"Парис-2024" пара олимпын наадмаас таеквондагийн төрлөөр У.Сүрэнжав алтан медаль хүртсэн билээ. Бид түүний аав Д.Сүрэнжавтай холбогдож баярын сэтгэгдлийг нь хуваалцлаа. Тэднийх Завхан аймгийн Тосонцэнгэл сумын Ориг багийн малчин айл юм.

      -Танд баяр хүргэе ээ. Охин нь пара олимпын аварга боллоо шүү дээ?

 -Баярлалаа. Ах нь зургаан хүүхэдтэй. Гурав дахь охин Сүрэнжав маань олимпын аварга болсонд их баяртай байна. Наймдугаар ангиасаа эхэлж таеквондогоор хичээллэсэн. Багаасаа зорьсон зорилготой, зорьсондоо хүрэхийн тулд их хичээнгүй, дайчин зан чанартай. Зорилго нь биелэж амжилтад хүрсэнд нь их баярлаж байна.

     -Та тэмцээнийг нь үзсэн үү. Ялалт байгуулаад баярлаж байгаа агшин нь олон хүний хайр, бахархлыг төрүүллээ?

     -Өнөөдөр л тэр баярлаж байгаа хэсгийг нь үзлээ, ах нь. Охин минь цоглог, сэтгэл зүй сайтай, өнгөлөг харагдаж байна лээ. Бид ч мөн баярлан, огшиж, сум орон нутгийн улс манайд цуглацгаачихсан, хөл хөдөлгөөн ихтэй байна.

     -Охинтойгоо холбоо барьсан уу?

   -Хараахан холбоо барьж амжаагүй байна. Өнөөдөр холбоо барьна.

      -Олимпод оролцохоор явахад нь та юу гэж захиж хэлсэн бэ?

    -Сэтгэл зүй сайтай, өөртөө итгэлтэй, зоригтой амжилттай сайн оролцоод ирээрэй гэж байсан. Хамгийн гол нь сэтгэл зүйгээрээ сайн байгаараа гэж хэлсэн. Охин минь өөрийгөө дайчилж, бэлтгэж ийм сайхан амжилтад хүрсэнд ах нь туйлаас баяртай байна.

       -Алдар спорт хороо болон багш нарт нь та бас талархлаа илэрхийлэх байх?

   -Тэгэлгүй яах вэ. Охиныг минь тусалж, дэмждэг бүх хүмүүст баярлалаа.