Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жил, Ардчилсан хувьсгалын 33 жилийн ойн Үндэсний их баяр наадмын хүчит бөхийн барилдаанд Архангай аймгийн Цэнхэр сумын харьяат Мягмарын Бадарч түрүүлж, улсын арслан болсон билээ. Харамсалтай нь, түрүү бөхөөс шинжилгээгээр сэргээшийн төрлийн бодис илэрсэн байдаг.

Үндэсний их баяр наадмыг зохион байгуулах үндэсний хороо хуралдаж, Улсын арслан М.Бадарчийн цолыг хурааж, барилдах эрхийг дөрвөн жилээр хасах шийдвэр гаргасан. Хуулиараа цол хураах шийдвэрийг Ерөнхийлөгчид хүргүүлж, эцэслэгдэх учиртай. Цол хураах асуудал хүлээлтийн байдал байгаа.

Харин Улсын арслан М.Бадарч Монголын Олон улсын ба үндэсний Спортын арбитрын шүүхийн дэргэдэх допингийн давж заалдах комисс-т хандаж, өөрөөсөө сэргээш илэрсэн эсэхийг нягтлан шалгаж, хянан шийдвэрлүүлэх хүсэлт өгөөд байгаа билээ. М.Бадарчийн гомдлыг Спортын арбитрын шүүхийн хуралдаанаар өнөөдөр хэлэлцжээ.

Энэ талаар улсын арслан М.Бадарчаас тодрууллаа. Тэрбээр “Цахим сүлжээнд ташаа мэдээлэл түгж байх шиг байна. Миний гомдлын урьдчилсан хэлэлцүүлгээр хэлэлцсэн. Түүнээс биш, Арбитрын шүүхийн албан ёсны шийдвэр гараагүй байна” гэлээ.