Италийн Буста Ацизод хоёрдугаар сарын 29-нд эхлэх олимпын эрх олгох тэмцээнийг Олон улсын боксын холбооны гурван одтой шүүгч Б.Атарбаяр шүүхээр болжээ. Тэрбээр өнгөрсөн жил эмэгтэй боксын ДАШТ-ий шүүгчээр ажилласан туршлагатай юм. 

   Сонирхогчдын боксын төрлөөр “Парис 2024” олимпын эрх авах тивийн тэмцээнүүд дууссан. Тивээсээ эрх авч чадаагүй тамирчдыг эрх олгох хоёр тэмцээн хүлээж буй. Үүний нэг нь Италийн Буста Ацизод болох тэмцээн юм. Тус тэмцээнээр эмэгтэй 22, эрэгтэй 28 боксчинд эрх олгоно. Өөрөөр хэлбэл, жин тус бүрийн медаль авсан тамирчид Францыг зорино. Харин эрх олгох сүүлийн тэмцээн ирэх тавдугаар сард Тайландын Бангкок хотноо болно.