ЯМААНЫ ХУЙХАЛСАН МАХ ГУРВАН КИЛОГРАММ НЬ 45-50 МЯНГАН ТӨГРӨГИЙН ҮНЭТЭЙ БАЙНА 

   Үндэсний их баяр наадам болоход хоёр хоног үлдлээ. Наадмын өмнөхөн малчид Эмээлт рүү хонь, ямаа ачиж, хэдэн төгрөгтэй болдог. Жил бүрийн өдийд хонь, ямааны үнэ өсдөг гэж ярьдаг. Харин энэ жил өмнөх жилүүдийнхтэй ойролцоо байгааг чээнжид хэлэх. Харин малын тарга, тэвээргээс шалтгаалж эрс тэс үнэтэй байх тохиолдол бий. Зүүн аймгуудын тарган хонь 400 хүрч байхад төв, болон баруун бүсийн эр хонь 350-380 мянган төгрөгийн үнэтэй байна. Бид Эмээлтэд хонь зарахаар ирсэн Архангай аймгийн малчинтай холбогдож, хонины үнийн талаар мэдээлэл авсан юм. Тэрбээр “Хавраас хойш хоёр, гурван удаа ирж хонь зарж байна. Хоёр хоногийн өмнө ирэхэд Эмээлт дүүрэн хонь, ямаатай машинаар дүүрчихсэн. Хүн ихтэй байна. Миний зарж байгаа хонины дундаж нь 280 мянган төгрөгийн үнэтэй байна. Тухайлбал, шүдлэн-220, соёолон-260, хязаалан-250, эр хонь-280, төлөг-150 мянган төгрөгөөс эхэлж байна. Тийм болохоор миний зарж байгаа хонь бараг хамгийн хямддаа орж байгаа” гэв.

    Эмээлтээс мал худалдаж авсан иргэд заавал төхөөрүүлж, гэдэс гүзээг нь угаалгаж авдаг. Тэгвэл нэг хонийг 25000 төгрөгөөр төхөөрч, гүзээг нь 3000 угаадаг бол толгой, шийрийг нь 10 мянган төгрөгөөр хуйхалдаг байна. Мөн наадам дөхсөн өдрүүдэд иргэд шинэ шөл уухаар хонь худалдаж авахаас гадна хорхог ихээр хийдэг тул ямаа худалдаж авах нь элбэг байдаг. Тэгвэл Эмээлт захад ямаа 150-180 мянган төгрөгийн үнэтэй байна. Төхөөрж, бэлдүүлж авах нь дээрх үнэтэй адил. Мөн хуйхалсан ямааны мах гурван килограмм нь буюу нэг багц нь 45-50 мянга, хонины хуйхалсан мах 60 мянган төгрөгийн үнэтэй байна.  

ХОНЬ 25 МЯНГААР ТӨХӨӨРЧ, 10 МЯНГААР ТОЛГОЙ, ШИЙР ХУЙХАЛДАГ 

      Хонь худалдан авч буй иргэдэд хэрхэн төхөөрөх вэ гэдэг асуудал гарч ирдэг байна. Тиймээс Эмээлт захад мал төхөөрөх үйл ажиллагаа явуулдаг байна. Тэд хонь төхөөрөхөд 25000 төгрөгийн үнэтэй бөгөөд гэдэс дотрыг мөн арилгаад, цэвэрлээд өгдөг аж. Энэхүү газар мал төхөөрдөг иргэд “Сүүлийн үед мал төхөөрүүлэх иргэд хомсдож байна. Бид өмнө нь өдөрт 20 гаруй хонь төхөөрчихдөг байлаа. Энэ жил харин худалдан авалт эрс муудсанаас болоод орлого 70 хувиар багссан. Тиймээс бид орой 06:00 цагаас хойш мал нядалгааны газарт ажилладаг. Тэгж байж л гэр орон, үр хүүхдүүддээ зарцуулах мөнгөтэй болж байна шүү дээ” гэсэн юм.   

БУЛГАНЫ АЙРАГ 10 МЯНГАН ТӨГРӨГИЙН ҮНЭТЭЙ БАЙНА 

    Харин наадмын өдрүүдэд мах, малаас илүү чухал хүнс бол айраг. Хөдөөнийхөн наадмаас өмнө айраг уух гэж яаравчлан гүүгээ барьдаг бол хотыхон ч ялгаагүй тав, арван литр айргаар морь, бөхөө үзчихдэг заншилтай. Харин энэ жил айраг 10 мянга хүрчээ. Улаанбаатар хоттой ойрхон сумдын айраг долоон мянган төгрөгөөс эхэлж байна. Хүргэлттэй нь найман мянга гэх. Харин их хэмжээгээр бөөндөж авах бол 6000 мянган төгрөгөөс эхлэх аж. Жил бүр айраг элбэгтэй, ихээр зардаг аймаг, сумд түрүүлж гүүгээ барьдаг. Тодруулбал, хангайн бүсийн сумдууд гүүгээ барьж, айргаа зардаг байна.