Сайжруулсан шахмал түлшийг хэрэглээнд нэвтрүүлээд дөрвөн жил өнгөрчээ. Энэ хугацаанд угаарын хийнд хордсон тухай дуудлага нийслэлийн иргэдээс өдөр бүр шахуу ирж, албаныхан ажиллаж байна. Харамсалтай нь, угаарын хийн хордлогын улмаас эрүүл мэнд, амиараа хохирсон иргэдийн тоо өдөр ирэх тусам нэмэгдэж байна.

Тэгвэл 2024 он гарсаар угаарын хийнд 282 хүн өртөж, эмнэлгийн тусламж авчээ.

       Энэ талаар Нийгмийн эрүүл мэндийн үндэсний төвийн хариуцах албаны хүний мэдээлж буйгаар “Нэгдүгээр сарын 1-ээс нэгдүгээр сарын 27-ны хугацаанд 282 хүн угаарын хийнд өртөж, 232 нь эмнэлгийн тусламж авч гэртээ буцсан. Харин 39 хүн эмнэлэгт хэвтэн эмчилгээ хийлгэсэн. Харамсалтай нь, угаарын хийн хордлогын улмаас дөрвөн хүн амиа алдсан. Угаартсан иргэдийн 137 нь хүүхэд, 145 нь насанд хүрсэн хүн байсан. Мөн эндээс харвал угаарын хийнд өртсөн 282 иргэний 106 нь Баянзүрх, 35 нь Сонгинохайрхан, 37 нь Сүхбаатар, 45 нь Чингэлтэй, 20 нь Хан-Уул, 14 нь Баянгол, нэг нь Налайх дүүрэгт бүртгэлтэй байна. Мөн Баян-Өлгий аймагт 15, Дорнод аймагт есөн хүн угаарын хийнд өртсөн гэх дуудлага, мэдээлэл бүртгэгдсэн” гэсэн юм.

Иймд иргэд та бүхнийг угаарын хийнд өртөхөөс сэрэмжлүүлж байна.