ЭМДЕГ-ын дарга асан Л.Бямбасүрэн эрх мэдэл, албан тушаалаа ашиглан, улсын болон хувийн эмнэлгийн захирлуудаас удаа дараагийн үйлдлээр их хэмжээний авлига авсан. Хариуд нь тухайн эмнэлгүүдэд өвчтөнийх нь тооноос давсан нэмэлт санхүүжилтийг Эрүүл мэндийн даатгалын сангаас олгож байсныг нь АТГ-ын мөрдөгчид илрүүлсэн байдаг. Өөрөөр хэлбэл, Л.Бямбасүрэн өөрт нь авлига өгсөн эмнэлгүүдэд эмчилсэн өвчтөнийх нь тооноос хэт давсан нэмэлт санхүүжилт өгөх байдлаар Эрүүл мэндийн даатгалын сангийн дансыг “улайлгасан” маш ноцтой хэрэг үйлдсэн нь тогтоогдоод буй юм.

            Тодруулбал, “Гэгээн манал” эмнэлгийн захирал Л.Анхтуяа, “Нандин ухаан” эмнэлгийн захирал Л.Ариунтуяа гэх төрсөн эгч, дүү хоёр ЭМДЕГ-ын дарга асан Л.Бямбасүрэнд удаа дараагийн үйлдлээр их хэмжээний авлига өгч байсныг илрүүлэн, хамтад нь шалгаж байгаа юм.

            Бид энэ талаар “Гэгээн манал” эмнэлгийн захирал Л.Анхтуяа, “Нандин ухаан” эмнэлгийн захирал Л.Ариунтуяа нараас тодруулахаар холбогдоход “Та нарт хамаагүй, мэдээлэл өгөхгүй” гэсэн юм.

            Засгийн газрын хуралдаанаар Л.Бямбасүрэнг ажлаас нь чөлөөлсөн байдаг. Гэхдээ нь энэ авлигын хэрэгтэй нь холбоотой бус “Тэтгэвэрт гарах нас болсон” гэж үзсэн байж болзошгүй байна.