ЭРЧИМ ХҮЧНИЙ САЙД АСАН Н.ТАВИНБЭХ, ЗӨВЛӨХ П.ТОВУУДОРЖ ХОЁРЫН 2.6 САЯ АМ.ДОЛЛАРЫН ЭРҮҮГИЙН ХЭРЭГ ХЭРХЭН ӨРНӨСӨН БЭ

Б. Цогтбаяр:
Эрэн сурвалжлах

2026-01-20, 84

Эрчим хүчний сайд асан Н.Тавинбэх, түүний зөвлөх П.Товуудорж нарыг 10 аймагт дулааны станц барих төслийн зөвлөх үйлчилгээнээс 2.6 сая ам.доллар завшсан хэргээр цагдан хорилоо. Тэгвэл Н.Тавинбэх, П.Товуудорж хоёрын хэрэг хэзээ эхэлсэн, хэрхэн өрнөснийг тоймлож байна.

10 аймагт дулааны станц барих төслийн эхлэл ба П.Товуудорж

2015 оны арваннэгдүгээр сарын 23-нд Ч.Сайханбилэгийн Засгийн газар БНСУ-аас зээл авч, 10 аймгийн төвд дулааны станц барих тухай 459 дугаартай тогтоол баталж, БНСУ-ын талтай тохиролцохыг Эрчим хүчний сайд Д.Зоригтод даалгаж байв. Тухайн үед П.Товуудорж Эрчим хүчний яамны Стратегийн бодлого, төлөвлөлтийн газрын даргаар ажиллаж байсан. Өөрөөр хэлбэл, тун удахгүй БНСУ-ын зээлээр 10 аймагт дулааны станц барих асар их мөнгөний ажил орж ирнэ гэдгийг хамгийн түрүүнд мэдэж, отож хүлээсэн хүмүүсийн нэг нь П.Товуудорж гэсэн үг.

Ингэж явсаар хоёр жилийн дараа буюу 2018 оны арвандугаар сарын 17-нд У.Хүрэлсүхийн Засгийн газар 10 аймгийн төвд дулааны станц барихад зориулж БНСУ-ын Засгийн газраас 148.7 сая ам.долларын хөнгөлөлттэй зээл авах гэрээ байгуулсан. Ингээд 148.7 сая ам.долларын зээлийн гэрээ байгуулагдсанаас долоон сарын дараа буюу 2019 оны долдугаар сарын 31-нд 10 аймагт дулааны станц барих төслийн зөвлөх компаниар П.Товуудоржийн төрсөн эгч П.Бурмаагийн 20 гаруйхан настай хүү М.Тэмүүлэнгийн нэр дээр бүртгэлтэй “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” ХХК-ийн хамтарсан түншлэл ажиллахаар болж, нийт 9,010,103 ам.долларын төлбөртэй, гурван жилийн хугацаатай зөвлөх үйлчилгээний гэрээг байгуулсан байдаг.

Тайлбар: Зөвлөх үйлчилгээ үзүүлэх гэрээ байгуулах ёслол, БНСУ-ын “Кореан дистрикт хийтинг инженеринг” ХХК-ийг төлөөлж Хьюнсу Так,

"Грийн энержи интернэйшнл" ХХК-ийг төлөөлж П.Товуудорж,

2019 оны долдугаар сарын 31

Анхаарах ёстой нэг асуудал байна. 10 аймагт дулааны станц барихад зориулж БНСУ-аас 148.7 сая ам.долларын зээл авах ажлыг Сангийн сайд Ч.Хүрэлбаатар хариуцаж ажилласан. Ч.Хүрэлбаатар Увсынх, П.Товуудорж ч Увсынх. Нэмээд, Ч.Хүрэлбаатарыг Түлш, эрчим хүчний сайд байх үед П.Товуудорж тус яаманд хэлтсийн даргаар ажиллаж байсан. Өөрөөр хэлбэл, Ч.Хүрэлбаатар, П.Товуулдорж хоёр эртнээс ойр байсан дарга, цэрэг, бас нутаг нэгт ах дүүс. Тэгэхээр Ч.Хүрэлбаатар 10 аймагт дулааны станц барих төсөлд зориулж БНСУ-аас 148.7 сая ам.долларын зээл авах ажлыг хариуцаж, 10 аймагт дулааны станц барих төслийн зөвлөх үйлчилгээг Ч.Хүрэлбаатарын нутгийн дүү П.Товуудоржийн халаасны компани хариуцах болсон нь анхаарал татаж байгаа юм. Өөрөөр бол, 10 аймагт дулааны станц барих төслийг зөвлөхөөр П.Товуудоржийн компани шалгарахад Ч.Хүрэлбаатарын хувь нэмэр байсан уу, эс бөгөөс 148.7 сая ам.доллар буюу одоогийн ханшаар 500 гаруй тэрбум төгрөгийн том төслийн зөвлөхөөр П.Товуудоржийн 20 гаруйхан настай ач дүүгийн нэр дээрх компани ямар шалгуураар шалгарсан бэ гэдэг асуудал.

Тайлбар: Ч.Хүрэлбаатар, П.Товуудорж, 2008 он

Н.Тавинбэх П.Товуудоржийн компанид 2.6 сая ам.долларыг ингэж олгожээ

2020 оны долдугаар сард Эрчим хүчний сайдаар Н.Тавинбэх томилогдож, тэр даруйдаа П.Товуудоржийг өөрийн зөвлөхөөр томилж, дэргэдээ авсан. П.Товуудоржийг Н.Тавинбэх зөвлөхөөрөө авсан нь ардаа 10 аймагт дулааны станц барих төслөөс хувь хүртэх ашиг сонирхлын томилгоо байсныг тайлбарлах илүүц биз. Ингээд Н.Тавинбэх, П.Товуудорж хоёр 10 аймагт дулааны станц барих төслийг хоёр жил хамт удирдаж, ам.доллараар амташсан.

Тайлбар: ЭХ-ний сайд Н.Тавинбэх, зөвлөх П.Товуудорж

Гэтэл 2022 оны гуравдугаар сарын 31-нд П.Товуудоржийн “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” ХХК-ийн хамтарсан түншлэлийн 10 аймагт дулааны станц барих төслийн зөвлөх үйлчилгээний гэрээний хугацаа дууссан. Хэрвээ зөвлөх үйлчилгээний гэрээний хугацааг нь сунгахгүй бол П.Товуудорж хүссэн хүсээгүй 10 аймагт дулааны станц барих төслөөс гараа татахаас аргагүй болсон гэсэн үг. Өдгөө Н.Тавинбэх, П.Товуудорж хоёр хөтлөлцөөд хоригдож буйн шалгаан чухам эндээс эхэлсэн.

Өчигдөр АТГ-аас мэдээлэл хийхдээ “Н.Тавинбэх Эрчим хүчний яамны Төрийн нарийн бичгийн даргаар ажиллаж байхдаа өөрийн зөвлөх П.Товуудоржийн “Грийн энержи интернэйшнл” ХХК-ийн 10 аймагт дулааны станц барих төсөлд зөвлөх үйлчилгээ үзүүлэх гэрээний хугацааг сунгасан, зөвлөх үйлчилгээний төлбөрийг 2.6 сая ам.доллараар нэмсэн” гэж тайлбарласан.

Судалж үзвэл, Н.Тавинбэх, П.Товуудорж хоёрын хэрэг дараах байдлаар өрнөжээ.

1. Н.Тавинбэхийн зөвлөх П.Товуудоржийн “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” ХХК-ийн хамтарсан түншлэлийн 10 аймагт дулааны станц барих төсөлд зөвлөх үйлчилгээ үзүүлэх гэрээний хугацаа 2022 оны гуравдугаар сарын 31-нд дууссан. Үүнээс таван сарын дараа буюу 2022 оны наймдугаар сард Н.Тавинбэх Эрчим хүчний яамны Төрийн нарийн бичгийн даргаар томилогдсон. Ингээд Н.Тавинбэх Эрчим хүчний яамны Төрийн нарийн бичгийн дарга болмогцоо “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” ХХК-ийн хамтарсан түншлэлийн зөвлөх үйлчилгээний гэрээний хугацааг 2026 оны хоёрдугаар сарын 28-ныг хүртэл хүчинтэй байхаар хүчээр сунгаж өгсөн байна.

2. Н.Тавинбэхийн зөвлөх П.Товуудоржийн “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” ХХК-ийн хамтарсан түншлэлийн 10 аймагт дулааны станц барих төсөлд зөвлөх үйлчилгээ үзүүлэх гэрээний төлбөр нь дээр дурдсанчлан 9,010,103 ам.доллар байсан. Гэтэл Н.Тавинбэх Эрчим хүчний яамны Төрийн нарийн бичгийн дарга болмогцоо “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” ХХК-ийн хамтарсан түншлэлийн зөвлөх үйлчилгээний 9,010,103 ам.долларын төлбөрийг 2.6 сая ам.доллараар нэмж, 11.7 сая ам.доллар болгосон.

3. Н.Тавинбэх Эрчим хүчний яамны Төрийн нарийн бичгийн дарга байхдаа буюу 2024 онд П.Товуудоржийн “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” компанийн түншлэлийн данс руу хоёр удаагийн гүйлгээгээр нийт 8.8 тэрбум төгрөгийг “Зөвлөх үйлчилгээний дундын төлбөр” утгаар шилжүүлжээ.

Тодруулбал,

- 2024 оны нэгдүгээр сарын 5-ны өдөр “Зөвлөх үйлчилгээний дундын төлбөр” утгаар 6,675,551,305 төгрөг,

- 2024 оны аравдугаар сарын 25-нд “Төслийн зөвлөх үйлчилгээний дундын төлбөр” утгаар 2,146,700,557 төгрөг тус тус шилжүүлсэн.

Энэхүү 8.8 тэрбум төгрөгийг 2024 оны ам.долларын ханш буюу 3420 төгрөгөөр хөрвүүлбэл яг 2.6 сая ам.доллар болж байна. Өөрөөр бол, АТГ-ын мэдээлэлд дурдагдсан 2.6 сая ам.доллартай яг таарч байна. Тэгэхээр Н.Тавинбэх 2024 онд албан тушаалаа урвуулан ашиглаж, өөрийн зөвлөх П.Товуудорж “Грийн энержи интернэйшнл” ХХК болон БНСУ-ын “Кореан дистрикт хийтинг инженеринг” компанийн түншлэл рүү 2.6 сая ам.доллар буюу 8.8 тэрбум төгрөгийг дээрх байдлаар шилжүүлж завшсан ажээ.

ЭРЧИМ ХҮЧНИЙ САЙД АСАН Н.ТАВИНБЭХ, ЗӨВЛӨХ П.ТОВУУДОРЖ ХОЁРЫН 2.6 САЯ АМ.ДОЛЛАРЫН ЭРҮҮГИЙН ХЭРЭГ ХЭРХЭН ӨРНӨСӨН БЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.