Дорноговь аймгийн Сайншанд сумын 1-р сургуулийн 12а ангийн сурагч А.Сувдаа элсэлтийн ерөнхий шалгалтдаа хос 800 оноо авсан билээ. Тэрбээр  2024 оны хичээлийн жилийн элсэлтийн ерөнхий шалгалтын англи хэлний шалгалтыг IELTS 8 оноо, математикийн шалгалтыг SAT-780 оноогоор дүйцүүлэн, хос 800 оноог анхлан авч амжилт үзүүлсэн. Бид түүнийг энэ удаагийн “Монголын гэрэлт ирээдүй” буландаа урьж, ярилцлаа.

-Сайн уу. Элсэлтийн ерөхий шалгалтад хос 800 оноо авсанд баяр хүргэе. Баярын сэтгэгдлээсээ хуваалцаач?

-Баярлалаа. Өнгөрсөн долоо хоногт Элсэлтийн ерөнхий шалгалтын мэдээлэл минь ил болсон юм. Гэхдээ өнгөрсөн гуравдугаар сард SAT, IELTS-ийн шалгалтуудаа өгсөн байсан. Тууштай хичээснийхээ үр дүнд өндөр оноо авч, дөрвөн жил үнэгүй суралцах эрхтэй болсон доо баяртай байна. УИХ-ын гишүүн Б.Дэлгэрсайхан суралцах хугацаанд төлбөрийг маань 100 хувь хариуцахаар болсон. Гэр бүлийнхээ ачаанаас хөнгөлж, юунд ч санаа зовохгүйгээр хичээлээ хийх боломж гарч ирлээ.

-Гэр бүлийнхэн нь их баярласан байх даа?

-Ээж минь “Миний охин чадна, ээж нь чамайг бүх чадлаараа дэмжих болно. Хүссэн сургуулиа сонго” гэдэг байсан.

-Шалгалтад хэдий хэдийн хугацаанд бэлтгэсэн бэ, хүндрэлтэй зүйл гарч байв уу?     

-Бага ангийн Ч.Ариунтунгалаг багш маань суурийг минь сайн тавьж, эрдэмд дурлуулж өгсөн. Математикийн хувьд Монгол Улсын гавьяат багш Б.Бадарч багшийнхаа сургалтад хамрагдаж бага ангиасаа олимпиадад оролцож ирсэн.  Харин хүний амьдралд  англи хэл үнэхээр чухал хэрэгтэй гэдгийг дунд ангийн багш минь ухааруулсан. Сайн багш нартай учирсандаа маш их баярлаж явдаг даа. Миний хувьд нэг ч удаа төлбөртэй сургалтад сууж үзээгүй. Хичээл дээрээ олж авсан мэдлэгээ гэртээ баталгаажуулна. Тэгээд интернэтээс нэмэлт мэдээллүүд авч ирсэн.  

                Энэ хоёр шалгалтад 1-2 сарын өмнөөс бэлтгэж байгаад өгсөн. Олон жил давтаж, тэмцээнд оролцож ирсэн болохоор хүндрэлтэй зүйл бага байсан.

-Цагаа хэрхэн зохицуулж, өдөрт хэдэн цагийг хичээлдээ зарцуулсан бэ?

-Манай гэр сургуулиас бага зэрэг хол зайтай байсан юм. Өглөө хичээлдээ яваад, айлын ганц охин болохоор өдөр гэртээ очиж гэрийнхээ ажлыг амжуулна. Тэгээд буцаж сургууль дээр ирж хичээлээ хийдэг байсан. Энэ хэв маягаар багаасаа явсан болохоор цагаа төлөвлөж сурсан даа.

-Хүн болгонд өөрийн гэсэн сурах арга барил байдаг шүү дээ. Чи англи хэлийг хэрхэн сурсан бэ?

-Би сонирхолтой байдлаар суралцаж ирсэн. Заавал би сурах ёстой гэж өөрийгөө хүчлээгүй. Би дуу сонсох, нэхмэл хийх дуртай.  Дуу сонсохдоо эхлээд үгийг нь уншаад, аяыг нь сонсоно. Үүнийхээ дараа дотроо орчуулж сонсоод, мэдэхгүй үгээ шинээр сураад явдаг.  Бас юүтүб дээр боловсролын контентууд англи хэлээр үздэг. Дуртай зүйлээ олоод, үүнийгээ сурах арга барилаа болгоход хэл сурах амархан болдог санагдсан. Сагсан бөмбөгийн спортод дуртай хүүхдүүд бичлэгийг нь үзсээр байгаад сурсан байдаг шүү дээ. Үүнтэй л адилхан гэсэн үг.

-Одоо өөр хэл сурч эхэлсэн үү?

-Хятад хэл сурахаар төлөвлөж байгаа. Дэлхийн нэг тэрбум гаруй хүн энэ хэлээр ярьж, ойлголцож байна шүү дээ.

-Ирээдүйн мэргэжлээ сонгосон уу?

 -МУИС-ийн программ хангамжийн ангийг сонгож, суралцахаар төлөвлөсөн байгаа. Арваннэгдүгээр ангиасаа энэ мэргэжлийг судалж, дурлаж эхэлсэн.

-Сургуулиа төгсөөд эх орондоо ажиллах уу?

-Их сургуулиа төгсөөд, мэргэжлээрээ ажиллана. Би олж авсан мэдлэгээ ажлын талбарт хэрэгжүүлж, өөрийн болгож авахыг хүсэж байгаа. Үүний дараа гаднын оронд мэргэжлээ дээшлүүлнэ.

-Ирэх жилүүдэд шалгалт өгөх дүү нартаа ямар зөвлөгөө өгмөөр байна вэ?

-Шалгалтынхаа  хэв маягт эртнээс дасаж, өдөр өнжихгүй бэлдэх хэрэгтэй.  Мөн цаасаар өгөх үү, техник ашиглаж өгөх үү гэдгээ сайн судлах хэрэгтэй  Миний анзаарснаар хүүхдүүд цаг хугацааг нь тулгаж бэлдээд, сандардаг юм шиг санагддаг.  Ер нь амжилт гэдэг удаан хугацааны үр дүн шүү дээ. Интернэтэд бэлдэх боломжтой эх сурвалж маш олон бий. Тэндээс өөртөө тохирохыг нь сонгоорой. Амжилт хүсье гэж хэлмээр байна.

-Ярилцсанд баярлалаа. Цаашдын амьдралд нь амжилт хүсье.

-Баярлалаа.

А.СУВДААГИЙН АМЖИЛТЫГ ДЭЛГЭРЭНГҮЙ ТАНИЛЦУУЛБАЛ,

Сурлагын амжилтын талаар:

● “Математикийн цаг” сонины нэрэмжит II шатны математикийн стандарт уралдаанд тогтмол амжилттай оролцон хоёр алтан медаль, гурван мөнгөн медаль, нэг хүрэл медаль авсан.

● “Кенгуру” ОУ-ын математикийн олимпиадад жил болгон амжилттай оролцдог. 2016-2024 оны хугацаанд гурван алтан медаль, хоёр мөнгөн медаль, нэг хүрэл медаль авсан.

● Үлэмж тэнгэр сургуулийн нэрэмжит Аймгийн аварга шалгаруулах нээлттэй уралдаанд удаа дараа амжилттай оролцон хоёр мөнгөн медаль, нэг хүрэл медаль авсан.

● МУГБ Б.Бадарчийн нэрэмжит Геометрийн олимпиадаас нэг мөнгөн медаль(2018), нэг хүрэл медаль(2024) авсан. Мөн МУГБ Б. Бадарчийн нэрэмжит түргэн бодолтын олимпиадаас алтан медаль(2020) авсан.

● 12-р ангийн сурагчдын дунд зохион байгуулагддаг математикийн “Дэвжээ” тэмцээнд удаа дараалан багаа ахлан оролцож түрүүлсэн.  Хоёр удаа “Бүтэн бодогч”, нэг удаа “Өндөр оноот сурагч”-аар шалгарсан. (2023.10︔2024.02︔2024.03) “Ирээдүйн Мянгат-2018” математикийн улсын уралдаанд амжилттай оролцон хүрэл медаль авсан.

● “Мазаалай-2018” математикийн улсын уралдаанд алтан медаль авсан.

● Дорноговь аймгийн Байгалийн ухааны IV олимпиадад амжилттай оролцон мөнгөн медаль авсан.

● 2019 онд Физикийн багийн олимпиадад амжилттай оролцон хүрэл медаль авсан.

● Сайншанд сумын Лаборатори 2-р сургуулийн нэрэмжит үндэсний бичгийн олимпиадад алтан медаль(2024), мөнгөн медаль(2023) авсан.

● 2024 онд үндэсний бичгийн “Тунгаамал” тэмцээнд багаа ахлан оролцож гутгаар байранд орсон.

 Нийгмийн идэвх оролцооны талаар:

● Сурагч А.Сувдаа нь 2022.01.12-2023.04.15 хүртэл Дорноговь аймгийн Хүүхдийн Зөвлөлийн нарийн бичгээр ажилласан ба 2023.09.08 хүртэл идэвхтэй гишүүн байсан. Монголын Хүүхдийн Зөвлөлийн Зүүн бүсийн аймгуудын хүүхдийн чуулганд Аймгийн Хүүхдийн Зөвлөлөө төлөөлөн оролцсон.

●2023.04-2023.12 сар хүртэл хугацаанд Дорноговь аймаг дахь Америкийн Соёл Мэдээллийн Төвд дадлагажигчаар ажилласан. Ажиллах хугацаандаа “Speaking Club”, “Secrets Of The Universe” хөтөлбөрүүдийг хэрэгжүүлдэг байсан.

● 2023.10-2024.02 саруудад Дорноговь аймгийн БШУГ, ХГБХХГ-аас зохион байгуулагдсан өдөрлөгүүдэд зочин илтгэгчээр оролцсон.

● 2023.01-2023.02 хугацаанд UniHub-тай хамтран хэрэгжүүлсэн “Робокид”  сургалтын багшаар ажилласан.

● 2022.09 сард МТҮП-аас зохион байгуулсан Миний кодын эхлэл хакатонд туслах багшаар ажилласан.

● 2022.06-08 Үндэсний код бичих охидын хөтөлбөр “Girls Code”-т аймгаа төлөөлөн амжилттай суралцсан

● Сэтгэх чадварын намрын сорилго 2017-ТОП үнэлгээ

● Монголын Сурагчдын холбооны “Эрдэм Оюу” мөнгөн медаль авсан.

● Монголын Хүүхдийн Ордоны “Эрдэм” мөнгөн медаль авсан.

● Гэр Бүл Хүүхэд Залуучуудын Хөгжлийн Газрын “Шилдэг хүүхэд” медалиар шагнагдсан.

● Тэргүүний Уншигч Д. Нацагдорж тэмдэгтэн

● 2022 оны Сайншанд сумын шилдэг сурагч

● 2023 оны Дорноговь аймгийн оны шилдэг сурагч(сурлагын төрлөөр)

● Аймгийн Засаг Даргын өргөмжлөл

● Сургуулийн Шилдгийн Шилдэг хүүхэд

● 2023 оны есдүгээр сард IELTS олон улсын шалгалтад бие даан бэлдэн 8.0 оноо, 2023 оны арван хоёрдугаар сард SAT олон улсын шалгалтад бие даан бэлдэн 1430 онооавсан.(Math-780 / R&W-650)

● Дээрх оноонуудаа математик, англи хэлний элсэлтийн шалгалтын оноотой дүйцүүлэн 800 оноо авсан.