УИХ-ын Хүний эрхийн дэд хорооны хуралдаан боллоо. Уг хуралдаанаар  Цагдан хорих 461 дүгээр ангид хоригдож байсан 21 настай залуу амиа алдсантай холбогдуулан, хүний эрхийн зөрчилтэй холбоотой асуудлыг хэлэлцлээ.

        Энэ үеэр Хууль зүй, дотоод хэргийн сайд О.Алтангэрэл “Хорих 461 дүгээр ангид цагдан хоригдож байсан иргэн О харамсалтайгаар амиа алдсан хэрэг гарсан. Хэрэг гарсан даруйд ШШГЕГ болон ЦЕГ-аас танилцуулга авч, ХЗДХЯ-наас танилцсан байгаа. ХЗДХЯ-наас дотоод шалгалт явуулсан. Сайдын хувьд талийгаачийн ар гэртэй хэд хэдэн удаа утсаар холбогдож, долдугаар сарын 25-нд биечилж уулзсан. Хохирогчийн ар гэрийнхэн гомдлоо танилцуулж, гомдлынх нь дагуу Ажлын хэсэг байгуулсан. Талийгаачийн ар гэрийнхэн гурван асуудалд гомдолтой байгаагаа илэрхийлсэн. Нэгдүгээрт, хохирогчийн эмзэг мэдээллийг олон нийтэд дэлгэсэн. Хоёрдугаарт, эмнэлгийн тусламж үйлчилгээг цагт нь үзүүлээгүй. Мөн тусламж үйлчилгээ үзүүлж байх явцдаа гав хэрэглэж, ухаангүй байхад нь хүний эрхийг ноцтой зөрчсөн. Гуравдугаарт, талийгаач цагдаагийн албан хаагчдад эрүүдэн шүүлгэсэн гэдгээрээ гомдол гаргаад байхад энэ асуудал нь шийдэгдээгүй вэ. Ингээд сэжиглэгдэн шалгагдаж байсан хэргээсээ болоод амиа алдаж байгаа юм бэ гэж гомдол гаргасан.

Бид энэ гурван асуудлыг тодруулахаар ажилласан. Цагдаагийн байгууллагын бүх түвшинд мэдээлэл хийхдээ хохирогч, талийгаачийн талаарх хувийн эмзэг мэдээллийг задруулахгүй байх чиглэл өгсөн. Энэ асуудлыг дүрэм, журамд тусгуулахаар ажиллаж байгаа. Харин гэмт хэрэгт сэжиглэгдэж, эрэн сурвалжлагдаж байгаа хүмүүсийн хувийн мэдээллийг хэлэхээс өөр аргагүй. Шалгалтын явцад хэд хэдэн зөрчил байгаа. Хорих, баривчлах байранд ажиллаж байгаа эмнэлгийг боловчон хүчин, шаардлагатай тоног, төхөөрөмж үнэхээр муу байна. Дадлага туршлагатай эмч нар хорих ангид ажиллах сонирхолгүй байна” гэв.