УИХ-ын ээлжит чуулганы хуралдаан өнөөдөр болж байна.

    Энэ үеэр УИХ-ын гишүүн Ж.Чинбүрэн "Бид өнөөдөр урт хугацааны буюу "Алсын хараа-2050", дунд хугацааны буюу 2021-2025 онд хөгжүүлэх үндсэн чиглэл, богино хугацааны буюу 2024 оны жилийн төлөвлөгөө гэх гурван баримт бичгийн тайланг сонсож байна. Эдгээр баримт бичиг хоорондоо хэрхэн уялдаж байгаа вэ. Үүнд Аудитын газар хариулт өгнө үү. Тэр дундаа эрүүл мэндийн бодлогын хувьд харьцуулсан дүгнэлт хэрхэн хоорондоо уялдаатай байна. 2024 оны ажлын төлөвлөгөөнд оруулсан хэчнээн үзүүлэлтүүд Эдийн засаг, хөгжлийн яамнаас хасагдсан бэ. Тухайлбал, бид "Алсын хараа-2050" бодлогодоо монгол хүний дундаж насыг 82 болгож, хүн амын өсөлтөө таван сая болгоё гэж байгаа. Гэтэл өнөөдөр зөвхөн 2024 оны тайланг аваад үзэхээр 6700 гаруй төрөлтөөр буурсан байх жишээтэй. Тэгэхээр бид наслалтаа уртасгаж чадах юм уу. Нярайн эндэгдлийг яагаад богино хугацааны бодлогодоо тусгахгүй байна вэ. Хоёрдугаарт, бид өнөөдөр гурван газрын тайланг сонсож байна. Бүгд дотроо өөр  дүгнэлттэй. Аль тоонд нь итгэх юм бэ. Гуравдугаарт, дотоодод худалдаж байгаа эмийн чанарыг олон улсын стандартад нийцүүлнэ гэсэн төлөвлөгөөг 100 хувь гэж аудитаас дүгнэсэн байна. Ямар баримтыг үндэслэн энэхүү дүгнэлтийг гаргасан бэ" гэв.

     Түүний асуултад Үндэсний аудитын газрын гүйцэтгэлийн аудитын дарга Д.Энхболд хариулт өглөө. Тэрбээр "Аудитын үнэлгээ болон хяналт хийж байгаа байгууллагуудын үнэлгээ хоорондоо зөрүүтэй байгааг асууж байна. Үндэсний аудитын газраас хоёрдугаар сарын 15-нд Засгийн газраас мэдээллийг аваад Засгийн газрын хяналт шинжилгээний үнэлгээний системд нь цугларсан мэдээллийг нотлох баримттай нь тулгаж хэрэгжилтийг гаргадаг байгаа. Тэгэхээр нийтдээ төлөвлөлтийн хэд хэдэн алдаа байна гэдгийг  Үндэсний аудитын газраас дүгнэсэн. 2024 оны жилийн хөгжлийн төлөвлөгөөнд хөгжлийн бодлого төлөвлөлт болон таван жилийн үндсэн чиглэл 2024 оны төлөвлөгөөний арга хэмжээг тулгахад нийт 234 арга хэмжээнээс 200 арга хэмжээ жилийн төлөвлөгөөнд тусгагдаагүй байсан. Мөн үндсэн чиглэлийн 243 арга хэмжээнээс 108 нь хүрэх түвшин тодорхойгүй асуудалтай байсан учир төлөвлөлтийн алдаатай асуудал дээр хариуцлага тооцох шаардлагатай, эрх зүйн орчныг нь нарийвчилж өгөх зөвлөмжийг УИХ-д толилуулсан" гэсэн юм.

Харин эмийн хангамж чанар хангалттай түвшинд хүрсэн болохоор 100 хувь гэж үнэлсэн үү гэх асуултад "2024 оны жилийн төлөвлөгөөн дээр эмийн чанар хяналтыг хэрэгжүүлэх системийг бий болгоно гэдэг дэд арга хэмжээ байсан. Тэрхүү системийг бий болгосон учир тухайн арга хэмжээг хэрэгжсэн гэж Үндэсний аудитын газраас үзсэн. Түүнээс бүхэлд нь 100 хувь гэж үнэлээгүй байгаа шүү гэдгийг хэлье" гэлээ.