Богд уулын энгэр дэх өтгөн мананг өглөөний нар ярж, гэгээ татахтай зэрэгцэн хийлийн уянгалаг дуу тэртээ дээрээс жавар үргээн дулаан сонсогдох аж. Амралтын өдрийн нэгэн содон өглөө эхэлж байна. Уулын бэлээр хэсэг хүн эртлэн ирээд, саяхан бороонд идэгдсэн нойтон жимээр дээш өгсөх бөгөөд түүнийг даган бид  ч бас зураг авах хэрэгслээ үүрсээр байгалийн содон төрхтэй нүүр тулан алхлаа. Бидний ийн зорьж яваагийн учир гэвэл Богд уулыг зорин алхагсдын сэтгэл зүрхийг хэсэгхэн газар ховсдон саатуулах хийлийн содон ая, бүлээн аарц, халуун кофе, найрсаг үйлчилгээгээр угтсан өсвөр насны дөрвөн хөвгүүн буюу “For happiness” /аз жаргалын төлөө/-тэй уулзах байсан юм. 

БАЙГАЛЬД "УРЛАСАН" БОРХОШ

             Уулын өөд гарах нарийн жим амаргүй бас бартаатай. Саяхан орсон бороо уулын хөрсийг ихээхэн шавартуулжээ. Гэсэн ч жимээр дээш өгсөх тусам улам уянгалах тэр аялгуу сэтгэлийг, ер нь хэнийг ч улам яаруулж байлаа. Энэ жимээр алхах нь байгаль, хүн хоёрын хосолмол найрал хөгжмийг ойн дундаас мэдрэх мэт.  Биднийг очиход модон сандал дээр халуун аарц ундаалан суух хэсэг хүн алжаалаа гарган сууна. Ирсэн зочид болгоныг инээмсэглэн угтаж, үйлчлэх хөвгүүн “Сайн байна уу” гэсээр биднийг ч бас угтав. Нөгөө талд халуун гал дээр ус буцалгах хоёр хөвгүүн үйчлүүлэгчдийн захиалгыг бэлтгэж, ихэд завгүй суугаа харагдана. Харин уул руу өгсөж эхлэхээс авахуулаад эрхгүй сэтгэлийн гүнд тайтгар төрүүлэх энгийн даруу нэгэн хүү, нарийн яруу чимээгээр уулын гүн дэх бүхнийг анир чимээгүй, хөгжмийн үл мэдэх ертөнцөд чиглүүлэн зогсоно. Саатан суух хүмүүс хажууханд урсах голын чимээ, хүүгийн торгон авьяас хоёрт хэдийнээ ховсдуулах шахам болжээ. Ойр хавийн модонд цаасан дээр бичсэн урмын үгсийг тэд алхагчдад зориулан урлажээ. Түүнийг уншсан хүмүүст урам зориг, итгэл төрөх нь аргагүй. 

            Энэхүү бахдам үйлийг санаачилсан Т.Одонбаяртай ярилцлаа. Тэрбээр “ Анх бид амралтын өдөр болгон найзуудтайгаа ууланд гарч, биеэ бялдаржуулах, эрүүл амьдралын дадалд суралцангаа байнга ирдэг байсан. Харин замынхаа талд ороод маш ихээр цангаж, бас ядарч сульдах үе цөөнгүй тохиолдож байлаа. Замын талд ямар нэгэн уух зүйл зардаг газар ч юм уу, амралтын сандал байгаасай гэж хүссэн. Энэ бодлоос л бидний санаа төрсөн юм даа.  Одоогоос жилийн өмнө энэ жижигхэн мөрөөдлөө эхлүүлэх гээд гэр бүлийнхэндээ дамжуулахад тэд маань хамгийн ихээр дэмжиж, туслалцаа үзүүлсэн. Мөн дээрээс нь найзууд маань хамтарч хийхээр болсонд баярладаг. Тухайн үед аав, ээжээсээ мөнгө авч хэрэгцээгээ хангадаг  байсан бол, одоо тодорхой хэмжээнд орлоготой болсон. Энэ нь бидний олон асуудлыг шийдэхийн хажуугаар халаасны мөнгө, ахуйн хэрэглээгээ өөрсдөө хангаж чадах хэмжээнд хүрсэн.

Төд удалгүй олон нийтэд танигдаж эхэлсний дараа хүмүүсийн сэтгэгдэл болон бидэнд хандах хандлага их өөрчлөгдсөн. Үүнээс л урам зориг, эрч хүч ихээр авсан шүү. Мөн биднийг магтаж сайшааж байсан хүмүүст баярлаж байгаагаа хэлмээр байна. Түүний дараа үйлчлүүлэгчид маань ч нэмэгдсэн. Байгальд найзуудтайгаа хүссэн зүйлээ хийж, үүнээс байнга эрч хүч авна гэдэг маш сайхан.

           Найзуудтайгаа өнгөрүүлсэн хөгжилтэй дурсамж, үйл явдал зөндөө тохиолддог. Хааяа мэдээж ам зөрөх үе гардаг ч удахгүй эвлэрчихнэ. Ер нь тэр зэргийн юм байх шүү дээ. Олсон орлогынхоо ихэнхийг гэрийнхэндээ, кофендоо зарцуулж байгаа. Анх эхэлснээс хойш их зүйл өөрчлөгдсөн шүү. Цаашид төлөвлөсөн зүйл мэдээж байгаа” хэмээн  бахархалтайгаар ярьж байлаа. Тэд урьд нь хэний ч харж байгаагүй шинэ санаа, бүтээж байгаагүй бүхнийг бүтээж чадсан нь хамгийн гайхалтай байлаа. Монголын ирээдүй улам гэрэлтэй, итгэлтэй болсныг эл хүүхдүүд хамгийн тодоор илэрхийлж байсан юм. Сэтгэл зүрхээ, аз жаргалтайгаа холбон хослуулж үйлчлүүлэгчдийн хайр хүндэтгэлийг даасан тэдний амттай кофеноос хэн ч татгалзахыг хүссэнгүй. 

Б.ЖАМБАЛБАЯРНЯМ: БАЙГАЛЬД ХӨГЖИМ ТОГЛОХ НЬ ХАМГИЙН САЙХАН МЭДРЭМЖИЙГ ТӨРҮҮЛДЭГ

                  Богд уулын хойд хормойн эл хэсэгхэн газарт хүн бүрийн баяр баясгалан бялхаж ядан байлаа. Хийлийн аялгуу хаа сайгүй бүхнийг ховсдон, асар их тайтгаралыг бий болгоно. Б.Жамбалбаярнямын уран тансаг авьяасыг Монгол хөгжмийн зохиолчдын хөгжмөөр дамжуулан мэдрэх хүмүүс анхаарлаа төвлөрүүлэн,  ховсдуулах аж. Тэрбээр “Би багаасаа хийл хөгжмийг сурч эхлээд олон жил болж байна. Энэ хөгжим нь бусад хөгжмийг бодвол илүү сайхан дуутай, гоёмсог мэдрэмжийг төрүүлж чаддаг. Анх найз минь "Энд ирж хамтран хийл тоглооч" гэдэг санал тавьсныг хүлээн авснаар энд хөгжим тоглох болсон юм. Ирснээс хойш хийлийн хайрцаганд хүмүүсээс урамшууллын мөнгө цуглах болсон. Энэ мөнгөөрөө гэрийнхэндээ болон өөрийнхөө боловсрол, сургалтын төлбөрт зарцуулж эхлээд байна. Заримдаа найзтайгаа ч хуваадаг. Хүмүүсээс их урам зориг авч, эерэг сэтгэгдэл төрүүлэх болсондоо баяртай байгаа. Цаашид энэ эрчээрээ эерэг зүлйиг түгээх болно. Амьд байгальд амьд хөгжим тоглох нь хамгийн сайхан байдаг. Тэр тусмаа Хэнтийн өндөр ууланд зэрэг Монголын алдартай хөгжмийн зохиолчдын хөгжмөөс тоглоход, хүмүүс илүү сайхнаар хүлээж авдаг. Багаасаа нот харж тоглож сурсан болохоор одоо тоглох аяныхаа нотыг бүгдийг нь  цээжээр мэднэ. Бидний дэргэд гол урсаж, шувууд жиргэх чимээ, Монголын алдартай хөгжмийн аястай хоршин хүмүүст үнэхээр тансаг мэдрэмж төрүүлж чаддаг гэдэгт итгэдэг” гэлээ. Хэнтийн өндөр ууланд ая хэсэг зуур эгшиглэх үеэр хүмүүс нааш, цаашаа зөрөн алхаж, энэхүү гайхалтай аялгуунд сэтгэлээ уяж зогтусах аж. 

Ирээдүйд кофе шоптой болох мөрөөдөлтэй

            Ирэх зочдыг сандал дээр тухалсан хойно нэг нэгээрээ ээлжлэн үйлчлэх С.Уламбаяр, Э.Эрхэсбаяр нар төлөв даруу байдлаараа бусдын сэтгэлийн татна. Тэд кофений усаа голоос зөөж авчраад кофегоо найруулан хоромхон хугацаанд үйлчлүүлэгчдийн сэтгэл ханамжийг хангахын төлөө шуурхай ажиллаж байлаа. Дан ганц хөгжмийн аялгуугаар биш үйлчилгээний өндөр соёлоор бусдыг татаж байгаа нь бахаралтай. Тэдэнд хандах хүн ихэд баяртай байх бөгөөд хэсэг амрах зуур дээш дахин өгсөх эрч хүчээ эндээс олж байх шиг харагдана.

-Үйлчлүүлэгчдийн сэтгэл ханамж ямар байна вэ?

         -С.Уламбаяр: Олонд танигдсаны дараа биднийг зорих хүн илүү нэмэгдсэн. Дээрээс нь хийл тоглодог найз маань ирснээс хойш бүр их хүмүүс манайхаар үйлчлүүлдэг. Бидэнд хүмүүс сөрөгөөр хандаж байсан удаа байхгүй ээ,  мэдээж үргэлж баяртай сайхан байдлаар хүлээж авдаг.

-Үйл ажилллагаа явуулах байрлалаа хэрхэн сонгож байсан бэ? 

         -Э.Эрхэсбаяр: Бид анх үүнээс арай өөр газар байсан л даа.  Гэхдээ удалгүй энд ирсэн шалтгаан нь уул руу гарч байгаа хүмүүс яг энэ газар ирэхээр бага зэрэг ядарч, аль эсвэл ам нь цангадаг. Тиймээс л тохиромжтой үед сайхан амттай аарц, коффегоор дайлах нь зөв гэж бодсон. 

-Цаашид энэ төрлөөр найзуудтайгаа хамтран юу хийхээр төлөвлөж байна вэ? 

            -С.Уламбаяр: Бид дөрөв кофе шоп нээх мөрөөдөлтэй. Одоо ахлах ангийн сурагчид болохоор удахгүй төгсөөд оюутан болох үедээ үүнийгээ ажиллуулах гээд завгүй л болох  байх. Гэхдээ хажуугаар нь үргэлжлүүлнэ. Анзаарвал бид дөрвийн нэрэнд  ижилхэн баяр гэж орсон байгаа. Үүнээс үүдэн Four happiness гэдэг нэрийг өгсөн энэ нь дөрвөн аз жаргал, баяр баясгалан гэсэн утгатай. Харин сүүлдээ For happiness буюу аз жаргалын төлөө гэх утгатай болгож өөрчилсөн. Энэ нэрээрээ мөн л бусдад аз жаргал бэлэглэхийн төлөө гэсэн утга санаа агуулсан. 

-Үе тэнгийнхэн нь урам зориг өгч, сайн сайхан зүйл хэлж байна уу ? 

             -Э.Эрхэсбаяр: Жилийн өмнө бид анх эхлүүлж байсан болохоор ойр дотны хүрээлэлд байсан хүмүүс, найзууд бага багаар дэмждэг байсан. Сүүлд олон нийтийн сүлжээнд тавигдсанаас хойш бүр ч их урам өгч, сайхан үгс хэлэх болсон. Би энэ гуравтайгаа нөхөрлөөд удаж байгаа болохоор бие биендээ үргэлж урам зориг өгч чаддаг.

 -Хамтдаа нэгийгээ таньдаг болсон цагаас эхлэн хэдэн жил нөхөрлөж байна вэ?

                 -С.Уламбаяр: Долдугаар ангиасаа хойш нөхөрлөж байгаа болохоор хэдийнэ тав, зургаан жил болжээ. Энэ хугацаанд үргэлж хамт байсны үр дүнд ийм ажлууд дээр санаа нийлж хамтарч чаддаг . 

          Нар дөнгөж уулын орой  дээр гарахад тэдний авчирсан кофе борлуулагдаж дууссан байлаа. Ингээд уулын бэлээс зөөсөн эвхдэг ширээ, кофе буцалгагч зэрэг зүйлсээ тэд хувааж үүрээд буух цаг болов. Бүдэгхэн жимээр доош буухад бидэнтэй зөрөх хүмүүс “Хийл тоглож аарц зардаг хүүхдүүд нөгөө газраа байгаа болов уу” гэсээр дээш яаран гарч байлаа. Ингэж тэд бусдад эерэг сэтгэгдлийг харамгүй өгөх аж. Ер тэд амралтын өдрөөр зарим хүний ууланд гарах шалтгаан болдог ч байж мэднэ. Тэдний найрсаг зан төлөв, хийлийн уянгалаг аялгуунд бодлоо цэгцлэн түр амсхийх боломжийг хэн ч алдахыг хүсэхгүй билээ.