Өмнөх УИХ-д гишүүн Д.Өнөрболор 15.2 тэрбумын орон сууцаар “ангийнхнаа” тэргүүлж, УИХ-ын гишүүн С.Амарсайхан 10.9 тэрбумын орон сууцаар удаалдаг байв. Харин өнгөрөгч УИХ-ын сонгуулиар Д.Өнөрболор унаж, Ч.Номин, Б.Түвшин гэх хоёр тэрбумтан орж ирсэн. Ингэснээр одоо УИХ-ын гишүүн Ч.Номин 17 тэрбумын найман орон сууц, 1.0 тэрбумын гурван жийп, 24 тэрбум төгрөгийн авлагаараа УИХ-ын гишүүдийн хөрөнгийг тэргүүлж буй бол жилдээ 9.8 тэрбум төгрөгийн орлоготой, 10.4 тэрбумын орон сууцтай, 880 сая төгрөгийн гурван жийптэй, 13 тэрбумын авлагатайгаараа УИХ-ын гишүүн Б.Түвшин удаалж буй. Харин өмнөх УИХ-д хөрөнгөөрөө хоёрт бичигдэж асан С.Амарсайхан энэ УИХ-д байр ухарч, гуравт бичигдэж буй.

Уг нь насаараа бизнес хийсэн, Ж.Ганбаатар мэтийн 30 жил чихэр зөөж, барилга барьсан түшээдийн дэргэд Б.Түвшингийн түүх тийм ч зузаан биш. 2003 оноос хойш П.Батсайханы “АПУ” ХК-ийн Санхүү эрхэлсэн захирлаар ажилласан, улмаар 2016 онд Хан-Уул дүүргийн НИТХ-ын төлөөлөгчөөр сонгогдож, мөн ондоо “Миг даатгал” ХХК-ийг эхнэртэйгээ хамтран эзэмшиж, удирдаж эхэлсэн нэгэн. Өөрөөр бол, Б.Түвшингийн хувийн бизнес хийсэн хугацаа нь хэдхэн жил. Гол нь, УИХ-ын гишүүн Б.Түвшин түшээдээ тэргүүлэх хэмжээнд түрийвчээ яаж зузаалж чадсан бэ гэхээр доор дурдах компаниудаар төсвийн санхүүжилттэй төрийн тендерүүдийг түүдэг нэгэн.

Түүний толгой эргэм олон компаниас тендерийн арвин түүхтэй компаниудыг нь түүж танилцуулъя.

УИХ-ын гишүүн Б.Түвшингийн “Хаан даатгал” ХХК нь 2017 оноос хойш төрийн 114 тендерт шалгараад байгаа. Өнгөрөгч 2024 онд л гэхэд төрийн 34 тендерт шалгарсан. Жишээ нь,

“Эрдэнэт үйлдвэр” ТӨХК-ийн тээврийн хэрэгслийн даатгал- 350 сая төгрөгийн тендер

“ИНЕГ” ТӨҮГ-ын барилга, байгууламжийн даатгал- 100 сая төгрөгийн тендер

“Тавантолгой төмөр зам” ТӨХК-ийн эд хөрөнгийн даатгал- 317 сая төгрөгийн тендер

ЦЕГ-ын алба хаагчдын гэнэтийн ослын болон тээврийн хэрэгслийн даатгал 243 сая төгрөгийн тендер гэх мэтээр “халааслажээ”.

Сонирхуулахад, Б.Түвшин өнгөрөгч 2024 оны УИХ-ын сонгуулиас яг сарын өмнө өөрийн “Хаан даатгал” ХХК-ийг Ж.Баярсайхан гэгчид шилжүүлсэн. Учир нь, УИХ-ын гишүүн төрөөс тендер авдаг компанитай байж болохгүй хуультай. “Хаан даатгал” ХХК-ийг эзэмшигч болсон Ж.Баярсайхан нь үнэндээ УИХ-ын гишүүн Б.Түвшингийн аавынх нь төрсөн дүүгийн хүү буюу үеэл нь. Тэгэхээр төрөөс 114 тендер авсан “Хаан даатгал” ХХК нь одоо ч УИХ-ын гишүүн Б.Түвшинд хамааралтай хэвээр гэж болно.

УИХ-ын гишүүн Б.Түвшин эхнэр Х.Хандсүрэнтэйгээ “Миг даатгал” ХХК-ийг 2018 оноос хойш эзэмшиж буй. Тэгвэл “Миг даатгал” ХХК нь 2018 оноос хойш төрийн 32 тендерт шалгарсан. Зөвхөн өнгөрөгч 2024 онд зургаан тендерт шалгарсан байна. Жишээ нь,

“МИАТ” ТӨХК-ийн нисэх бүрэлдэхүүний амь нас, гэнэтийн ослын даатгал- 366 сая төгрөгийн тендер

Шүүхийн ерөнхий зөвлөлийн шүүгчдийн амь нас, эрүүл мэндийн даатгал- 1.5 тэрбум төгрөгийн тендер гэх мэтээр шалгарсан байна.

УИХ-ын гишүүн Б.Түвшин “Мултипак” ХХК-ийг дээр дурдсан үеэл Ж.Баярсайхантайгаа хамтран эзэмшдэг. “Мултипак” ХХК нь 2019 онд “Эрдэнэс тавантолгой” ХК-ийн Цанхийн баруун уурхайн нүүрс ачилтын гүйцэтгэгчийг шалгаруулах 9.3 тэрбум төгрөгийн тендерт шалгарсан. Тухайн үед Б.Түвшин НИТХ-ын төлөөлөгч сэтэртэй байлаа.

УИХ-ын гишүүн Б.Түвшингийн үүсгэн байгуулсан “Засагт хаан” ХХК нь 200 гаруй уурхайчинтай. Уул уурхайн төр, хувийн томоохон компаниудын хөрс хуулалт, нүүрс олборлолтыг гэрээгээр гүйцэтгэдэг. Одоо “Засагт хаан” ХХК нь Өмнөговь аймгийн Цогтцэций сумын нутагт орших “Эрдэнэс тавантолгой” ХК-ийн Баруун цанхийн нүүрс олборлолтын ажлыг тус тус гүйцэтгэж байна. Уг нь Ерөнхий сайд Л.Оюун-Эрдэнийн санаачилснаар 2023 оны хавар Ашиг сонирхлын зөрчлөөс урьдчилан сэргийлэх тухай хуульд өөрчлөлт оруулсан. Ингэснээр УИХ, Засгийн газрын гишүүн, аймаг, дүүргийн Засаг дарга нар төрөөс тендер авахыг хориглосон. Энэ өөрчлөлтийг хийснээр тендерчид төрд орж ирэх боломжгүй боллоо гэж мэдэгдэж, ард түмэн ч түүнд нь алга ташиж бай. Харамсалтай нь, хууль өөрчлөөд ч төр рүү хошуурсан тендерчдийг зогсоож  чадахгүйн тод жишээ нь Б.Түвшин болж байна.