• Өнөөдөр 2026-07-15

АСРАМЖИЙН ГАЗРААС АСРЫН ДЭВЖЭЭНД ХҮРСЭН НАЧИН

2024-08-05,   1206

       Төрийн наадмын торгон ногоон дэвжээнээ начин цолоо авчихаад бүжиглэж байсан цоглог "хүү"-г монголчууд мартахгүй ээ. Мартах ч аргагүй хүч чадал, авьяас билиг, эгэл даруу төрх тэр байлаа. Тэр бол чөлөөт бөхийн олон улсын хэмжээний мастер, ард түмний хайртай бөх Ө.Батзул. Тэрээр Эрдэнэтийн "Энэрэл" асрамжийн төвд өссөн байдаг. Анх Биеийн тамирын дээд сургуулиас Улсын шигшээ баг руу ОУХМ, Улсын начин Ж.Чулуунбат хөтөлж, шигшээ багт олон улсын хэмжээний мастер болж байсан гэдэг. 2008 оноос бөхийн спортоор хичээллэж эхэлжээ.

        Бөхөөр хичээллэж эхэлсэн талаар нь "Их богд дэвжээ"-ний дасгалжуулагч Д.Батболд "Үндэсний бөхийн ирээдүйн энэ хүчтэнг одоогоос долоон жилийн өмнө хүлээн авч, зааж сурган бэлтгэл сургуулилалтыг нь хийлгэж эхэлсэн. Энэ хугацаанд Базу аймаг, цэргийн баяр наадамд зургаа даван шөвгөрч, аймгийн харцага цол хүртэн, гурван удаа баталж, найм даван түрүүлж аймгийн арслан цол хүртэн, дахин түрүүлж аймгийн арслан цолоо батлан хурц чимэг нэмж, өнөө жил Улсын баяр наадамд тав даван Монгол Улсын начин цол хүртлээ" гэж бахархан бичсэн нь бий. Мөн түүнийг наадам дуусаад гал буусан байхад ганцаараа үлдээд турникт суниаж, штанг хийж, гүйж, мэхээ давтдаг байсныг ч онцлон өгүүлсэн байдаг. Харин түүний анхны амжилт 2016 оноос эхлэлтэй. Тэр жил Орхон аймгийн баяр наадамд зургаа даваад аймгийн харцага цолыг хүртэж байсан бол 2020, 2021 онд Орхон аймгийн баяр наадамд түрүүлж байсан байна.
    Ийм л нэгэн амжилттай, эелдэг даруу, бусдыг дуурайж биш, өөрийнхөөрөө амьдралаа бүтээхийг хүсдэг нэгэн байсан нь хэвлэлд өгсөн ярилцлагуудад нь тод үлджээ. Тэрээр мөн Эрдэнэт хотдоо ээждээ зориулан байшин барих төлөвлөгөөтэй байснаа ч ярьж байсан. Бага залуу наснаасаа олуулаа өсөж, хүмүүжиж, асрамжийн газраас асрын дэвжээнд хүрсэн одтой, адтай, авьяастай начин яах аргагүй тэр байлаа. Үргэлжийн өсөн тэмүүлэгч, хүсэн мөрөөдөгч, ялан дийлэгч тэр байв. Өөрийнхөөрөө байхыг эрхэмлэдэг, хүн чанар, хүнлэг сэтгэл дүүрэн хүчтэн байлаа. Илүү ч барилдах, ихийг зорих тэмүүлэл түүнд байсан. Гэвч тэр бүхнээ гүйцээж амжилгүй олон сайхан гэгээн дурсамж, хором мөч бүрдээ зөөлөн энэрэл түгээсээр тэрээр буцлаа. Асрамжийн газраас асрын дэвжээнд зодоглож, алдрын зэрэгт хүрч гэхдээ чадсан шүү. 

АСРАМЖИЙН ГАЗРААС АСРЫН ДЭВЖЭЭНД ХҮРСЭН НАЧИН
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2024-08-05 14:55:06
    dasf: muu odond tursun hun baijdee huurhii
  • Сэтгэгдэл үлдээсэн: 2024-08-05 10:30:00
    баагий: Яах аргагүй сайхан монгол эр хүн бсан даа начин.энэ цагийн бөхчүүдээс үнэн хүчээр улсын цолонд хүрсэн цөөхөн бөхчүүдийн нэг. Үргэлж хүндэлж хайрлаж дурсаж явах болно оо Батзул начингаа. Барилдаан бүрийг нь шимтэж давахад баярлаж унахад нь харуусдаг фэнийх нь зүгээс. Мөнх хөх тэнгэртээ тайван нойрсоорой.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.