Монголд анх удаа  “Wellbeing” эрүүл амьдралын экспо 2024 оны  есдүгээр сарын 21,22-ний өдрүүдэд  “Үндэсний цэцэрлэгт хүрээлэн”-гийн талбайд болох гэж байна. Ингэхдээ фитнес, иог, хоол зүйн зөвлөгөө, сургалт, гар дээр суниалт, марафон гүйлт зэрэг олон арга хэмжээ болж байгаагаараа онцлогтой аж. Мөн Монгол Улсын Хоол зүйчдийн холбооноос хоол зүйчид оролцон, үнэгүй зөвлөгөө, сургалт явуулах юм байна. Энэ талаар Монгол Улсын Хоол зүйчдийн холбооны гүйцэтгэх захирал, “Рехамид” нэгдсэн эмнэлгийн хоол зүйч Б. Ариунзулаас тодрууллаа.

-Энэхүү арга хэмжээнд хэдэн хоол зүйч зөвлөгөө, сургалт өгч байгаа вэ?

             -Хоёр өдөр үргэлжлэх энэхүү арга хэмжээнд манай холбооноос 20 гаруй хоол зүйч ээлжээр ажиллана. Хоёр хэсэгтэй. Эхнийх нь илтгэлийн хэсэг буюу тухайн хэсгийн онцлог хэсэг дээр ажиллах хоол зүйчид гэж байгаа. Жишээ нь нярайн хүүхдийн үеийн хооллолтын юун дээр анхаарах хэрэгтэй вэ, ерөнхий зарчим  нь ямархуу байдаг талаар зөвлөгөө өгөх юм. Хоёрдох  хэсэг нь тухайн хүний биеийн онцлог, бүтцийг тодорхойлдог аппаратаар үзлэг хийн, зөвлөгөө өгч ажиллана.

-Зөвлөгөө авах, аппаратаар үзүүлэхэд ямар үнэтэй байх вэ?

      -Үнэгүй. Аппаратын хувьд хүүхэд болон насанд хүрэгчдийг үнэлж болдог. Хүүхдүүдийн хувьд өндрөөс нь хамаарч нэг метр 20 сантметрээс дээш өндөртэй хүүхдүүдийг үздэг. Гэхдээ хүний тоо хязгаартайгаа хоёр өдөртөө зөвхөн үдээс хойш нэг цаг үзнэ гэж төлөвлөөд байна.

-Буруу хооллолт, амьдралын буруу хэв маягаас болж үүсэх магадлалтай ямар, ямар өвчин байдаг вэ?

          -Монгол Улсын хэмжээнд сүүлийн жилүүдэд хорт хавдар өндөр үзүүлэлтэй байна. Тэр тусмаа элэгний хорт хавдар, хоол боловсруулах эрхтний хорт хавдар зэрэг өвчлөл их байдаг. Халдварын бус өвчлөлийн үед чихрийн шижин сүүлийн үед ихэд хурдацтай тархаж байна.  Эдгээр өвчлөл нь амьдралын буруу хэв маяг, буруу хооллолтоос шалтгаалдаг. Хүн өөртөө  гаргадаг цаг хугацаа, мэдлэгээс хамаарч өвчлөх эрсдэл багасдаг. Сүүлийн үед хамгийн их гарч байгаа өвчлөл болох хорт хавдарын үеийн хооллолт, чихэр шижингийн үеийн хооллолтын талаар мэдээ, мэдээлэл хүргэнэ. 2021 онд дэлхий дахинаа чихрийн шижин өвчнөөр 6.7 сая хүн нас барсан гэх судалгаа байдаг. Мөн зургаан жирэмсэн эмэгтэйн нэг нь чихрийн шижинтэй болох эрсдэлтэй,  2045 он гэхэд 700 саяд хүрнэ гэсэн статистик тоо байдаг. Тэгэхээр маш олон хүнийг хамарсан архаг өвчин эмгэг юм. Тиймээс  хоолны зөв дэглэм , дасгал хөдөлгөөн, эмийн эмчилгээ,  эмчийн хяналтанд  байж эрүүл байхын төлөө  тэмцэх хэрэгтэй юм. Зөвхөн өвдсөн хойноо биш өвдөхөөсөө өмнө ч үүнээс урьдчилан сэргийлэх боломжтой. Үүний хамгийн сайн арга бол эрүүл зөв хооллолт юм.

-Энэхүү үйл ажиллагааны зорилго нь юу вэ?

      -Нийгмийн эрүүл мэндийн төлөө энэхүү үйл ажиллагаанд оролцож байгаа. Хүмүүст нас болгон өөр өөрийн онцлогтой, хооллолт нь янз янз байдгийг таниулах зорилготой. Ингэснээр өвчлөлөөс урьдчилан сэргийлэх боломжтой болно. Мөн хүмүүс нэг үеэ бодвол эрүүл амьдралын хэв маяг, зөв хооллолтын талаар  их сонирхох болсон. Үүнийг дагаад хоол зүйн зөвлөгөө өгдөг хүмүүс ч ихэссэн. Гэхдээ мэргэжлийн хоол зүйчдээс зөвлөгөө, хаанаас яаж авахаа мэдэхгүй хүмүүс ч их байгаа. Тиймээс мэргэжлийн хүмүүсээс зөвлөгөө авах боломжийг бий болгож, таниулаж байгаа нь бидний гол зорилго юм.