Монголын шинэ үеийн утга зохиолыг үндэслэгч, Их зохиолч Д.Нацагдорж, Төр, нийгэм, цэргийн нэрт зүтгэлтэн Н.Жадамба нарын санаачилгаар 1924 онд “Ардын цэрэг” нэрээр уншигч түмэнд анхлан хүрсэн “Улаан од” нэрээрээ түмэндээ алдаршсан одоогийн “Соёмбо” сонин 100 нас хүрлээ.

         Тэгвэл Батлан хамгаалахын сайд Г.Сайханбаяр мэндчилгээ дэвшүүлжээ. Тэрбээр “Монгол Улсын хэвлэл, мэдээллийн мэргэжлийн ууган байгууллагын нэг Цэргийн төв хэвлэлийн 100 жилийн ойн баярын мэндийг цэргийн хэвлэл, мэдээллийн салбарт хүчин зүтгэж ажил, амьдралаа холбосон үе үеийн удирдлагууд, сэтгүүлч, сурвалжлагчид, идэвхтэн бичигчид, эрхэм уншигчид Та бүхэнд өргөн дэвшүүлье.  ​​​​​​​​​​Монголын шинэ үеийн утга зохиолыг үндэслэгч, Их зохиолч Д.Нацагдорж, Төр, нийгэм, цэргийн нэрт зүтгэлтэн Н.Жадамба нарын санаачлагаар мэндэлж, ”Ардын цэрэг” нэрээр уншигч түмэнд хүрсэн цэргийн сонин анхны дугаараасаа төр засгийн бодлого шийдвэрийг түмэн олондоо шуурхай түгээн сурталчилахын зэрэгцээ гадаад ертөнцийн соёл, сонин сайхан бүхний толь нь байж, цэрэг, ардыг бичиг үсэгт сургах, сурган хүмүүжүүлэх, танин мэдэхүй, оюуны мэлмийг нээх, соён гэгээрүүлэхэд үнэтэй хувь нэмэр оруулсан юм. ​​​​​​Шинэ тутамд тусгаар тогтолоо сэргээн мандуулсан буурал түүхтэй атлаа шинэ залуухан Монгол Улсад цэргийн сонин мэндэлсэн явдал нь тухайн цаг үедээ ус, агаар мэт хэрэгтэй амин чухал үйл хэрэг байсан.

         Учир нь, Монголын ард түмний үндэсний ухамсарыг сэргээх, эх оронч үзлээр хүмүүжүүлэх, тусгаар тогтнолоо баттай хамгаалах үйлсийн төлөө нэгэн үзүүрт сэтгэлээр тууштай зүтгэх, цэргийн эрдэмд шамдан боловсрох, эх орон дуудсан цагт ямагт бэлэн байх ухамсарыг төлөвшүүлэх асуудал нэн чухлаар тавигдаж, цэргийн сонин ч энэ үүргийг нэр төртэй гүйцэтгэсэн билээ. ​​​​​​​​​​Энэ онд 85 жилийнх нь ой тохиож буй Халхын голын байлдаан болон 1945 оны Чөлөөлөх дайнд оролцсон цорын ганц хэвлэл, мэдээллийн байгууллага болох цэргийн сонин дайны эхний өдрөөс ялалтын тугаа мандуулах мөч хүртэл дайчин эрстэйгээ галын шугамд хамт байж, эрэлхэг зоригийг нь бадраан “Эх орны төлөө” фронтын сониноороо эрх чөлөө, тусгаар тогтнолын дуу хоолой нь болж байлаа. “Улаан Од” нэрээрээ түмэн олондоо алдаршсан өнөөгийн “Соёмбо” сонин дайны жилүүдэд ч, энх цагийн бүтээн байгуулалтад ч салбарынхаа төдийгүй улс, нийгмийнхээ хөгжлийн түүчээлэн манлайлагч, оюун санааны ертөнцийн шавхагдашгүй ундарга байсаар ирсэнийг бахдан дурьдахад таатай байна. Түүнчлэн Бүх цэргийн зөвлөлийн тэргүүлэгч, Бригад командлагч Н.Жадамба, хурандаа генерал С.Равдан, дэслэгч генерал С.Дамдин, Ч.Түмэндэмбэрэл, хошууч генерал Г.Дугарсүрэн, Л.Пүрэвдорж нарын алтан мөрдөстнүүд цэргийн сониноос төрөн гарч, батлан хамгаалах салбарынхаа хөгжил дэвшлийг түүчээлсэнийг Монгол Улсад генерал цол бий болсоны 80 жилийн ойн жил онцлох учиртай. ​Хоёр дахь зууныхаа хөгжлийн гараан дээр цэргийн сонин нь үйл ажиллагааны чиг үүргээрээ ижил төстэй цэргийн хэвлэл, мэдээллийн байгууллагуудыг нэгтгэн бэхжүүлэх бодлогын хүрээнд “Дуулга” студитэй нэгдэн салбарын хэвлэл мэдээллийн бие даасан байгууллага болон төлөвшиж байна. Мэдээллийн үнэ цэн, ач холбогдол нэн чухлаар тавигдах болсон өнөө үед үй түмэн зорилго бүхий мэдээллийн урсгал дунд өөрийн байр суурийг баттай эзлэн оршин тогтнох цоо шинэ нөхцөл, сорилттой бид бүхэн тулгарч байна.​​​Энэ хариуцлагатай цаг мөчид аль ч үед дайчин эрсийнхээ оюун санааны ертөнцийн чиглүүлэгч, манлайлагч нь байж ирсэн ахмад үеийнхнийхээ бүтээсэн дайчин замнал, бахархам үйл хэргийг залгамжилж, уламжлал, шинэчлэлийг хослуулан Батлан хамгаалах салбарынхаа төдийгүй, улсынхаа үндэсний язгуур эрх ашиг, сонирхолыг мэдээллийн орон зайд баттай хамгаалагч, найдвартай хүчин болж төлөвшинө гэдэгт итгэл дүүрэн байна.

Цэргийн сэтгүүлч, сурвалжлагч нар, идэвхтэн бичигчид, эрдэм оюуныг шүтэгч эрхэм уншигчид Та бүхний үйлс бүхэн нь өөдөө, ухаан сэргэг, бүтээл нь арвин байг” хэмээжээ.