Б.ТҮШИГ-ЭРДЭНЭ: Манай дүү лифтний бариулаас барих гээд зөрүүдлээд байхаар нь би “Коронавирус тусна, болохгүй” гэж хэлсэн

Б. Бадралмаа:
Гэрэлт ирээдүй

2020-11-18, 3683

-Найзуудаа халуун хоол сайн идээрэй. Бас эрт унтаж, гараа сайн угаагаарай. Цоомоо багшдаа, найзууддаа хайртай шүү-

Цахилгаан шатанд дүүгээ “Бариуланд гараараа хүрч болохгүй. Коронавирус тусна. Чи үхчихвэл яах юм” хэмээн учирласан бяцхан хүүгийн видео бичлэг цахим орчинд олон хүний хайрыг татахаас гадна коронавирус ямар хор уршигтайг олон нийтэд сануулаад авсан билээ.

Эргэлт.мн мэдээллийн сайтын хамт олон цар тахлын үед дархлаа дэмжих “эм” болсон гэгээлэг ярилцлага, нийтлэлүүдийг уншигчдадаа хүргэхийг хичээж байгаа билээ. Энэ удаад бид бяцхан хүү Б.Түшиг-Эрдэнэтэй утсаар холбогдож ярилцлаа. Б.Түшиг-Эрдэнэ өөрийнх нь бичлэгийг үзэж, дархлаагаа дэмжсэн ах, эгч, найзууддаа талархал илэрхийлж, бяцхан найзууддаа “Хөл хорионы дэглэмээ сайтар сахиж, гараа сайн угаагаарай” хэмээн уламжилсан юм.

-Сайн уу. Манай уншигчдад өөрийгөө танилцуулаач?

-Сайн. Намайг Б.Түшиг-Эрдэнэ гэдэг, би дөрвөн настай. Аав ээж гурван ах, эгч, дүүтэйгээ амьдардаг. “Бяцхан баясгалан” цэцэрлэгт явдаг. Манай дүүг Гэгээн-Эрдэнэ гэдэг, тэр хоёр настай.

-Цэцэрлэг нь орохгүй байгаа учраас уйдаж байна уу. Амралтаараа юу хийж байна вэ?

-Гадаа гарч тоглож чадахгүй байгаа. Би цэцэрлэг дээрээ зургаан найзтай. Найзуудаа санаж байна. Найзуудынхаа нэрийг хэлэх гэхээр ичээд байна. Би бас Цоомоо багш, Эрдэмээ багшийгаа санаж байна. Цоомоо багш намайг өвөр дээрээ суулгаад эрхлүүлдэг байсан. Одоо гэртээ дүүгээ хараад, ээждээ тусалж байгаа. Заримдаа хүүхэлдэйн кино үзнэ. Машин, легогоор тоглох дуртай.

-Чи ямар кинонд дуртай юм бэ?

-Би “Харри поттер” гээд кино үзэж байгаа.

-Том болоод ямар мэргэжилтэй хүн болох вэ?

-Цагдаа болно, бүх хүнийг хамгаалдаг болохоор.

Гэгээн-Эрдэнэ бариулаас барих гээд зөрүүдлээд байхаар нь би “Наадахыг чинь хүмүүс муухай гараараа барьчихсан коронавирус тусна, болохгүй” гэж хэлсэн. Бид хоёр цэцэрлэгээ тараад явж байсан юм

-Б.Гэгээн-Эрдэнэ та хоёр лифтэнд хамт явж байхад дүү нь лифтний бариулаас барих гээд байсан уу?

-Тэгсэн. Гэгээн-Эрдэнэ бариулаас барих гээд зөрүүдлээд байхаар нь би “Наадахыг чинь хүмүүс муухай гараараа барьчихсан коронавирус тусна, болохгүй” гэж хэлсэн. Бид хоёр цэцэрлэгээ тараад явж байсан юм.

-Дүүгээ коронавирус тусахаас хамгаалсан юм уу?

-Тийм. Коронавирус тусвал үхнэ. Намайг тэгж хэлсэн чинь Гэгээн-Эрдэнэ бариулаас барихаа больчихсон. Би уг нь дүүтэйгээ хамт тоглодог, гэхдээ заримдаа миний үгэнд ордоггүй юм.

-Чи коронавирусээс өөрийгөө яаж хамгаалж байгаа вэ?

-Би гараа савандаж угааж, С витамин ууж байгаа. Бас сүү, аарц уудаг. “Халуун хоолоо сайн идэж, гадуур явахгүй байвал коронавирусээс өөрийгөө хамгаална” гэж ээж хэлсэн. Бас шүдээ сайн угаахгүй бол шүдийг нь хорхой иднэ. Бас давстай усаар хоолойгоо зайлах хэрэгтэй.

-Чи найзууддаа хандаж юу гэж хэлэх вэ?

-Найзуудаа халуун хоол сайн идээрэй. Бас эрт унтаж, гараа сайн угаагаарай. Цоомоо багшдаа, найзууддаа хайртай шүү.

Цагдаа болно, бүх хүнийг хамгаалдаг болохоор

Б.ТҮШИГ-ЭРДЭНЭ: Манай дүү лифтний бариулаас барих гээд зөрүүдлээд байхаар нь би “Коронавирус тусна, болохгүй” гэж хэлсэн

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2020-11-18 17:53:01

Naraa : Ёстой хөөрхөн ухаантай хүүхдүүд шүү... цахим орчинг гоё сайхан, маш эерэг болгож байгаа. Хайр хүрэм гээч би бичлэгийг дахин дахин үзсэн. Үзэх бүрдээ л инээмсэглэж хайр хүрдэг.

Шинэ мэдээ