Өвөрхангай аймгийн Засаг дарга асан А.Ишдорж орон нутгийн замд тээврийн хэрэгсэл жолоодож яваад зам тээврийн ноцтой осол гаргаж, хүний амь хөнөөсөн хэрэг гарсан. Тодруулбал, өнгөрсөн оны наймдугаар сарын 11-ний 00:16 цагт Өвөрхангай аймгийн Арвайхээр сумын “Хурд” ШТС-ын ойролцоо зорчиж яваад 57 настай эрэгтэйг дайрсан. Талийгаач Б Улаанбаатараас Ховд чиглэлийн автобусаар зорчиж явсан бөгөөд зам гарах үедээ дайруулж, эмнэлгийн тусламж авч чадалгүй газар дээрээ амьсгал хураасан юм. Засаг дарга асан А.Ишдорж тухайн үед албаны машин унаж явсан бөгөөд хувийн ажлаар Улаанбаатар хот руу жолоочгүй явсан гэдэг. 

       Тэгвэл Өвөрхангай аймгийн Засаг дарга асан А.Ишдоржид холбогдох хэргийн шүүх хурал одоог хүртэл болоогүй байна. Тодруулбал, энэ оны дөрөвдүгээр сарын 10-нд хөнгөрүүлэх нөхцөлтэйгөөр хэргийн шүүх хурал болсон ч “Шүүх бүрэлдэхүүнийг зарлах, татгалзан гаргах эрхтэй болохыг тайлбарлах” гэсэн үндэслэлээр хойшилсон байдаг. 

Бид уг хэргийн талаар талийгаач Б-ийн дүүтэй холбогдож тодруулахад “Талийгаачийн хэргийн хохирогчоор эхнэр, хүүхэд нь оролцоод явж байгаа. Хэрхэн шийдэгдэж байгааг мэдэх юм алга. Бид сайн мэдээлэлгүй байна” гэсэн юм.

Харин яллагдагчаар татагдан шалгагдаж байгаа Өвөрхангай аймгийн Засаг дарга асан А.Ишдоржоос тодруулахад “Энэ хэрэг та бүхэнд хамаагүй. Би мэдэхгүй байна. Хууль хяналтын байгууллагынхан тайлбар өгнө биз. Би мэдээлэл өгөхгүй” гэлээ.