• Өнөөдөр 2024-03-29

Ерөнхийлөгч Х.Баттулга спортын бүтээн байгуулалтын төслүүдтэй танилцлаа

2021-06-21,   496

      Монгол Улсын Ерөнхийлөгч Х.Баттулга Боловсрол, Шинжлэх ухааны сайд Л.Энх-Амгалангийн хамт нийслэлийн Хан-Уул дүүргийн  наймдугаар хороонд хэрэгжиж буй спортын бүтээн байгуулалтын төслүүдийн явцтай танилцлаа.

Тодруулбал, “Степпе Арена” ХХК-ийн хэрэгжүүлж буй “Мөрөөдөл биелэх-Мөсөн өргөө” төсөл, мөн нийслэлийн өмчит “Улаанбаатар Спорт менежмент” ХК-ийн захиалгаар хэрэгжүүлж буй “Зүүн Азийн Залуучуудын наадам-2023”, “Олон улсын Залуучуудын ногоон наадам-2025”-ыг хүлээн авах Спорт цогцолборын төслийн барилгын ажилтай танилцаж, мэдээлэл сонслоо. Төслүүдийн хүрээнд 3500 хүртэлх хүний багтаамж бүхий Монголын анхны битүү дээвэртэй спортын ордон, төрөл бүрийн спортын тэмцээнийг зохион байгуулах зориулалттай, 2100 хүний багтаамж бүхий спортын цогцолбор, 10 замтай усан спортын ордон, хөл бөмбөгийн талбай, техникийн төвийг цогцолбор хэлбэрээр нэг байршилд барьж байгуулж байна.

 
Бүтээн байгуулалтын ажлууд дэлхий нийтийг хамарсан цар тахлын улмаас удааширч, хэсэг хугацаанд саатсан ч өнөөдрийн байдлаар ажил хэвийн үргэлжилж байгаа талаар төслийг хэрэгжүүлэгчид Монгол Улсын Ерөнхийлөгчид танилцуулж байв. Дээрх төслүүд хэрэгжсэнээр Монгол Улс спортын салбарт олон улсын стандартад нийцсэн материаллаг баазтай болж, тив, дэлхий, бүсийн хэмжээний спортын тэмцээн, уралдааныг эх орондоо хүлээн авах боломжийг нээж буйгаараа онцлог юм. Улмаар Монгол Улсын үндэсний шигшээ багуудын өрсөлдөх чадварыг олон улсад сайжруулах, тамирчдын амжилтыг ахиулах, ялангуяа, өвлийн спортыг хөгжүүлэх үндэс суурийг тавих, цаашлаад спортын салбарын хөгжлийг олон улсын түвшинд хүргэх зэрэг ач холбогдолтой.
 
Түүнчлэн, биеийн тамир, спортын салбарын материаллаг баазыг бэхжүүлэх нь хүүхэд залуусын дунд спортын соёлыг дэлгэрүүлэх, эерэг хандлагатай, тууштай, хөдөлмөрч залуу үеийг бэлтгэх, спортын хүмүүжлээр дамжуулан шилжилтийн насны хүүхдүүдийн дунд гарч буй гэмт хэргийн тохиолдлыг бууруулах, хорт зуршлаас ангид байлгах зэрэг үр нөлөөтэй. Залуусын зүгээс ч спортын салбарыг төрөөс бодлогоор дэмжих, чөлөөт цагаа зөв, боловсон өнгөрүүлэх боломжийг бүрдүүлсэн материаллаг баазыг бий болгох талаарх санал хүсэлтийг олон удаа ирүүлж байсан ч өнөөг хүртэл дорвитой арга хэмжээ авааагүй байсан юм.
 
Ийм учраас Монгол Улсын Ерөнхийлөгч Халтмаагийн Баттулга залуусын хөгжлийг дэмжих эдгээр төслүүдийг амжилттай хэрэгжүүлж дуусгах нь онцгой чухал байгааг тэмдэглэж, бодлогын дэмжлэг үзүүлж, хамтран ажиллахыг Боловсрол, Шинжлэх ухааны сайд Л.Энх-Амгаланд захилаа.
 

Ерөнхийлөгч Х.Баттулга спортын бүтээн байгуулалтын төслүүдтэй танилцлаа
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188