Багшийн  дээдийн ойролцоо тээврийн хэрэгсэл жолоодож явсан иргэн таталт өгч, осол гаргасан  хэрэг гарсан. Тэгвэл түүнийг цагаан цамцтай залуу болох ЭЦА-ны Эдийн засгийн гэмт хэрэгтэй тэмцэх газрын Мөрдөн шалгах хэлтсийн мөрдөгч А.Бат-Оргил анхан шатны тусламж үзүүлж, амийг нь аварсан билээ. Бид түүнтэй энэ талаар цөөн хором ярилцлаа. 

         Ярилцлагыг видео хэлбэрээр эндээс үзээрэй. https://fb.watch/sPKqeRCG5T/

-Сайн байна уу, та. Эрдэнэт хүний амь аварсан танд баярлалаа. Тухайн үед чухам юу болсон юм бэ?

                -Өчигдөр /уржигдар/ 14:00 цагийн үед Багшийн дээдийн баруун урд талд зам тээврийн осол гарсан. Тухайн үед миний хувьд албан үүргээ гүйцэтгээд явж байсан юм.  Осол болсны дараа иргэд тойроод, шуугилдаж байхыг хараад шууд очсон. Тэгээд автомашиныг нь унтраагаад, анхан шатны тусламж үзүүлсэн. Хэдий миний ажил ч гэлээ нэг гэр бүлийг бүтэн үлдээсэндээ баяртай байна.

-Таныг очиход тухай иргэний биеийн байдал ямар байсан бэ?       

                -Намайг очиход 50 орчим насны эрэгтэй жолооны хүрдэн дээрээ таталт өгсөн байдалтай, ухаангүй байсан. Азаар суудлын бүсээ зүүсэн. Мөн ослын дэр дэлгэгдсэн байдалтай байсан. Тэгээд газар хэвтүүлэх шаардлагатай гэж үзээд машинаас буулгаж, агаарын чөлөөлөхийн тулд иргэдийг холдуулж, тусламж үзүүлж эхэлсэн.  

Үүний дараа тэнд явсан сувилагч даралтыг нь хэмжиж, дусал хийсэн. Тэгээд удалгүй түргэж тусламжийн машин ирсэн.

-Амийг нь аварсан иргэнтэйгээ уулзсан уу?

                -Одоогоор уулзаж амжаагүй байна. Тухайн хүн маань ухаангүй байсан болохоор намайг санахгүй байгаа байх. 

-Та өмнө нь яаралтай тусламжаар суралцаж байсан юм уу?             

                -Би ямар ч үед иргэдийн амь нас, эрүүл мэнд, эд хөрөнгийг хамгаалах үүрэгтэй тангараг өргөсөн цагдаа хүн шүү дээ. Мэргэжлээрээ суралцаж, ажиллаж байх үедээ анхан тусламж үзүүлэхийг сурсан. Мэргэжлийн хүн учир бусад хүнийг бодвол сандрах, айх зүйлгүй тусламж үзүүлж чадсан байх. 

-Та цагдаагийн байгууллагад хэд дэх жилдээ ажиллаж байгаа вэ?

                                -Хүүхэд байхаасаа л цагдаа болохыг мөрөөддөг байлаа. Тэгээд 2012 онд Дотоод Хэргийн Их Сургуульд суралцаж эхэлсэн. Мэргэжлээрээ зургаа дахь жилдээ ажиллаж байна. Сургуулиа төгсөөд төрөлх нутаг болох Сүхбаатар аймагтаа хэсгийн төлөөлөгчөөр ажилласан.  Харин Эрүүгийн цагдаагийн албанд 2022 оноос хойш ажиллаж байгаа.

-Ярилцсанд баярлалаа.

                -Баярлалаа.  Иргэд та бүхэн замын хөдөлгөөнд оролцохдоо анхаарал болгоомжтой байж, суудлыг бүсээ заавал зүүгээрэй. Мөн эрүүл мэндийн байдал тогтворгүй байх үедээ жолооны хүрдний ард битгий суугаарай гэж уриалмаар байна.