Итали Улсын Жесоло хотод 2025 оны аравдугаар сарын 3-13-ны өдрүүдэд 23 дахь удаагийн таеквондо-гийн “ITF” холбооны дэлхийн аварга шалгаруулах тэмцээн болж өндөрлөсөн билээ. Тус ДАШТ-д дэлхийн 84 орны 1200 орчим тамирчин өрсөлдсөн юм. “Жесоло-2025” ДАШТ-д  амжилттай оролцож дэлхийн хошой аварга болсон Батбаярын Отгонбаяртай ярилцлаа. Тэрбээр таеквондо-гийн спортын ОУХМ цолтой. “ITF” холбооны олон улсын хар бүс, гуравдугаар дантай мастер багш юм. Б.Отгонбаяр 2015 оны дэлхийн аваргын мөнгөнтэй медальтай. 2016 оны Ази тивийн аварга. 2017 оны дэлхийн аваргаас мөнгөн медаль хүртэж байсан. 2021 оны “онлайн” дэлхийн аварга. 2023 оны ДАШТ-ий алт, 2025 оны ДАШТ-ий алтан медальтай.

-Таеквондо-гийн 2025 оны ДАШТ-д амжилттай өрсөлдөж, дэлхийн аваргын алтан медаль хүртсэнд баяр хүргэе.

      -Баярлалаа.

-Хэд дэх дэлхийн аварга шалгаруулах тэмцээндээ оролцов?

     -Би тав дахь удаагаа дэлхийн аварга шалгаруулах тэмцээнд оролцоод ирлээ.

-“Жесоло-2025” ДАШТ-ий тулааны төрөлд өрсөлдсөн үү?

     -ДАШТ-ий хувийн тулааны 71 кг-ын жинд болон багийн тулаанд өрсөлдсөн. Болзолт тулааны эрэгтэй, эмэгтэй хосын төрөлд оролцсон.

 –Миний дүү өөрийгөө манай уншигчдад танилцуулахгүй юу?

         -Намайг Батбаярын Отгонбаяр гэдэг.

 -Аль аймаг, хотод төрсөн, өссөн хүүхэд вэ?

        -Би Баянхонгор аймгийн Жаргалант суманд төрж, өссөн.

-Хэдэн настай байх үедээ таеквондо-гоор хичээллэж эхэлсэн бэ?

       -Олон улсын таеквондо-гийн спортыг 19 настай байхдаа сонирхсон. Их сургуулийн хоёрдугаар курсийн оюутан болоод анх хичээллэж эхэлсэн.

-Таэквондо-гийн анхны багш нь хэн бэ?

         -2013 онд анх МҮИС-д багшаар ажиллаж байсан Хойд Солонгос буюу БНАСАУ-ын мастер Мүн Сан Ил багштайгаа танилцаж, таеквондо-гийн анхны гараагаа эхэлж байлаа.

-Одоо хэд дэх жилдээ таеквондо-гоор хичээллэж байгаа вэ?

        -2013 оноос хойш гэхээр 12 дахь жилдээ тасралтгүй таеквондо-гоор хичээллэж байна.

 –Тулааны үед гол төлөв хөлийн ямар цохилтыг илүү сайн хийдэг вэ?

         -Тулааны үед булангийн шүүгч нарт аль болох оноогоо тод харагдуулахын тулд үсрэлттэй гарын цохилтыг ихэвчлэн хийдэг. Яагаад гэвэл би намхан учрааc өрсөлдөгч тамирчинд ойртож, ойрын зайнаас үсрэлттэй цохилтоор оноо авах тактикаар тулалддаг.

-Яагаад “ITF”-ийн таеквондо-гийн спортыг сонгож хичээллэх болсон юм бэ?

        -Манай оюутан ангийн найз маань "Таеквондод яв, өндөр болно" гэхээр нь сонирхон хичээллэж байлаа.

-Олимпын хөтөлбөрт орсон “WTF” холбооны таеквондог сонгох сонирхол байгаагүй юу?

     -Ер нь Хойд Солонгосын таеквондо их гоё спорт л доо. Хөл, гарын хосолсон цохилтуудыг хийж, дөрвөн мөчийг жигд ажиллуулдаг. Тийм учраас хөл, гарын цохилтыг хийж болдог таеквондог нь сонгосон.

–Одоо таеквондо-гийн хар бүс хэддүгээр дантай мастер болсон бэ?

       -Одоо “ITF” таеквондо-гийн хар бүс, олон улсын гуравдугаар дантай. Таэквондо-гийн спортын ОУХМ цолтой.

–МҮИС-ийн таеквондо-гийн багшаар олон жил ажилласан. Хэдэн жил болж байгаа вэ?

        -МҮИС-д тасралтгүй яг арван жил ажилласан.

 -Танай клуб ямар нэртэй юм бэ. “МҮИС”-ийн спорт сургалтын төв гэж явдаг юм уу?

        -2024 онд МҮИС-аас гараад нэг жил болж байна. Өөрийн найз дэлхийн аварга Бишгаравтай хамтарч “Хос-Аварга” тулааны урлагийн холбоог байгуулан ажиллаж байгаа.

-Олон улсын таеквондо-гийн Монголын холбоонд одоогоор хэдэн клубт хичнээн хүүхэд, залуус суралцаж байна вэ?

       -Олон улсын таеквондо-гийн Монголын холбооны 2025 оны УАШТ-д 23 клубийн 800 гаруй тамирчин оролцсон. Тэгэхээр манай таеквондо-гийн төрлөөр ойролцоогоор 1000-1500 гаруй хүүхэд, залуус хичээллэж байгаа болов уу.

-Өөрөө Монголын гар дээр суниалтын нэгдсэн холбооны тэргүүн байх аа. Тус холбоог хэзээ байгуулав?

       -Тийм ээ, 2019 онд Монголын гар дээр суниалтын нэгдсэн холбоог үүсгэн байгуулсан. Гар дээр суниах нь биеийн бүх булчинг ажиллуулдаг. Эрүүл мэндэд маш чухал дасгал, хөдөлгөөн. Мөн хаана ч хийж болдгоороо давуу талтай. Заавал тусгай заал, танхим, хэрэглэл материал шаардаад байдаггүй. Гэрийн нөхцөлд ч хийж болдог давуу талтай спортын төрөл байгаа. Олон сайхан монгол залуусаа эрүүл байлгахын тулд тус холбоог байгуулсан юм.

-Манай улсад гар дээр суниалтын спорт хөгжөөд хэдэн жил болж байгаа вэ?

    -Тус холбоо үүсгэн байгуулагдаад зургаан жил болж байна. Энэ хугацаанд олон хүн  сонирхож хичээллэдэг болсон. Мөн гэр бүлээрээ хичээллэдэг хүмүүс ч бий.

 -Гар дээр суниалтын нэг өвөрмөц төрлөөр геннисийн амжилт тогтоох оролдлого хийж байсан бил үү?

      -Миний тэр мөрөөдөл харамсалтай нь одоогоор биелээгүй л байгаа. Геннисийн амжилтыг шинээр тогтоох дөрвөн удаагийн  оролдлого хийсэн. Одоо дахин оролдлогоо хийхээр бэлтгэл сургуулилалтаа хийсээр л байгаа.

 -Гар дээр суниалтын Монгол Улсын рекорд дээд амжилтыг өөрөө эзэмшдэг үү?

       -Үгүй ээ, одоогоор Монгол Улсын рекорд амжилтыг эзэмшдэггүй. Өөрөө үүсгэн байгуулсан болохоор тэр тал дээр нэг их оролдлого хийхгүй байгаа. Зөвхөн дэлхийн дээд амжилт “гин стиль”-д бүртгүүлэх зорилготой.

-Гар дээр суниалтын олон улс, тив, дэлхийн тэмцээн болдог юм уу?

       -Яг тийм төрөл байдаггүй. Гэхдээ маш олон улсад хүүхэд, залуус дэлхий даяар чалленж өрнүүлэх маягаар хоорондоо өрсөлддөг.

–Таеквондо-гоор гаргасан томоохон амжилтуудаасаа сонирхуулахгүй юу?

       -2015 оны дэлхийн аваргын мөнгөнтэй медальтай. 2016 оны Ази тивийн аварга. 2017 оны дэлхийн аваргын мөнгөн медальтай. 2021 оны “онлайн” дэлхийн аварга. 2023 оны дэлхийн аварга. 2025 оны дэлхийн аварга.

-Сэтгэлд тань хоногшин үлдсэн хамгийн сайхан дурсамжтай таеквондо-гийн ямар тэмцээн байдаг вэ?

        -Ер нь оролцсон бүхий л тэмцээнүүд маань гайхалтай сайхан байдаг. Миний хамгийн бахархдаг зүйл бол 12 жил хичээллэхдээ дэлхийн аварга болон олон улсын тэмцээнээс тасралтгүй медаль хүртсэн. Нэг ч удаа “Ганзага хоосон” медальгүй ирж байгаагүй. Үүнийг би том аз, од, хийморь гэж боддог.

-Хатуу биет, онцгой, түль, зохиомол болон тэмцээний тулааны аль төрөлд илүү дуртай вэ?

      -Онцгой төрлөөс бусад бүх төрөл түль буюу хөдөлгөөнт тоот дасгал, тэмцээний тулаан, хатуу биет хугалах, болзолт буюу зохиомол тулааныг нь бүгдийг нь сонирхдог.

- МҮИС-ийн нэрэмжит таеквондо-гийн тэмцээнийг хэд дэх жилдээ зохион байгуулж байгаа вэ?

    -Үгүй ээ, тэр МҮИС-ийн тэмцээн биш.  Мүн Сан Ил багшийн нэрэмжит тэмцээн байгаа юм. Жил бүр тус тэмцээнийг  зохион байгуулан явуулахаар төлөвлөж байгаа.