Өвөрхангай аймгийн Засаг дарга асан А.Ишдорж орон нутгийн замд тээврийн хэрэгсэл жолоодож яваад зам тээврийн ноцтой осол гаргаж, хүний амь хөнөөсөн хэрэг гарсан. Тодруулбал, өнгөрсөн оны наймдугаар сарын 11-ний 00:16 цагт Өвөрхангай аймгийн Арвайхээр сумын “Хурд” ШТС-ын ойролцоо зорчиж яваад 57 настай эрэгтэйг дайрсан байна. Талийгаач Б нь Улаанбаатараас Ховд чиглэлийн автобусаар зорчиж явсан бөгөөд зам гарах үедээ дайруулж, эмнэлгийн тусламж авч чадалгүй газар дээрээ амьсгал хураасан байдаг. Засаг дарга асан А.Ишдорж албаны машин унаж явсан бөгөөд хувийн ажлаар Улаанбаатар хот руу жолоочгүй явсан гэх. Ингээд буцаж явахдаа хурд хэтрүүлж, хүний амь хөнөөсөн. 

Бид энэ хэргийн талаар Өвөрхангай аймгийн Засаг дарга асан А.Ишдоржтой холбогдож тодрууллаа. Тэрбээр ослын дараа Засаг даргын ажлаа хүлээлгэн өгч, хууль хяналтын байгууллагад шалгагдаж байгаа юм.

             -Танд холбогдох хэргийн шүүх хурал болсон уу?

-Шүүх хурлын тов гараагүй байна. Одоогийн байдлаар хууль хяналтын байгууллагад шалгагдаад явж байгаа. Шүүх хурал хэзээ болохыг мэдэхгүй байна.

            -Хохирогчийн ар гэрийнхэнтэй уулзсан болов уу, та?

            -Холбогдож, уулзсан.

-Энэ хэрэг дээр ямар байр суурьтай байна вэ?

-Хуулийн дагуу шийдэгдэх байх. Хуулийн байгууллага шийдвэр гаргана шүү дээ. Бусдаар надад хэлэх санал, байр суурь алга.