Зургадугаар сараас есдүгээр сарын хооронд шарилж, луулийн харшил нэмэгддэг.  Зарим тоохиолдолд хүмүүс харшил болон томуу туссан эсэхээ ялгаж чадалгүй, харшлаа улам хүндрүүлдэг. Үүнтэй холбоотойгоор танд дараах зөвлөгөөг хүргэж байна.

Та юунаас харшилж байгаагаа мэдэхийн тулд харшлын зовуурь эхлэхээс өмнө арьс болон цусаар шинжилгээ өгч, харшлын сорил тавиулах хэрэгтэй. Харшил эхэлсэн үед сорил тавиулбал дархлааны урвал хэт идэвхэжнээс болоод буруу буюу хуурамч эерэг хариу гарах тохиолдол байдаг.  

Харшлын үед, илрэх шинж тэмдэгүүд

• Хамар битүүрэх
• Нус гоожих
• Нүд улайж загатнах  
• Тууралт гарах 
• Хамар, хоолой загатнах  
• Ойр ойрхон хүчтэй найтаалгах зэрэг байдаг. Харшил хүндэрсэн тохиолдолд хоолой сэрвэлзэх, ханиах, амьсгал авч чадахгүй болох зэрэг шинжүүд тэмдгүүд илэрнэ.  

Харшил хүндрэхээс хэрхэн сэргийлэх вэ

Цонхоо хаах. Харшлын үед 04:00-10:00 болон 17:00-20:00 цагт агаарт ургамлын тоос их дэгддэг тул гэрт байх үед цонхоо хаах, гадуур явахдаа тухайн цагуудад маск зүүгээрэй. Маск зүүснээр харшил хүндрэхээс сэргийлдэг.  

Чийгтэй цэвэрлэгээ хийх. Гэрт тоос босохоос сэргийлнэ.

Гадаа өмссөн хувцсаа дотор өмсөхгүй байх. Гадуур өмссөн хувцсанд харшил үүсгэгч тоосонцор наалдсан байдаг тул гэртээ орж ирээд хувцсаа солих нь харшлын хүндрэлээс сэргийлдэг.

Өдөр бүр тогтмол тоосоо соруулах. Тоосоо соруулах болон агаар шүүгч хэрэглэснээр ам, хамарт харшил үүсгэгч орохоос сэргийлнэ.  

Дэглэм барих. Харшлын үед хориглох хүнс: Өндөг, боловсруулсан хүнс, цитрусын төрлийн жимс( мандарин, апельсин, нимбэг) киви, хэт амтлагчтай хоол хүнс ордог. 

Ургамал ихтэй газраар явахгүй байх. Ургамал цэцэглэх үеэр хөдөө орон нутгаар явахгүй байх.

Нэгэнт өвчилсөн бол өрхийн болон дүүргийнхээ арьс, харшлын мэргэжлийн эмчид хандан, эмчийн зааврын дагуу асаргаа, сувилгааг гэрийн нөхцөлд хийхийн зэрэгцээ хүндрэх шинж тэмдэг илэрвэл эмчдээ яаралтай мэдэгдэн дараагийн шатны тусламж үйлчилгээнд хамрагдах нь зүйтэй. Мөн харшил хөдөлсөн даруйд дур мэдэн эм хэрэглэхийн оронд мэргэжлийн эмчид хандах нь зүйтэй юм.