Нийслэлд үүрийн 05:00 цагийн үед орсон усархаг аадар борооны улмаас үерт автсан автозамын усыг соруулах ажлыг Геодези, Усны барилга байгууламжийн газар ОНӨААТҮГ хийж байна.

Энэ талаар бид тус газрын Шуурхай мэдээлэл албаны мэргэжилтнээс тодруулахад "Үүрийн 05:30-аас эхлэн 10 тонн, зургаан тонн, 1.5 тоннын ус соруулах гурван машинаар автозамын усыг зайлуулж байгаа. Одоогийн байдлаар Энхтайваны гүүрэн доорх замын усыг соруулж дуусаад, Гэгээнтэн цогцолборын ойролцоох усыг соруулахаар 10 тоннын ус соруулах машин хөдөлсөн.  Мөн Хан-Уул дүүрэгт байрлах “Эрэл” ХХК-ийн ойролцоох байрны урд талын замын усыг соруулж байгаа. Харин Баянзүрх дүүргийн "Дүнжингарав" худалдааны төвийн урд хэсгийн автозамын усыг өглөө соруулсан. Баянгол дүүрэгт байрлах Вокзал орчмын үерийн шугам дээр ус тогтсоныг соруулж дуусгасан. Түүнчлэн Яармагийн нүхэн гарцын усыг тэнд байрлах нацосс станцаар соруулж дууссан" гэлээ.

    Геодези, Усны барилга байгууламжийн газар  зургаа, 10 , 1.5 тоннын ус соруулах гурван машинтай бөгөөд бүгд автозамын үерийн усыг соруулахаар ажиллаж байгаа аж.

    Харин Нийслэлийн шуурхай, удирдлага зохицуулалтын төвд үерт автсан өрхийн тухай дуудлага ирээгүй байна.

Б.БАДАМЗУЛ