Зарим дүүргийн Улсын бүртгэлийн хэлтсийн мэргэжилтэн, Хаан, Голомт банкны ажилтнууд мөрийтэй тоглоомын бүлэглэлд иргэдийн мэдээллийг зардаг байсан байж болзошгүй хэргийг цагдаагийн байгууллагаас шалгаж байгаа.

         Тэгвэл уг хэрэгт холбогдсон зарим албан хаагчдыг яллагдагчаар татсан талаарх мэдээлэл хэвлэл мэдээллийн хэрэгслээр цацагдаад байна. Тодруулбал, Налайх дүүргийн Улсын бүртгэлийн хэлтсийн улсын бүртгэгч Э.Өнөрцэцэг иргэдийн тоон гарын үсгийг мөрийтэй тоглоомын бүлэглэлд зарсан байж болзошгүй. Түүнийг хууль хяналтын байгууллагаас яллагдагчаар татсан гэх.

     Энэ талаар Налайх дүүргийн Улсын бүртгэлийн хэлтсийн даргаас тодрууллаа. Тэрбээр “Мөрийтэй тоглоомын бүлэглэлийн хэрэгт манай улсын бүртгэгч Э.Өнөрцэцэг холбогдсон тухай мэдээллийг уншлаа. Гэхдээ энэ мэдээлэл худлаа гэдгийг албан ёсоор хэлмээр байна. Манай ажилтны тухай худал мэдээлэл бичсэн хэвлэл мэдээллийн хэрэгслийнхнийг хуулийн байгууллагаар шалгуулна. Улсын бүртгэгч Э.Өнөрцэцэг нь манай байгууллагад олон жил ажиллаж байгаа. Хууль хяналтын байгууллагаас нэг л удаа дуудаж гэрчийн мэдүүлэг авсан юм билээ. Түүнээс биш гэмт хэрэгтэн болохыг нь тогтоосон гэсэн үг биш. Гэрчээр мэдүүлэг өгсөн учраас ажлаас нь чөлөөлөх болон өөр арга хэмжээ аваагүй. Хууль хяналтын байгууллагаас буруутай гэдгийг нь тогтоовол бид арга хэмжээ авна” гэлээ.