Монгол Улсын өсөх идэр начин Э.Энхбатын гар утас олдохгүй байгаа бөгөөд хэрэг гарсан өдрийн орой түүний гар утаст ирсэн дуудлагыг үл таних хүн авсан гэх мэдээлэл гараад байна. Энэ талаар Э.Энхбат начны гэргий Б.Нандинцэцэгээс тодрууллаа.

Тэрбээр “Манай нөхрийн гар утас олдохгүй байгаа нь үнэн. Хэрэг гарсан орой нөхрийгөө ГССҮТ-д хүргэснийхээ дараа гэнэт утас нь яасан юм бол гээд залгатал дуудаад байгаа хэрнээ авахгүй байсан. Хэргийн газарт очиж хайгаад олоогүй. Тэр орой намайг цахим хаягтаа хэрэг болсон тухай нийтэлсний дараа Э.Энхбатын дугаар руу олон хүн залгасан юм билээ.

Гэтэл гар утсыг нь эрэгтэй хүн аваад “Юу болоод байна вэ” гэж асуухад нь “Өө, юу ч болоогүй. Зүгээр гэр бүлийн асуудал” гэж хэлсэн байна лээ. “Чи Э.Энхбат мөн үү” гээд асуухад нь шууд тасалсан гэсэн. Бараг 4-5 хүн залгаад ярихад нь тэгсэн байна лээ. Тэр шөнөжингөө утас нь холбогдож байгаад өглөө нь холбогдохоо больчихсон. Э.Энхбатын хуурай дүү нь тэр орой залгасан гэхээр нь “Ямар хоолойтой хүн байсан бэ” гэж асуутал “Тэр үед нэлээн уур омогтой хүн ярьсан” гэж хэлсэн. Тэгэхээр нь “Түвшинбаярын хоолой мөн үү” гэтэл “Нээрээ, мөн ч юмуу” гэсэн.

Та яг Э.Энхбат мөн үү гэхэд нь шууд тасалчихсан. Х.Цагаанбаатарыг залгахад нь бас авангуутаа “Э.Энхбат мөн үү, чи хэн бэ” гэхэд нь шууд тасалчихсан гэсэн. Манай нөхөр Юнител, Жи-Мобайл хоёр барьдаг. Хүмүүстэй ярихдаа энгийн гар утсаараа ярьж, интернет ашиглах бол Iphone гар утсаа ашигладаг. Энэ хоёр утас нь хоёулаа олдохгүй байгаа” гэлээ. 

Түүнчлэн Э.Энхбат начны бие ямархуу байгаа талаар түүнээс тодруулахад “Яг л хэвэндээ байна. Эмч нарын зүгээс ирээдүйг хэлэхгүй өнөөдрөөрөө байна гэж хэлсэн” гэсэн юм. 

Одоогоор цагдаагийн байгууллагын шалгалтын ажиллагаа үргэлжилж байгаа бөгөөд уг хэрэгт яллагдагчаар татагдаад байгаа Н.Түвшинбаярт 20 хоног цагдан хорих ял оноогоод байгаа билээ.