Дорнод аймаг, Хэрлэн (Сүмбэр) зургаадугаар багт байрнаас хар утаа гараад байна гэсэн дуудлагыг зургаадугаар сарын 3-ны өдрийн 13:20 цагт онцгой байдлын байгууллагад мэдээлжээ. Тус аймгийн Онцгой байдлын газрын 52 дугаар ангийн албаныхан байрны В1 давхарт амьдардаг айлын жижиг өрөөний эд зүйлс шатаж байсныг 13:26 цагт бүрэн унтраасан байна. Уг гал түймэрт хайгуулын ажиллагаа зохион байгуулан В1 давхраас А /5 настай, эмэгтэй/, А/ гурван настай, эрэгтэй/ С /35 настай, эмэгтэй/, А/11 настай, эрэгтэй/ А /нэг настай, эмэгтэй/-ыг тус тус гарган Эмнэлгийн байгууллагад хүлээлгэн өгсөн.

     Иргэн С/35 настай, эмэгтэй/, А /11 настай, эрэгтэй/, А /1 настай, эмэгтэй/ нар Эмнэлгийн байгууллагад хүргэгдэн очоод нас барсан, А /таван настай, эмэгтэй/, А /гурван настай, эрэгтэй/ нарын биеийн байдал тогтвортой, Бүсийн оношилгоо, эмчилгээний төвийн Хүүхдийн тасагт хэвтэн эмчлүүлж байна. Утаажилтын бүсээс 10 хүн /найман том хүн, хоёр хүүхэд/-ийг аюулгүй гаргаж, дөрвөн хүн /хоёр том хүн, хоёр хүүхэд/-ийг Эмнэлгийн байгууллагад хүлээлгэн өгсөн.