Эргэлт.мн мэдээллийн сайт шинэ нээж байна. Уг буланд улстөрч, төрийн албан хаагч, төрийн өмчит үйлдвэрийн дарга, албан хаагчдын хөрөнгийг нээлттэйгээр олон нийтэд хүргэнэ.

        Бид энэ удаад “Эрдэнэт үйлдвэр" ТӨҮГ-ийн хамтын ажиллагаа, нийгмийн асуудал хариуцсан орлогч захирал Цогтын Бат-Энхийн хөрөнгийг хүргэх болно.МАН-ын Нарийн бичгийн дарга асан Ц.Бат-Энх өнгөрсөн 2021 онд “Эрдэнэт үйлдвэр" ТӨҮГ-ийн орлогч даргаар томилогдсон билээ.

      Ц.Бат-Энхийн нийт хөрөнгө долоон тэрбум төгрөг. Тодруулбал, тэрбээр 2022 онд хөрөнгөө мэдүүлэхдээ жилийн 196 сая төгрөгийн орлоготой гэж мэдүүлжээ. Мөн нэг амины орон сууц, нэг үйлдвэрийн зориулалттай орон сууцтай, үнэлгээ нь 4.062.150.000 төгрөг гэжээ. Тэрбээр Bentley, Continental, Toyota, Land Cruiser 200 маркийн автомашинтай бөгөөд үнэлгээ нь 480 сая төгрөг аж.

          Ц.Бат-Энхийн хобби нь хурдан морь. Энэ ч утгаараа тэрбээр 1.9 тэрбум төгрөгийн малтай ажээ. Тодруулбал, 122 тооны хурдан удмын адуу, 460 адуу, 192 үхэр, 1012 хоньтой. Тэрбээр өмчлөх эрхийн хоёр газартай, газраа таван сая төгрөгөөр үнэлж мэдүүлжээ. Ц.Бат-Энх 115 сая төгрөгийн үнэт эдлэлтэй, дотоодын хадгаламждаа 4.6 сая төгрөгтэй. Бусдаас авах авлага нь 910 сая төгрөг бол Төрийн банканд 60 сая төгрөгийн зээлтэй. Аль нэг компанид хувьцаа эзэмшдэггүй, эрх, патент, тусгай зөвшөөрөл байхгүй гэж мэдүүлжээ. Өөрөөр хэлбэл, хувийн компанигүй, хөрөнгө оруулсан компани байхгүй, зөвхөн төрийн албан хаагч ажээ.