Сүүлийн үед бага насны хүүхдүүдийн дунд суулгаж, гүйлгэдэг, өндөр халуурдаг томуу, томуу төст өвчний шинжтэй вирус дэлгэрч байна гэх мэдээлэл иргэдээс ирж байна. Үүнтэй холбогдуулан сургууль, цэцэрлэг орж эхэлснээс хойш энэ төрлийн өвчлөл ямар түвшинд байгаа талаар, иргэдэд мэдээлэл, сэрэмжлүүлэг хүргэхээр Нийслэлийн эрүүл мэндийн газрын нийтийн эрүүл ахуй, халдварт өвчний хэлтсийн дарга З.Болормаагаас тодрууллаа.

-Сургууль, цэцэрлэг эхэлснээс хойш бага насны хүүхдүүдийн дунд өндөр халуурч, гүйлгэдэг ханиадны шинжтэй өвчлөл нэмэгдэж бий.  Энэ талаар тодорхой мэдээлэл өгөөч.

-Түргэн тусламжийн төвийн дуудлагууд болон дүүргийн эрүүл мэндийн төвүүдээс бид томуу, томуу төст өвчний мэдээллийг авдаг. Дээрх байгууллагуудаас ирсэн мэдээгээр тус өвчлөл ихэссэн гэх мэдээлэл хараахан ирээгүй байна.

Томуу болон томуу төст өвчний улирал аравдугаар сарын сүүлээр эхэлдэг. Тиймээс бид урьдчилан сэргийлэх үүднээс бага насны буюу 2-5 насны хүүхдүүдийг вакцинжуулалтад хамруулж эхэлсэн. Томуу, томуу төст өвчнөөр өвдөж буй иргэдийн 70 хувийг 0-9 насны хүүхдүүд эзэлдэг. Үүнээс тус өвчлөлөөр өвдөж буй хүүхдүүдийн 50-аас дээш хувь нь 2-4 насны хүүхдүүд байдаг бол 5-8 насны хүүхдүүд 20 гаруй хувийг эзэлж байна. Энэ жилийн хувьд томуу, томуу төст өвчнөөс урьдчилан сэргийлэх үүднээс вакцинжуулалтыг эрт эхлүүлсэн.

-Томуу, томуу төст өвчний вакцинжуулалт хэзээнээс эхэлсэн бэ?

-Зорилтот бүлгийн иргэдийг наймдугаар сарын 26-аас дархлаажуулалтад хамруулж эхэлсэн. Зорилтот бүлгийн иргэдэд 2-5 насны хүүхдүүд, жирэмсэн эхчүүд, 65-аас дээш настай өндөр настан болон хөгжлийн бэрхшээлтэй иргэд, эмнэлгийн ажилтнууд багтдаг. Эмнэлгийн ажилтнуудын хувьд эрсдэлтэй бүсэд ажилладаг учир дархлаажуулалтад зайлшгүй хамрагдах ёстой. Есдүгээр сарын 10-ны байдлаар 45 гаруй хүүхэд дархлаажуулалтад хамрагдсан байна.

-Дархлаажуулалтад эрт хамрагдахын давуу тал нь юу вэ, яагаад энэ жил вакцинжуулалтыг эрт эхлүүлж байна вэ?

- Томуу, томуу төст өвчний вакцин хийснээс хойш 14-21 хоногийн дараа дархлаажуулалт тогтдог. Дархлаа тогтсоноор тухайн иргэн тус төст өвчнөөр өвчилсөн хэдий ч хүндрэхгүй гэсэн үг. Тиймээс бид томууны улирал эхлэхээс өмнө урьдчилан сэргийлэхээр дархлаажуулалтыг эрт эхлүүлж байна.

-Өмнөх жилүүдэд вакцинжуулалт хэзээ эхэлдэг байсан бэ?

-Томууны дэгдэлт эхлэх үеэр буюу аравдугаар сарын сүүлээр вакцинжуулалт эхэлдэг байсан.