Зарим дүүргийн Улсын бүртгэлийн хэлтсийн мэргэжилтэн, "Хаан", "Голомт" банкны ажилтнууд мөрийтэй тоглоомын бүлэглэлд иргэдийн мэдээллийг зардаг байсан байж болзошгүй хэргийг цагдаагийн байгууллагаас шалгаж байгаа.

       Тэгвэл уг хэрэгт холбогдсон зарим албан хаагчийг яллагдагчаар татсан талаарх мэдээлэл хэвлэл мэдээллийн хэрэгслээр цацагдаад байна. Тодруулбал, Хан-Уул дүүргийн Улсын бүртгэлийн хэлтсийн Иргэний улсын бүртгэгч Б.Цэрэнлхамыг яллагдагчаар татсан гэх.

    Энэ талаар Хан-Уул дүүргийн Улсын бүртгэлийн хэлтсийн дарга С.Оюун-Эрдэнээс тодрууллаа. Тэрбээр “Иргэний улсын бүртгэгч Б.Цэрэнлхам одоогоор ээлжийн амралттай байгаа. Хууль хяналтын байгууллагаас манай алба хаагчийг шалгаж байгаа гэсэн албан ёсны мэдээлэл ирээгүй. Тухайн албан хаагч ч бидэнд мэдэгдээгүй. Шалгаж байгаа гэсэн хууль ёсны мэдээ ирээгүй учраас бид ямар ч арга хэмжээ аваагүй байна. Зөвхөн хэвлэл мэдээллийн хэрэгслээр энэ мэдээллийг олж харлаа. Тийм зүйл болоогүй байх гэж бодож байна. Улсын бүртгэгч иргэний тоон гарын үсгийг зарах, бусдад худалдах ямар ч боломжгүй. Харин иргэд тоон гарын үсгээ авах цахим мэдээлэл, кодоо бусдад худалдсан, эсвэл алдсан байж болзошгүй. Иргэний улсын бүртгэгч Б.Цэрэнлхам манай хэлтэст дөрвөн жил ажиллаж байгаа” гэв.