Цэцэрлэг дээрээ нас барсан 1.2 настай хүүгийн ар гэрийнхэн мэдээлэл хийлээ. Тэд шүүх шинжилгээний дүгнэлттэй санал нийлэхгүй байгаагаа илэрхийлж, гомдолтой байгаагаа хэлэв.

        Талийгаач хүүгийн ээж Ц.Нандинболор “Тэр өдөр миний хүү цэцэрлэгтээ зүв зүгээр орсон. Би тэр өдөр амжуулах ажилтай байсан учир анх удаа хүүгээ эрт сэрээгээд, цэцэрлэгт нь хүргэж өгсөн. Багшдаа тэврүүлээд, инээгээд, баяртай гээд үлдсэн миний хүү өдөр нь байхгүй болчихсон. Эмнэлгээс яриад, хүүгийн минь талаар хэлэхэд надад маш аймшигтай байсан. Одоо ч гэсэн надад, бидэнд хэцүү байна. Цэцэрлэгийн зүгээс “Хүү чинь хоолоо идэж байгаад унаад өгсөн” гэж хэлсэн. Тэгээд газар хэвтэж байхад нь өлгийдөөд, унтуулах гээд орхичихсон байсан. Миний хүү хэзээ ч өлгийдүүлж байгаагүй. Хүүхэд хахаад, өлгийнөөсөө гарах гэж яаж тэмцэлдсэн бол гэж бодохоос аймшигтай байна. Тийм чимээтэй орчинд хүүхэд унтах ямар ч боломжгүй шүү дээ. Яагаад миний хүүгийн амьсгалыг шалгаагүй юм бэ. Амьсгалж чадахгүй хэвтэж байхад нь өлгийнд ороогоод хаячихсан байна шүү дээ. Энэ бол цэцэрлэгийн багшийн 100 хувийн ажлын хариуцлагагүй байдал. Хүүгээ алдаад 20 гаруй хонож байлаа. Шүүх шинжилгээний дүгнэлт өнөөдөр гарлаа. Ямар ч хууч өвчингүй хүүг минь элэг, бөөр үрэвсэлтэй, хатгаатай, зүрх судасны асуудалтай, үүнээс улбаатайгаар зүрх нь хаагдаж нас барсан гэсэн дүгнэлт гарсан байна. Хатгаа нь хүндрээд, элэг, бөөр, зүрх судас руу үрэвссэн, ингээд зүрх нь хаагдсан гэж байгаа юм. Энэ бол байж болохгүй дүгнэлт. Миний хүү ханиадтай байсан нь үнэн, гэхдээ хатгаа болоогүй байсан. Ханиад нь эдгэрээд, цэцэрлэгтээ явж байсан. Миний хүү эрүүл, саруул хүүхэд байсан. Бид амьдрахын тулд хүүхдээ багад нь цэцэрлэгт өгч, ажлаа хийж байна. Гэтэл хариуцлага алдсан цэцэрлэгийн багш нарт ямар ч арга хэмжээ аваагүй. Гомдолтой байна” гэлээ.