Яармагийн 300 ортой эмнэлэг буюу Эх, нярай хүүхдийн үндэсний хоёрдугаар төвд  хэвтэн эмчлүүлж буй 0-2 насны 17 хүүхэд тариа хийлгэсний дараа таталт өгч, биеийн байдал нь муудсан талаар бид өмнө нь мэдээлсэн.

Тодруулбал, томуу, томуу төст өвчнөөр өвдөж, ханиад нь хүндэрсэн, хатгаа туссан гэх шалтгаанаар тус эмнэлэгт хэвтэж, 4-5 хоног эмчилгээ хийлгэсэн 17 хүүхдийн биеийн байдал гэнэт муудаж, таталт өгч, өндөр халуурч, сэхээн амьдруулах тасагт шилжсэн билээ. Хууль хяналтын байгууллагаас тус эмнэлэгт шалгалтын ажиллагаа явуулж, мөрдөн шалгах ажиллагааг үргэлжлүүлж байна.

Тэгвэл бид хүүхдүүдийн талаар Эх, нярай хүүхдийн үндэсний хоёрдугаар төвийн захирал А.Эрдэнэтуяагаас тодрууллаа.

           Тэрбээр “Тариа тариулсны улмаас биеийн байдал нь муудсан гэх 17 хүүхдийн эрүүл мэнд сайжирч, тогтворжсон. Мөн хүүхдүүдийн ханиад, томуу ч эдгэж, эмнэлгээс гарсан. Одоо хяналтын эмчийн ажиглалтад байгаа. Хяналтын эмч хүүхдүүдийн аав, ээжтэй холбогдож, байнгын биеийн байдлыг нь хянаж, утсаар зөвлөгөө, мэдээлэл өгч байгаа. Тухайн 17 хүүхдээс биеийн байдал нь дахин муудаж, эмнэлэгт ирсэн тохиолдол байхгүй.

Энэ асуудал юунаас болж гарсан, хүүхдүүдийн биед яагаад гэнэт өөрчлөлт гарсан зэргийн хариу гарсан гэсэн. Бидэнд албан ёсоор шалгалтын хариуг хэлээгүй байна. Гэхдээ сувилахуйн технологийн стандарт зөрчигдсөн, тариагаа найруулаад удсан, хүүхдийн биед тариагаа хурдан шахсан байх магадлалтай. Энэ үндэслэлээр хууль хяналтын байгууллагаас шалгаж байна. Тухайн өдөр ээлжинд гарч, хүүхдүүдэд тариа хийсэн сувилагчдыг ээлжинд гаргахгүй, мэргэжлийн ажлыг нь хийлгэхгүй байгаа” гэлээ.