Эзэн Чингис хааны мэндэлсний 860 жилийн ойд зориулан Монгол Улсын Ерөнхийлөгч Ухнаагийн Хүрэлсүхийн ивээл дор “Чингис хааны ертөнц ба Монгол судлал” сэдэвт цогц арга хэмжээ нээлтээ хийлээ. Уг арга хэмжээ нь наймдугаар сарын 5-10-ны өдөр болох юм.

Энэ хүрээнд “Чингис хааны ертөнц ба Монгол судлал” олон улсын эрдэм шинжилгээний хурлыг зохион байгуулж, таван салбар хуралдаанаар 155 илтгэл хэлэлцүүлэх аж.

САЛБАР ХУРАЛДААНУУДЫГ:

• “Монголын түүх, угсаатны судлал”,
• “Монгол хэл, уран зохиол судлал”,
• “Монголчуудын соёлын ертөнц”,
• “Монголчууд ба гадаад ертөнц”,
• “Монголчуудын соёлын өв, археологийн судалгаа” сэдвээр зохион байгуулна.

Цогц арга хэмжээнд 14 орны 54 монгол судлаач оролцох бөгөөд үндсэн хуралдаан 2022 оны наймдугаар сарын 6-ны өдөр Төрийн ордонд болно.