Монголчууд хэрэлдэж ч дуусахгүй нь, луйвардуулж ч дуусахгүй нь. Сонгуулийн сурталчилгааны хэдэн өдөр ах, дүүсээ танихгүй болтлоо маргаж, Ардын нам, Ардчилсан намаараа хуваагдсан. Дараа нь, сонгууль луйвардсан, луйвардаагүй гээд хэрэлдэж л байна. Засаг, төрөө барих завгүй өдрүүд үргэлжилж байхад наадмын тасалбарын хэрүүл гараад ирлээ. Болж байгаа нэг ч “юм” алга гээд эвэр амлавал амлахаар л амьдарч байна, үнэндээ.

НААДМЫН ТАСАЛБАР НЬ АРД ТҮМЭНДЭЭ ХҮРЧ АМЖИЛГҮЙ ДУУСЧИХЛАА

       Ардын хувьсгалын 103 жилийн ойн баяр наадмын тасалбарыг өчигдөр худалдаанд гаргалаа.  Тодруулбал, Төв цэнгэлдэх хүрээлэн рүү нэвтрэх тасалбарыг enaadam.mn сайтаар худалдсан юм. Тасалбарыг суудлаасаа хамаарч 80-150 мянган төгрөгийн үнэтэй зарсан бөгөөд нийт 12 мянган ширхэг тасалбар борлууллаа. Хамгийн хачирхалтай нь, тасалбар нь 15 минутад дууссан гэх мэдээлэл цахим сүлжээнд хөвөрч байна.

       Албаныхан тайлбарлахдаа “Тасалбарын хамгийн сүүлийн захиалга 10:00 цагт хийгдсэн байна. Ер нь жил бүрийн наадмын тасалбар маш хурдан зарагдаад дуусдаг. Өмнө нь “Дүнжингарав”, “Драгон”, “Мишээл”, “Оргил” төвөөр наадмын тасалбарыг зардаг байсан бол цахимжуулаад багагүй хугацаа өнгөрлөө. Нэг утасны дугаараас хоёр тасалбар захиалах боломжтой. Энэ нь шагчдаас сэргийлж байгаа" гэх мэдээллийг хэвлэлд өгчээ.

       Гэтэл 12 мянган тасалбар хэнд хүрсэн нь тодорхойгүй дуусчихлаа. Ард түмэн аваагүй, наадмын тасалбарын эрэлд гарч байна гэсэн үг л дээ. Мөн энэ жил төрийн тэргүүн нар болон гадаадаас ирэх томоохон зочид төлөөлөгчид урилгаар үзэх бол УИХ-ын гишүүд болон сайд нар, түүний гэр бүлийнхэн урилгаар бус тасалбараа худалдан авсан. Тэгэхээр төрийн түшээд нь ч тасалбаргүй хоцорсон байж мэдэхээр байна.

Тэгвэл бид наадмын тасалбарын үнэ ханшны талаар дараах сурвалжилгыг бэлтгэлээ. Шагийн билет худалдаанд гарчээ. Тасалбар 20, 30-аар нь зарна гэсэн цахим сүлжээнд хөвөрч байна. Үнэндээ, шагчидаас сэргийлж байна гэсэн чинь шагчид нь 12 мянган тасалбарыг нь худалдаад авчихсан бололтой.

НААДМЫН ТАСАЛБАР 200-400 МЯНГАН ТӨГРӨГӨӨР ХУДАЛДАЖ БАЙНА

“Наадмын тасалбар авна, зарна” гэсэн хэд хэдэн фэйсбүүк групп нээгджээ. Хэд хэдэн хүн рүү холбогдож, үнэ ханш асууж үзлээ.

“А... А.и” гэх цахим хаягтай этгээд 30 тасалбар зарах зар оруулжээ. Тасалбарын үнэ 200-400 мянган төгрөгийн үнэтэй байна. Зар оруулсан даруйд иргэд захиалга өгч, долдугаар сарын 4-нд тасалбараа авахаар тохирчээ. Уг фэйсбүүк хаягийг шалгаж үзвэл 2023 оны наадмаар ч тасалбар олон тоогоор борлуулж байжээ.

Өөр нэг 17 билет зарна гэсэн хүн рүү холбогдож үзэхэд “Тасалбарын үнэ 250-400 мянган төгрөг. Бөхчүүдийн хажуу талынх нь үнэтэй байгаа. Дараалсан эгнээ байхгүй, тасалбар бүр хоёр суудлаараа байгаа. Авах бол урьдчилгаагаа хийгээд, долдугаар сарын 7-нд хүргүүлж аваарай” гэв.

Энэ мэт зар олноороо хөвөрч байна. Шагчид тасалбарынхаа тоог нууцалж, хуурамч хаягнаас 2-4 ширхгээр нь зарж байгаа бололтой. Ямартай ч ард түмэнд олдоогүй наадмын тасалбарыг цахим хуудсаар өчнөөнөөр нь зарж байна. Үүний дараа маишины зөвшөөрөл зарах юм байна.