Эрчим хүчний яам болон Дэлхийн банк хамтран дулааны шугам сүлжээг өргөтгөн шинэчлэх төслийг хэрэгжүүлж байгаа. Энэ хүрээнд Драмын театрын урд талаас Багшийн дээдийн уулзвар хүртэл 2а магистралийн 350 мм голчтой шугамыг 530 мм голчтой, 950 метр болгон өргөтгөн шинэчилсэн билээ. Тэгвэл уг шинэчлэлтийн ажил дууссан ч нөхөн сэргээлтийн ажил хаягдсан нь олон нийтийн шүүмжлэл дагуулаад байна. Бид энэ талаар төслийн ерөнхий зохицуулагч Э.Мөндөрөөс тодрууллаа.

-Драмын театрын урд талаас Багшийн дээдийн уулзвар хүртэл 2а магистрал шугамын ажил дууссан уу?

        -Шугам шинэчлэлтийн ажил дууссан. Гэхдээ нөхөн сэргээлтийн ажил дуусаагүй байна. Уг ажил УИХ-ын сонгууль болон төрийн айлчлалтай холбоотойгоор хоёр сарын дараа эхэлсэн. Угтаа тавдугаар сарын 15-нд эхлэх байсан ч тодорхой шалтгааны улмаас хойшилж, хугацаа алдсан гэсэн үг. Хэрэв цагтаа эхэлсэн бол бид ажлаа аравдугаар сарын 15-нд хүлээлгэж өгөх байсан.

-Нөхөн сэргээлтийн ажил хэзээ дуусах вэ?

       -Арваннэгдүгээр сарын 15-нд дууссан. Өөрөөр хэлбэл арав хоногийн дараа бид хүлээлгэж өгнө.

-Хугацаа хойшлох гэсэн асуудал байгаа юу. Энэ хугацаа нь найдвартай юу?

        -Найдвартай, хугацаа хойшлох гэсэн асуудал байхгүй. Бид ажлаа шахаад, дуусах шатандаа явж байна.

-Нөхөн сэргээлтийг ямар компани хийж байгаа вэ?

        -Сүхбаатар дүүргийн нэгдүгээр хороонд байрлах 2а магистраль шугамыг шинэчлэх ажлын гүйцэтгэгчээр “Рутан” ХХК шалгарсан. Нөхөн сэргээлтийг уг компани хариуцаж байгаа.