх хоёрдугаар сараас шинэ хотын даргатай болох асуудлууд улс төрийн хүрээлэлд яригдах болсон байна. Өөрөөр хэлбэл, энэ Сар шинийн баярын өмнө МАН-ынхан нийслэлийн намын хороог хуралдуулах шахалтыг үзүүлж эхэлсэн гэх мэдээлэл бий. Тэгэхээр хотын дарга Х.Нямбаатарыг хоёрдугаар сард чөлөөлж мэдэх нь.