Ердөө 30-аадхан жилийн өмнө тухайн үеийн аль том, нөлөө бүхий дарга болон ажилдаа амжилт гаргасан ажилчдын гэр бүл шагнуулж амардаг улсын хэмжээний амралт байлаа, Сөгнөгөр амралт. Гэтэл өнөөдөр нийтийн бие засах газар болон хувирч, адуу, үхэр сүүдэрлэн зогсдог, замын хүн орж бие засдаг балгас болжээ. 

-“СӨГНӨГӨР АМРАЛТ"-ЫН НУРЖ, ҮГҮЙРСЭН БАРИЛГУУДЫГ УЛС БУЦААН АВЧ, ОРОНД НЬ ХҮҮХДИЙН ЗУНЫ ЗУСЛАН БАЙГУУЛБАЛ НҮДЭЭ ОЛСОН ШИЙДВЭР БОЛНО ДОО"

Уг газрыг “Гацуурт” ХХК-ийн захирал Л.Чинбат хувьчлал нэрээр тухайн үеийн зах зээлийн үнэлгээнээс маш бага өртгөөр худалдан авсан түүхтэй. Үүнээс хойш Төв аймгийн Батсүмбэр сумын Сөгнөгөрийн голын хөвөөнд байрлах “Сөгнөгөр амралт”-ын байр тоногдож, нурж, хагарч, хугарсаар ийн балгас болж орхигджээ. Юмандаа эзэн болдог улс бол энэ мэт томоохон бааз, сууриа додомдож, арчлаад үүх түүхийг нь шингээсэн шинэ бүтээн байгуулалт болгочихдог. Ийм боломж байгаа эсэхийг Төв аймгийн Батсүмбэр сумын Засаг дарга Д.Ганболдоос тодруулахад “Намайг хүүхэд байхад “Сөгнөгөрийн амралт” гэж хүний хөл тасардаггүй, дандаа дуу хуур болж байдаг, жижигхэн сууринд соёлын үр тарьсан сайхан газар байсан. Хувьчлал болж байх үеэс эхлээд үүд хаалгыг нь дангинатал түгжээд, хүн битгий хэл амьтан дөхөхөөргүй балгас болчихоод байж байна. Энэ амралтын байруудыг “Гацуурт”-ын Л.Чинбат хувьчилж авсан, албан ёсны эзэн нь мөн. Тиймээс би 2012 оноос хойш жил бүр холбогдож, “Ядаж л сумын өнгө төрхөд нэмэртэй гэж бодоод барилгуудыг хэзээ сэргээн засварлах вэ” гэж асуудаг юм. Тэр бүрд “Энэ жил засварлана аа” гэдэг. Эзэнгүй, ийм балгаст элдэв гэмт хэрэг гарах эрсдэл их байдаг болохоор санаа зовсондоо байн байна асуудаг юм” гэлээ. 

Л.Чинбат хувьчилж авсан “Сөгнөгөрийн амралт”-ын барилгуудаа сэргээн засварлах нь бүү хэл, зэвтэй төмөр цонхонд нь хадаад орхижээ. Барилгуудын дээвэр нар, салхинд гандаж, хагархай шил, үйрсэн тоосго хаа сайгүй. Энэ газраар өнгөрөн явж буй хүмүүс “Чөтгөр, сүнстэй байшин” гэдэг болжээ. Зарим нь ойрхон өнгөрөхөөс ч зүрхшээж, тойрон өнгөрдөг аж. Үүнээс гадна амралтад яваа хүмүүс буцахдаа хамаг хогоо онгорхой, цоорхойгоор нь шидэлж, хаядаг бололтой. Цонхоор нь архины шил, газ, ундааны савнаас эхлээд ууттай хог овоорсон харагдана. 

                     Л.Оюун-Эрдэнэ Ерөнхий сайд болон түүний багийнхны хийж буй ажлуудаас нэг талархууштай нь улсын өмч байсан зарим үйлдвэрийг төрд буцаан авч эхлээд буй. Иймд нэгэнт хаягдсан “Сөгнөгөрийн амралт”-ын нурж, үгүйрсэн барилгуудыг улс буцаан авч, оронд нь хүүхдийн зуны зуслан байгуулбал нүдээ олсон шийдвэр болно доо. Улаанбаатар хотоос холгүй, уул, ус, ургамал тэгширсэн эрүүл, сайхан байгалийн дунд хүүхэд, багачуудад зориулсан, “Сөгнөгөрийн амралт”-ын хэв шинжийг шингээн шинэчилсэн улсын зуслантай болчихвол “Олон улсын найрамдал төв”-ийн ачааллыг “хугаслалцах” нь дамжиггүй ээ. 

Энэ ажлыг Соёлын сайд, Л.Чинбатын охин Ч.Номин санаачилж, ажил хэрэг болговол олны таашаалд яасан их нийцэх бол.