“Орон сууц түрээсэлнэ” гэсэн фэйсбүүкийн зарын группт “Нэг, хоёр өрөө түрээслүүлнэ, төлбөр 12 сараар бөөндөж авна. Барьцаа тэд”, “Гэр бүлийн хүмүүс цэвэрхэн байр удаан хугацаагаар түрээсэлж сууна”, “Хичээлийнхээ хажуугаар ажил хийдэг оюутан байр түрээсэлнэ” гэх зар үй олноороо өдөржин нийтлэгдэнэ. Гэвч түрээслэгчдийн шаардлагад нийцэж, төлбөрөө олон сараар өгөх боломжтой иргэд даанч цөөхөн.

            Нийслэл хотод нэг жилд дотуур байранд амьдрах хүсэлтэй 35-40 мянган оюутан байдаг гэсэн судалгаа байдаг аж. Харин хотын хэмжээнд нийт 44 дотуур байр байдаг бөгөөд эдгээр нь 15 мянган оюутан хүлээн авах хүчин чадалтай. Улмаар оюутны байранд орж чадаагүй оюутнууд найз нөхөд, хамаатан саднаараа нийлэн нийтийн байр, хажуу өрөө, 1-2 өрөө байр түрээсэлж амьдрахаас өөр сонголтгүй болдог.

Тэгвэл бид орон сууцны түрээс болон нийтийн байрны үнэ ханш ямар байгаа талаар сурвалжиллаа.

НЭГ ӨРӨӨ ОРОН СУУЦНЫ САРЫН ТҮРЭЭС 750 МЯНГААС ХОЁР САЯ ТӨГРӨГИЙН ХАНШТАЙ БАЙНА

                Цөөн ам бүлтэй айлууд болон хөдөө орон нутгаас хотод суурьшиж буй оюутнууд ихэвчлэн нэг өрөө байр сонгож, түрээслэх эрэлд гардаг.  Гэвч намрын цагт хотын төв, их сургуулиудтай ойрхон байрны үнэ тэнгэрт хадчихдаг нь нууц биш. Бид хотын төвтэй ойрхон байрны түрээслэгч нартай холбогдож, үүнийг нь тодрууллаа.

            10-р хорооллын нэг өрөө байрны түрээслүүлэгч “Нэг өрөө хагас тавилгатай байр байна. Зургаан давхар байрны хоёр давхарт байрлалтай. Сарын 900 мянган төгрөг, төлбөрөө зургаан сараар авна. Эгчийн дүү ирж үзэх үү, хүн их ирж байна. Мөнгөө түрүүлж өгсөн хүнийг оруулна. Урсгал зардал, интернэтийн мөнгө тусдаа шүү” гэв.  Харин Жуковт байрлалтай хоёр өрөө байрны түрээслүүлэгч “Манайх байрандаа саяхан засвар хийсэн. Сарын түрээс 2.1 сая. Төлбөрөө жилээр нь авна” гээд утсаа тасаллаа.

ТОХИЛОГ НИЙТИЙН БАЙРНЫ САРЫН ТҮРЭЭС 500 МЯНГАН ТӨГРӨГ

        Тэгэхээр сарын 2.1 сая төгрөгийн түрээстэй хоёр өрөө байр түрээслэхийн тулд жилийн төлбөр болох 25 сая төгрөгийг төлөх хэрэгтэй болох юм.Тэгвэл бодит байдал дээр шууд ийм хэмжээний мөнгө төлөх боломжтой хүн бараг үгүй. Тухайн айл нь хүссэн үнээ хэлдэг болохоор төдийлөн тогтсон үнэ ханшгүй байгаа бололтой.

           Иймд залуус хажуу өрөө, нийтийн байр түрээслэх нь элбэг болжээ. Хажуу өрөө байршлаасаа хамааран 400-600 мянган төгрөгийн хооронд байна. Харин нийтийн байр гаднаа нойлтой нь 300-400 мянга, дотроо халуун ус, нойлтой нь 500-650 төгрөгийн ханштай байна. Залуу гэр бүл, оюутнууд нийтийн байрыг сонгож буй нэг шалтгаан нь төлбөрөө сар сардаа авдаг. Барьцаа мөнгө шаарддаггүйд байдаг гэнэ.  Мөн бясаа, жоомоор дүүрэн хуучин нийтийн байрнууд ч элбэг байна. Өрөөний хувьд 3x4, 4x4, 5x4 зэрэг хэмжээтэй. Сарын түрээс 200-250 мянган төгрөгийн хооронд байдаг аж. Нийтийн байрууд Гандан, Цагаан байр, Дэнжийн мянга, 32-ын тойрог, Зурагт, Саппоро орчимд элбэг.  

            Мөн бид сүүлийн жилд монголчуудын өргөнөөр ашигладаг зарын сайт болох Unegui.mn-д байршсан үл хөдлөх хөрөнгө түрээслүүлэх зарыг уншиж танилцлаа. Сайт дээрх нэг өрөө байрны сарын түрээсийн үнэ мөн л 700 мянгаас эхэлж байлаа. Харин хоёр өрөө байрыг тавилгатай эсэхээс хамааран 1-2.5 сая төгрөгөөр түрээслүүлж байна. Мөн  гурван өрөө байрны түрээс сарын 1.5 сая төгрөг, дөрвөн өрөө хоёр сар төгрөгөөс эхэлж байлаа. Төлбөрийн нөхцөл 6-12 сараар бөөндөж авах гэсэн тайлбартай харагдана.

ДОТУУР БАЙРНЫ САРЫН ТӨЛБӨР 300-500 МЯНГАН ТӨГРӨГ

          Харин оюутнуудад зориулсан эрэгтэй, эмэгтэй дотуур байр 300-500 мянган төгрөгийн үнэтэй байна. Нэг өрөөнд 4-6 оюутан амьдрах зохицуулалттайгаар давхар ор байрлуулжээ. Гал тогоотой, шинээр засвар хийсэн харагдаж байлаа. Мөн сарын тог, ус, интернэтийн төлбөр түрээсэнд багтжээ. Төлбөрөө сар сардаа авч буйгаараа давуу талтай байв. Түүнчлэн хичээл хийх ширээг нь шийдэж өгчээ.

ЗАЛИЛАХ ГЭМТ ХЭРГЭЭС УРЬДЧИЛАН СЭРГИЙЛЬЕ

           Мөн сүүлийн жилүүдэд хүний байрыг дамнуулан түрээсэлж, залилах хэрэг ихээр гарах болсон. Иймд Цагдаагийн Ерөнхий газраас иргэдийг байр түрээслэхдээ эзэмшигчийн нэр болон үл хөдлөх хөрөнгийн гэрчилгээний дугаарыг E-mongolia системээр дамжуулан шалгаж, үг үсгээр нь нэг бүрчлэн тулгаж үзэхийг зөвлөж байгаа.