Улсын начин Ө.Батзул зам тээврийн осолд орж, амиа алдсан харамсалтай хэрэг гараад байна. Талийгаач наймдугаар сарын 1-нд болох Эрдэнэт хотын баяр наадамд оролцохоор явж байжээ. Олон нийтийн сүлжээнд “Орхон аймгийн Баяр наадмын комисс бөхчүүдийг өөрийн биеэр ирж бүртгүүл, бүртгэл хаагдлаа. Бүртгэл дуусвал барилдуулахгүй гэж шахсан. Талийгаач бөхийн барилдааны бүртгэлээс хоцрох гээд яарч яваад осолд оржээ” гэх мэдээлэл цацагдаад байгаа юм.

Ө.Батзул агсан Орхон аймгийн Баян-Өндөр сумын уугуул улсын цолтон билээ. Тэгвэл бид энэ асуудлаар Орхон аймгийн Биеийн тамир, спорт хорооны дарга Д.Дэлгэрбаяртай холбогдож тодрууллаа. Тэрбээр Баяр наадмын комиссыг ахалж, бөхийн бүртгэлийг хийжээ.

-Орхон аймгийн баяр наадамд зодоглох бөхчүүдийн бүртгэл хаагдсан уу?

-Өчигдөр бүртгэл дууссан. Харин ирж бүртгүүлж амжаагүй улсын цолтой бөхчүүдийн бүртгэлийг үлдээчихсэн байгаа. Тодруулбал, Орхон аймгаас төрөн гарсан улсын цолтой болон улсын аварга, арслан, начингуудыг барилдана гэж тооцоолж, арван нэр бичих зай үлдээсэн. Өчигдрийн байдлаар 113 бөх бүртгүүлээд байгаа. Үүнээс 10 гаруй нь улсын цолтой бөх байсан. Харин цол олгох барилдааны бүртгэл дууссан. Залуучуудыг журмын дагуу бүртгэж, бүртгэлээ хаасан.

-Улсын начин Ө.Батзул бүртгүүлсэн байсан уу. Түүнийг заавал өөрийн биеэр ирж бүртгүүл гэж шахсан юм уу?

-Тийм зүйл байхгүй. Ө.Батзул начинтай бид холбогдоогүй. Түүнийг ирж барилдах нь тодорхой гэж үзсэн учраас нэрийг нь бичих зай үлдээсэн байсан. Түүнээс бид ганц начингаа шахаж, шаардсан зүйл огт байхгүй. Юу гэж тийм зүйл байх вэ дээ. Бидэнд үнэхээр харамсалтай байна.