“Шинэ-Өргөө” хотхоны тоглоомын талбайд тоглож байсан 6-9 насны дөрвөн хүүхдийг “приус-20” маркийн автомашины жолооч дайрч, гэмтээсэн ноцтой осол гараад байгаа. Тодруулбал, өчигдөр уг осол гарч, хүүхдүүдийг эмнэлэгт хүргэсэн. Одоогийн байдлаар нэг хүүхдийн гэр хугарч, нэг нь зөөлөн эдийн гэмтэл авч, ГССҮТ-д хэвтэн эмчлүүлж байна. Харин үлдсэн хүүхдүүдийг гэрээр нь эмчилж, шаардлагатай зөвлөгөө, мэдээллийг өгчээ.

         Цагдаагийн байгууллагаас шалгалтын ажиллагаа явуулж байгаа бөгөөд урьдчилсан байдлаар осол гаргасан жолооч согтууруулах ундаа хэрэглээгүй байжээ. Харин тухайн жолоочоос дэлгэрэнгүй шинжилгээ авч, мансууруулах болон бусад төрлийн хориотой бодис, эм тариа хэрэглэсэн эсэхийг тогтоох аж. Шинжилгээний хариу 14-21 хоногт гарах ажээ.

Бид энэ талаар осол гаргасан “Приус-20” маркийн автомашины жолоочтой холбогдож тодрууллаа.

-Таны болон осолд өртсөн хүүхдүүдий биеийн байдал ямар байгаа вэ?

-Миний бие зүгээр, хэвийн байгаа. Хүүхдүүдийн биеийн байдал ч гайгүй гэж байна лээ. Би өчигдрөөс хойш цагдаагийн байгууллагад байцаагдаж байна. Тийм учраас нарийн учрыг хэлж мэдэхгүй нь. Хүүхдүүдийг эмнэлэгт хүргэсэн гэсэн.

-Та хүүхдүүдийн аав, ээжтэй холбогдсон уу?

-Үгүй ээ, одоогоор холбогдож чадаагүй байна. Цагдаагийн албан хаагчаар л дамжуулж мэдээлэл авч байна. Мөрдөн шалгах ажиллагаа үргэлжилж, надаас шинжилгээ авсан. Цагдаад мэдүүлэг, байцаалт өгч байгаа учраас би хаашаа ч явах боломжгүй байна.

-Осол юунаас болж гарсан бэ. Тухайн үед юу болсон бэ?

-Би сайн мэдэхгүй байна. Гэнэт л ийм зүйл болчихлоо. Тухайн үед би согтууруулах ундааны зүйл хэрэглээгүй, цоо эрүүл байсан. Энэ нь ч шалгалтаар тогтоогдож байгаа. Дэлгэрэнгүй мэдээлэл өгч чадахгүй нь. Цагдаагийн байгууллагаас асуугаарай.