Улсын драмын эрдмийн театрын жүжигчин Г.Амгаланбаатар өнөөдөр Монгол Улсын Гавьяат жүжигчин цол хүртлээ.

   Тэрбээр энэ үеэр сэтгэгдлээ илэрхийлэхдээ “Драмын урлагт 2002 оноос хойш тасралтгүй ажиллаж, хоёргүй сэтгэлээр зүтгэсний маань хариуд Монгол Улсын Гавьяат жүжигчин цол тэмдгээр шагнасанд туйлаас баяртай байна. Энэ шагнал надад илүү их урам, ташуур өглөө. Энэ сайхан урмаараа би үзэгч, түмнийхээ итгэлийг алдахгүй  олон сайхан уран бүтээл хийж, олон шавь нар төрүүлэх болно гэж хэлье. Дөнгөж саяхан “Хаадын хаан” жүжгийн их эзэн богд Чингис хааны дүрд тоглосныхоо дараа энэ сайхан цолыг төрсөн өдрөөрөө хүртэж байгаад их бэлэгшээж байна. Их бэлэг, дэмбэрэлтэй сайхан үйл явдал боллоо” гэв.

   Түүнийг  бид “Драм-4” хамтлагийн нэг гэдгээр нь мэдэхээс гадна “Үл таних эмэгтэй”, “Амьдрал төсөл”, “Надаар тоглосон хайр”, “Бооцоо”, “Атга нөж”, “Хайрын виз” зэрэг тайз дэлгэцийн олон арван бүтээлээр нь таних билээ. Хамгийн сүүлд тэрбээр “Хаадын хаан” жүжгийн Чингис хааны дүрд ажилласан юм.