Зарим дүүргийн Улсын бүртгэлийн хэлтсийн мэргэжилтэн, "Хаан", "Голомт" банкны ажилтнууд мөрийтэй тоглоомын бүлэглэлд иргэдийн мэдээллийг зардаг байсан байж болзошгүй хэргийг цагдаагийн байгууллагаас шалгаж байгаа.

       Тэгвэл уг хэрэгт холбогдсон зарим албан хаагчийг яллагдагчаар татсан талаарх мэдээлэл хэвлэл мэдээллийн хэрэгслээр цацагдаад байна. Тодруулбал, Хэнтий аймгийн Хаан банкны салбарын ажилтан Ч.Доржханд, Г.Наранцэцэг нарыг харилцагчийн дансны мэдээллийг мөрийтэй тоглоомын бүлэглэлд зарсан байж болзошгүй тул яллагдагчаар татан шалгаж байгаа гэх.

Тэгвэл энэ талаар “Хаан” банкны Олон нийттэй харилцах хэлтсийн ахлах мэргэжилтэн Г.Оюунгэрэлээс тодруулахад “Бид бүхэн энэ хэрэгт холбогдсон хүмүүсийн талаар мэдээлэлгүй байна. Хэвлэл мэдээллийн хэрэгслээс л энэ хүмүүсийг иргэдийн мэдээллийг зарсан, харилцагчийн мэдээллийг худалдсан байж болзошгүй гэдгийг олж уншлаа. Гэхдээ одоогоор бидэнд албан ёсоор мэдэгдсэн мэдээлэл алга. Үүнийг хууль хяналтын байгууллагаас тодруулах нь зүйтэй” гэлээ.